eSefarad Noticias del Mundo Sefaradi
La Muerte Preta i el masakro de los djudios
—————————————————-
La malatia infeksioza ke se avia repandido a traverso la Evropa en la Edad Medya, no tiene presedente en la istoria. Invadiendo el Kontiente entre 1347 i 1359 i en eksterminando mas del tierso de su populasion, esta epidemia fue nomada «La Muerte Preta» o «La Pesta Negra». Saliendo del Oriente, yego a las kostas de la Italia en la primavera de 1348, i de ayi se repandio a la Evropa, renovelandose de vez en vez, fina los anyos 1700.
Aunke djudios tanbien murieron de esta epidemia, los kristianos pretendieron ke estos kavzaron el dezastro. En konsekuensia, desbrocho una de las mas oribles persekusiones de los djudios, ke eradiko sus komunidades prinsipalas de la Evropa.
—————————————————————————————————————————
La Muerte Preta orijino probablamente en algun lugar en la Asia Sentrala, ke fue un rezervuar permanente del ajente infektivo en los animales de las estapas. Se pensa ke el ajente de la plaga fue una bakteria konosida komo yersinia pestis, propajado por las pulgas de los ratones.
En 1346, avian yegado a la Evropa rumores sovre numerozos kavzos de mortalidad en los puevlos de la Asia, partikularmente en la China. En la primavera del mismo anyo, la pesta avia aparesido entre los tatares, en el Norte de la Mar Preta.
En 1347, la sivdad de Kaffa, un porto djenovezo en Krimea, fue atakada por la armada tatara. Kuando los tatares avian empesado a murirsen achakes de la pesta, los djenovezos se avian alegrado. Portanto, esta alegria se termino kuando, kon la esperansa ke sus fedor matara a su puevlo, los tatares empesaron a lansar kon katapultos los kadavros fedyendos en riva de las murayas de Kaffa. La golor no mato a los djenovezos, ma la malatia si.
Despues ke los tatares se retiraron, los djenovezos se fuyeron. Al borde de sus nave no avia solo marineros, ma i ratones. Los ratones teniyan kon eyos el ajente de la Muerte Preta.
Asigun una asunsion, la infeksion fue yevada a Estambol, Mesina, Djenova, Venezia i a otros portos de la Evropa. De estos portos, la malatia se propajo rapidamente en la Evropa. Otruna posibilitad es ke la epidemia fue traida a la Evropa por los komersantes de la Ruta de Seda.
La malatia se manifestava kon inflamasiones en las karas, anshas, pechos, akompaniadas de kalor, sudorinas i bubones – gonflamientos – ke puedian ser fina la grandor de una mansana. Los hazinos se murian de una muerte orible, sufriendo de dolor.
Los medikos inyorando su kavza no eran kapaches de administrar kualkere remedio i, dingun tratamiento no era valable. Muy pokos fueron los ke se kuraron. La mayoria fallesio en unos tres dias despues de la aparision de los bubones.
Aunke se repandio rapidamente por toda la Evropa, la plaga fue eratika: salto en intervales siertas sivdades i areas. En enero 1348, kuando se kalmo en el frio del invierno, munchos pensaron ke la plaga se avia terminado, portanto kon el arivo de la primavera i el buen tiempo, se renuvelo de muevo kon una maz intensiva ferosidad. En su tiempo, dinguno no era konsiente de estas posibilidades, i el atadijo entre los sentros de su aparision fue vagamente persevido.
No konosiendo las kavzas de la pestilensia i no teniendo dingun remedio de defensa, el puevlo estava reajisando kon konfuzion i dezesperansa, panikando i a la fin ravajando i abandonando las sivdades. El eskrivano italiano Giovanni Boccaccio, fue inspirado en su ovra, El Decameron, de la epidemia ke avia devastado Firenze en 1348: La kalamidad entezo los korasones… personas se eskivaron de las otras; parientes se alesharon; ermano fue abandonado por ermano; espoza por espozo. I maz inkreible, madres i padres abandonaron sus kreaturas a sus sortes, solas, sin abrigarlas, sin kudyarlas, si komo eran ajenas…
El enigmo de la propagasion de la epidemia insito ainda mas el puevlo de evitar todo modo de kontakto kon los hazinos. Kazas i butikas fueron abandonadas. En siertas sivdades fueron fraguados batimientos para abrigarlos fina ke se mueren. Los ke pudieron permetersen, se fuyeron a los kampos. Los moribondos kedaron solos en las kayes, i los muertos fueron enterrados en fosas anchas. La mano de ovra seando desimada, uzinas i farmas fueron abandonadas i los edifisios empesaron a desagregarsen. Munchos fuyeron para eskaparsen de la epidemia, portanto toparon en su lugar, la muerte en la provedad i el ambre.
