eSefarad Noticias del Mundo Sefaradi
El Bayle Funesto de Salome
Salome es famoza por su bayle impresionante ke le avia akordado de obtenir la kavesa de Yohanan el Baptisto. Esto avia afitado, en el empesijo de la Era Komuna, en el tiempo de la dominasyon de Roma, kuando Antipas era el governor de la Galilea en Palestina.
El bayle de Salome avia tan agradado al governor ke le avia prometido de darle todo lo ke demandara. I Salome avia demandado la kavesa de Yohanan en un plato.
Este evenemento parese bastante estranyo. Para pueder aklararlo, devemos de elaborar los aspektos de su konteksto politiko, sosyal i espiritual.
Salome era la ija de Herodias de su primer kazamiento kon el ermano de Antipas. Despues Herodias se avia kazado kon Antipas.
Yohanan el Baptisto era el primo del Kristo. Fue konsiderado komo una persona santa i arekojo a su lado a munchos partizanes.
Yohanan avia publikamente kondanado el komportamiento de Antipas, ke avia kalifiado de insesto i de adultario. Por esto fue aboresido por Herodias i fue arestado i emprizonado. Portanto, Antipas saviendo ke Yohanan era respektado por el puevlo, no se avia aprestado de konvenirse a la demanda de Herodias de matarlo.
Afito ke Antipas organizo un pranso a la onor de su aniversaryo, i asigun el uzo del Imperyo Romano invito a esta fiesta a las personas altas de su payis. Durante este pranso, Salome performo el bayle de los syete shales, ke plazio enormamente a Antipas. Ansi se adreso a Salome:
«Demandame todo lo ke tu alma dezea, i te lo vo darte…»
Salome despues de konsultar su madre, le respondyo:
«Kero ke en este momento ke me traygas en un plato la kavesa de Yohanan«.
El governor fue perpleksado. Portanto, no puediendo renegar su promeso ke avia deklarado delantre de sus invitados, embiyo a un egzekutor ordenandole de trayer la kavesa de Yohanan en un plato. Despues ke su orden fue egzekutido, dyo la kavesa de Yohanan a Salome, i Salome la ofresio a su madre.
Es i muy posible ke Yohanan fue egzekutido no solo en segito de la demanda de Salome, ma porke avia provokado una ajitasyon entre el puevlo i esto puedia yevar a un revolto kontra Antipas.
Herodias avia abandonado su primer marido sin su konsentimiento. Kunando Antipas avia vijitado la sivdad de Roma, se avia enamorado de Herodias, i la avia invitado a la Palestina. De mizmo, Antipas se avia desidado de kazarse kon eya sin avizar a su mujer. Esto todo era kontrario a la Ley Djudiya, i una razon bastante para revoltar los partizanes de la ortodoksia relijyoza.
De otra parte, Antipas era kazado kon Fazelis, la ija de Aretas, el Rey de Patra. Kuando Herodias arivo a la Palestina, egzijo de Antipas de divorsarse de Fazelis antes de kazarse kon el.
En segito, un konflikto viejo Antipas i Fazelis sovre la frontiera fue uzado komo el preteksto de un kombate entre sus armadas, en elkual la armada de Antipas fue kompletamente destruida.
La derota de la armada de Antipas fue interpretado por el puevlo en tanto ke el kastigo selesto de Antipas por aver matado a Yohanan.
Maz despues, Antipas fue akuzado de komplotar una gerra kontra el Imperyo de Roma kon el ayudo de la Parthia. Kuando Antipas arivo a Roma para konvinsir al Imperor ke esta akuzasion era falsa, fue destituado de su poder i fue egzilado a la Espanya, ande fue segido por Herodias.
* * *
Salome es konsiderada en la kategoria de las mujeres de la Biblia, ke kon sus sensualidad avian influensado el kurso de la istorya. Apartenia de la parte de su madre a la desendensia de los Makabeos. Por esto aziya parte de la noblesa reala. Era una muchacha kuando avia baylado en el festino de Antipas, ma su edad egzakta en akel momento no se save.
Salome fue deskrita en tanto ke una putana, un monstre o en tanto ke la viktima de las sirkonstensias. Su komportamiento fue, sin duvdo, el rezultado de un environamiento korrupto i ebranlado kon una kriza espirituala.
Yohanan avia proklamado ke la Fin de los Diyas se avia aserkado i ke el Mashiah estava para vinir. Syertas personas eran mizmo konvensidas ke el mizmo era el Mashiah. Avia baptizado el Kristo, i por esto, es konosido en tanto ke «el Baptisto«.
Kuando sus disiplos supieron ke Yohanan fue matado, avian tomado su kadavro i lo avian enterrado. Se save ke un sekto relijiozo yamado a su nombre kontinuo a egzistir tambien despues de su muerte.
———————–
Kon este artikolo eskapamos la seria de «Estorias de los tiempos biblikos», kontunuaremos la seksion kada semana kon otros eskritos…
———————–
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
