eSefarad Noticias del Mundo Sefaradi
El Inkizitor Asasinado: Pedro de Arbués
Pedro de Arbues nasio serka de 1441 en Epila, Aragon. Despues de aver estudiado la filozofia en Espania, fue graduado en teolojia i en ley del kolejio espaniol San Klemente en Bolonya. Ensenyo la filozofia moral en la Universidad de Bolonya. En su retorno a Espania en 1474, fue admetido al kuerpo relijiozo de Saragosa. Es en 1484, ke iva sera nominado por Torquemada al posto de inkizitor de Aragon(1).
En esta mizma perioda, Ferdinand i Isabella avian obtenido una bula del Papa Sixtus IV, akordando el dirito de establisir un tribunal para djuzgar los eretikos, i partikularmente los Konversos ke avian aviertamente o sekretamente retornado al Djudaismo.
Los reportos sovre la manera ke Arbues aktuo en tanto ke inkizitor, i partikularmente, en la egzekusion de los ke fueron deklarados kulpables, no son konsistentes.(2) Asigun syertos tekstos, Arbues avia segido el egzemplo de Torquemada, en montando dos vezes ogeros, ainda durante el primer monte de su tarea, i de esta manera, avia kemado a munchos Marranos. Aunke no egzisten rejistros, se pensa ke Arbues avia probablamente kontinuado en las persekusiones.
Durante esta perioda, somas enormas de moneda ofrisidas a Ferdinand i Isabella para limitar la aktividad de la Inkizision no avian aprovechado. I, despues de una konsultasion entre eyos, los muevos Konversos, kon el apoyo de syertos Kristianos de alto grado, se avian desidado de matar a Arbues.
En una de las ultimas reuniones sekrtetas, Juan de la Abadia fue eskojido para dirijar el asasinato, i Mateo Ram kon Juan de Esperandeu fueron eskojidos para implemantarlo. Estos dos ivan a ser asistados por sus mosos, i entre eyos, Vidal de Urango, el servitor fransezo de Esperandeu.
Aparte de Abadia i de Esperandeu, nombres renomados de Konversos komo los Sánchez, los Montesa, los Patemoy, los de la Caballeria, los de Santa Fé, los de Santa Maria, los de Santa Cruz, i los de Santángel – solo para sitar una partida de eyos – fueron i eyos allegados de aver partisipado a esta konspirasion.
Arbues era konvinsido ke sus enemigos se avian desidado de matarlo, i por esto uzava a apareser en publiko akompanyado de un guardo armado para ser protejado.
Es reportado ke dos atentatos de matar a Arbues avian en el empesijo fayido. El primer en su kamareta de echar i el segundo en la mizma katedrala La Seo en Saragosa, ande iva ser matado.
Fue en una noche de Septiembre 1485, ke los konjurados parvinieron a atakar a Arbues. Despues de dos dias, el inkizitor iva sukombar a sus firideros.
Sovre este evenemiento, Tristanico de Leonis ke avia parvinido a salvarse de ser kemado en fuyendose de Saragosa, se ekprime ansi:
«Esta noche, entre las onze i las dodje, Juan de Esperandeu, hue a la kaza de Juan de la Abadia… ke salio bien armado de su morada… i se adjuntaron a Mateo Ram i a mi, akompanyados de Vidalico, moso de Juan de Esperandeu, i de dos personas, ke insistieron a tapar sus karas kon maskas, i ke no nombrare porke no fueron prosesados… Solo dire, para bien ke se sepa, ke akeas dos personas no eran djudias i ni konversas, sino ke eran kristianas, i de alta i noble famiya…
Juan de Esperandeu, Mateo Ram i los dos mosos, entrimos por una de las puertas de detras de la katedrala… Juan de la Abadia se kedo kon los dos enmaskarados en la puerta para kuvrir la retirada…
A yegar serka del altar major, ya vimos a Pedro de Arbues ke estava arodiyado allado de un pilar, debasho del pulpito…
Juan de la Abadia, impasiente, se aserko de mozotros i le disho a Vidal Durango:
– Dale al traisor, ke es este!
Entonses,Vidalico Durango le dyo una kuchiyada a de Epila (Arbues) ke lo transperso del nuko asta la barva, kortandole la vena. Maestro Pedro de Arbues kijo alevantarse i intento ir al koro. Entonses, Juan de Esperandeu le dio un otro golpe ke le traverso el braso de un lado al otro. Ya no se alevanto, i todos mos fuyimos de ayi…«(3)
La reaksion de los sivdadinos de Saragosa fue muy fuerte. El puevlo se revolto kontra las minoridades relijiozas, i partikularmente kontra los Konversos, en provokando un tumulto grande en la sivdad. Es notado ke sin la intervension del arsheveko Alfonso de Aragon, ke se arodeo en las kayes de Saragosa en riva de su kavayo, en konsejando al puevlo el kalmo i prometiendo ke los kulpables seran kastigados, todos los Maranos de la sivdad estavan en perikolo de ser masakrados.