Otros se arastaron en una vida de libertinaje vulgaro para selebrar sus salvasion de la muerte. Se adonaron a pransos de glutonoria, bevianda, djugo, vistiendosen de una manera ekstravagante. La djente sintiendose pedrida avia abandonado sus propriedad. I el kenkere entrava libramente en las kazas ke no eran suyas para komportarsen asigun les plaziya.
Los fuegos fueron un metodo popular para aleshar las fedorinas. Los kadavres fueron kemados en las puntas de las kalejas. Fue de uzo de kemar maredos aromatikos i otras substansias komo rozmarin, ambar, misk i flores fragrantes. Siertos velaron las ventanas mirando al Sude para empidir la kontaminasion por el ayre del Sude, en avriendo las ventanas mirando al Norte.
Konsejaron a la djente de no durmir durante el diya i no lavorar duro ,de no komer karne i igos, i evitar aktividades ke pueden avrir los poros del puerpo, inkluido benyar, azer egzersizos i intimidad fizika. Munchos traktos medievales tratan de las prekosiones para evitar la malatia. Entre estos, rekomendasiones estranyas komo no durmir durante el dia i evitar penserios sovre las hazinuras i la muerte.
Portanto, muy poko se save sovre las maneras ke los medikos uzaron para kurarla. Probablamente, ke kreiyan ke no avia nada de azer. El metodo lo mas uzado fue de sangreteyar el puerpo para ke el tosigo salga, i savemos ke siertos aprovaron de insizar los bubones i de drenarlos.
La Edad Media fue una epoka akablada por el fanatismo relijioso, la inyorensa i la superstision. Dunke, una semejante plaga non konosida, fue konsevida de una manera distortada. La razon la mas reverada era ke Dio la avia eskojido para kastigar la umanidad. Uvo mizmo siertos ke la konsideraron entanto ke el prekursor del Apokalipso.
Otros atribuaron la katastrofa a enkontros astrolojikos; otros la konsideraron komo una vijita divina. El Papa Clemente VI, la vido komo «un kastigo del Dio al puevlo kristiano».
Kuala puedia ser la razon de la birra del Dio? Siertos la atribueron a la korupsion de la Eglisia. Otros disheron ke fue el rezultado del shizmo ke egzistia en la Evropa kristiana. En fakto, la Ingleterria i la Fransia estavan luchando una gerra de 100 anios. La Alamania i la Italia kon los estados papales de Napoli i de la Sisilia se estavan kuerellando konstantamente, en teniendo rekorso a masakros, rovos i sakamientos.
Otros pensaron ke la plaga era el kastigo por no aver kumplido la tarea de los Kruzados fin’a su fin en la eksterminasion de los muslumanos i sus ekspulsion de la Tierra Santa.
Una mayoria de los ke sovrebivieron la era de la epidemia, sufrieron de una kriza de fey. Al lugar de devenir mas relijiozos en engrasiando el Dio por averlos eskapado de la muerte, developaron duvdos. Varios movimientos eretikos muevos surjisaron. Akeos ke ainda eran fideles en sus fey, preferaron de eksprimirsen de una manera diskreta en fraguando kapellas privadas.
La Ermanedad de los Flajelantes ka avia aparesido de antes en Evropa, se arebivio en la Alamania verso la fin del ayo 1348. Kreyendo ke la Muerte Preta era el kastigo del Dio, los flajelantes kijeron kalmar la sanya del Dio en kaminando deskalsos, aharvandosen kon latigos o varas kon kolas puntudas. La djentoria se arekojia para ver estos rituales, i partisipava a esta seremonia en orasionando i kantando imnos.
El puevlo reajiso por dos ekstremos: bushkando piadad en la relijion atraverso la arepentision i el kastigo, o la reversion al libertinaje, delinkuensa i el salvajismo.