De mizmo, la Inkizision, para afirmar su otoridad, reuniso un tribunal ke akuzo a varios Konversos djudios de komplotar kontra el Santo Ofisio i por aver matado a Arbues.
Syenes de supsonados fueron inkarserados en los donjones de la Inkizision para ser djuzgados. Los ke fueron topados de ser implikados en la matansina de Arbues fueron krualmente kastigados para kalmar el puevlo i intimidar a otros ke puederian imitarlos.
El asasino prinsipal Vidal fue deklarado «djudio konsumado i sirkonsizado«. Sus manos fueron amputadas i enklavadas a la puerta del palasio de la Disputasion, ande murio de emorajia. Su puerpo fue despues transportado a la plasa del Merkado, ande fue dekapitado i despedasado. Esperandeu i Ram fueron kemados despues ke fueron despedesados. Abadia se suisido en komiendo los pedados de vidro de un lamparo en el Kastilio de la Aljaferia, ande estava asperando para ser egzekutido. Su puerpo fue despedasado i kemado en el ogero. Luis de Santangel, Garcia de Moros, Alonso Sanchez, i Jaime de Montesa fueron dekapitados i kemados. Fransico de Santa Fe, se suisido en echandose de la Torre Aljaferia. Su puerpo fue kemado.
Es reportado ke Pedro de Arbues, era de lineaje limpio, sin antesedentes ni de Konversos, ni de Moros, ni de eretikos i ni de rekonsiliados. Por esto, i seando ijo lejitimo i graduado en estudios superiores, era un kandidato ideal para ser admetido al kuerpo relijiozo.
Despues de su muerte, kreyensyas sovre su poder majiko se avian repandido entre el puevlo. La djente empeso a vijitar el lugar ande fue matado, i a kreerse ke su sangre kontinuava a apareser ande fue vertido. Una Djudia se avia mizmo salvado de la muerte, en afirmando ke, achakes de su fervor katoliko avia mojado su rida kon esta sangre.
Fue rekordado un testimonio sovre la aparision de Arbues entre las resplandores selestas, anunsiando las futures reushidades de la Inkizision i la urjensia ke Fernando el Katoliko kontinue en la konkesta de Granada, i ke mantenga al Santo Ofisio, ke estas dos tareas le akordaran la vida eternela.
Ainda despues de su muerte, Arbues fue aklamado i venerado en tanto ke martirio i santo, por el puevlo. Portanto, es en 1867 ke iva ser kanonizado komo santo.
Su kanonizasion provoko una indinyasion no solo en el mundo djudio, ma i en sirkolos kristianos. La reprezentasion de Arbues en tanto ke una persona vieja i dekrepitada, tomando un plazer maliosozo en las sufriensas de sus viktimas, probablamente Maranos, asigun ke parese en una pintura de Kaulbach, fue interpretada komo la ilustrasion de esta indinyasion.(4)
* * *
El asasinato de Arbues reprezenta un kavzo uniko en la istoria de la Inkizisyon en Espania, i el primero de los dos kavzos de asasinato de un inkizitor.(5)
Durante munchos anyos, los aktos de vengansa a la matansina de Arbues kontinuaron a tomar almas i sembrar el oror entre los Konversos. Los nombres de munchas famiyas ilustras de Konversos paresen entre los ke fueron kemados, en atadijo kon esta matansina.
Kontraramente a las ekspektasiones de sus partizanes, este akto al lugar de servir el intereso de los Konversos, akselero i intensifio el proseso de la Inkizision, i kontribuo a aparejar el tereno para el Edikto de la Ekspulsion, ke iva ser promulgado en manko de un dekado.
—————————————————-
(1) Kon Arbues, i Gaspar Juglar fue nominado a este posto.
(2) Sovre esto la Ensiklopedia Katolika afirma: «Pedro performo los doveres kon fervor i djustisia. Aunke los enemigos de la Inkizision lo akuzan de krueldad, es siguro ke ni una simple sentensia de muerte no se puede retrasar a el.»
(3) Carmen Espada Giner, Sangre en la Catedral, La Conjura de todo un Pueblo, 2a Edicion, Manuscritos de Inquisicion, Libros Certeza, Zaragoza 2000, 111-113.
(4) La kemasion de los eretikos, pintura por Wilhelm von Kaulbach, 1805-1874. Asigun ke fue notado por Richard Gottheil, Meyer Kayserling i William Milwitzky en sus artikolo Pedro Arbues, en el Jewish Encyclopedia, esta pintura reprezenta a Arbues aparejandose a kemar una famiya probablamete marana.
(5) El segundo kavzo de asasinato akontesio en Sisilya, en 1657, kuando el kleriko Diego LaMattina, akuzado de erezia, mato al inkizitor Juan López Cisneros.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