El konsepto de la muerte kontinuo a ser iminante, en manifestandose en el Bayle Makabro, bayle alegoriko sovre la muerte, ke fue integrado entanto ke un estilo de arte, a la drama, la poezia, la muzika i a los artes vizuales.
La mayoria del puevlo fue inklinada a konsiderar la plaga komo una infirmidad kavzada artifisialamente i empeso a bushkar sus responsables. La populasion kristiana de la Evropa en la Edad Media, ke era profundamente imprenyada de la retorika anti-djudia de la Eglisia, fue fasilamente reseptiva a la idea ke los djudios eran los kulpables. Andemas, ya avian sido blamados durante jenerasiones de ser la inkarnasion del Diavlo i de aver asasinado el Kristo, de mizmo ke del krimen ritual, la profanasion de la ostia, la intosegasion de los pozos, de meprizar la fey kristiana i de praktikar aktos sekuales pervertos.
Kon la erupsion de la epidemia, los djudios fueron akuzados de averla provokada, en entosegando los pozos, los korientes de agua, el ayre i los alimentos. En este konteksto, surjiso la idea ke los kristianos no devian permeter a los djudios de bivir entre eyos i, arivaron a la konkluzion ke para salvarsen de la epidemia devian de konvertirlos, o egzilarlos, o destruirlos. En konsekuensia, los djudios fueron kasados en las plasas i las sinagogas, torturados asta ke konfesen, i entre 1348 i 1351, fueron kemados en masas.
Agimet fue el primer djudio ke fue torturado para ke konfese la komplisidad de los djudios en la diseminasion de la Pesta Negra. Esto akontesio en 1348, en el Kastilio de Chillon en la Laka Leman en Suisa. Agimet fue forsado de akseptar ke konformandose al orden de un sierto rabino nomado Peyret, avia repandido el polvo del tosigo de la bolsa, ke Peyret le avia entregado, en las fuentes de agua de Venezia, Toulouse i otras sivdades.
En segito, la novedad ke los djudios avian entosigado los pozos se ekstendio komo una flama de paja arebivida por una atmosfera de rankor. Los djudios fueron masakrados, mizmo en lugares ande la plaga ainda no los avia vijitado.
Sienes de komunidades djudios fueron destruidas, partikularmante en la Peninsula Iberika i en la Alamania. En Toulon, 40 djudios fueron kemados en 1348, i en segito, las komunidades de Mainz, Kolonya i Strasbourg fueron eksterminados. Fina 1351, 60 grandes i 150 chikas komunidades djudias desparesieron. Entre 1349 i 1390, las komunidades djudias de Fransia, Alamania i Ingleteria kedaron kuaji de egzistir. De los mas de 19.000 djudios ke bivian en Frankfurt, avian apenas kedado 10 djudios en 1400. Semejante fue la suerte de munchas otras komunidades de la Evropa. En 1353, solo unos kuantos djudios bivian en la Alamania i los Payizes Bashos.
La migrasion masiva verso el Este kavzo la redistribusion de la populasion djudia de la Evropa. Djudios de la Evropa Oksidentala i Sentrala se reskaparon verso el Este i prinsipalmente a la Polonia, ke kuaji no fue tokada por la epidemia. I, de este modo su populasion djudia pujo. Aunke, kon el tiempo, los djudios aboltaron al Oeste, el briyo de sus sentros djudios no se renovelo durante kuatro siglos.
La Muerte Preta reprezenta una epizoda ke bulverso la Evropa Medievala. Emerjo en el Sude i kuando yego a la Ingleteria ya avia konsumado la vida de miliones de viktimas. Inkapache de konoser las kavzas de la plaga, la povlasion kristiana en grande parte akablada por la inyorensia, asumo ke fue la manifestasion del sanyo del Dio. El dezespero no solo alesho la djente de la mutualidad, si no ke provoko la repulsion, el aiso i el abandono. Aparte de los djudios, otras minoridades komo los musulumanes, ichizeros, estranjeros, sedakeros i leprozos, fueron tanbien persekutidos.
Las sirkonstensias de la Muerte Preta kon sus konsekuensas tuvieron un efekto dramatiko i durable ke markaron la orientasion de la Evropa, en trokando su estruktura sosiala, en ruinando la Fey en el Kristianismo i en kreando una kriza espirituala. Kriza ke kontribuo a la emerjensia del Renasimiento i de la Reforma, ke deklansharon el Mundo Moderno.
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
