La kompra del supermerkado por Rosina Karako Smeraldi

 
Kuando yo me vo para azer la kompra (empleyo), antes de salir de kaza lo eskrivo todo lo ke tengo de menester (ago mi empleyo 3 vezes en la semana).
Ma siempre vengo a kaza kon kozas ke no lo teniya en mi lista. Otras vezes
me olvido kozas por no averlo eskrito.

A mi me plaze «HUMUS» ke es garvanzos molinados, kon ajo, azete i espesias o yervas. Mi ijo me konsejo de azerlo yo en kaza ke me va kostar mas barato y yo le dishe ke a mi me plaze mesklado kon TAHINI,ke es pure de susam (sesame seeds), «i esto lo topas agora en el supermarket ke los dos mos vamos,» me disho.
 
Yo no lo eskrivi en mi lista de kompra, bazandome ke me lo vo akodrar de merkar tahina.

Vengo a kaza i metyendo las kozas a su lugar vide ke merki 2 kutis de HUMUS, uno dize original i el otro al uzo grego. ¡¡¡¡Ma yo no iva a merkar HUMUS !!!!, ya tengo los garvanzos gizados pronto para molinarlos.
¡Es ke iva a merkarme Tahina!

Me dishe entre mi «esto me kosto la del pato». ¿Porke diziyamos ansina kuando una koza era karo?

Mi marido ayudandome a meter kozas en la frigider me dize «¿ke es esto ke te merkates…? ¿GAGUSH…?»

No, le dishe es BABAGANUSH…oyi ke es savroso kero ver lo ke es… al pareser ke es komida libanesa o de siria, no se, lo aprovare (i esto no estava en mi lista!!!!!!!!)
 
Tomi un pironiko i la savor es de berenjena asada i echo pure komo konosemos el «patlichan kebabi» en Turkiya. Miri a lo kontenido, dize ke ay guevos, azete i otras mesklas.
 
De ayi le konti a mi marido komo gizavamos este vegetal en Estanbol, lo ke me plaziya a mi era la pipirushkas (green pepper) asadas, i inchidas kon la berenjena asada echa pure kon guevos i kezo blanko, i dospues papeyado a poka lumbre.
 
Kuando mi marido gosto este «babaganush»me dize… «yo komo lo ke me ambezi ke se yama «kaponata» (el es desendiente de Sicilianos) ke es berenjenas kortadas muy chikos pedasos, gizado kon domat, sevoya ,jo i yervas…..»

¡¡I esto mozotros lo yamamos «kuartikos de merenjena» !!,  le dishe.

Estas todas rechetas de ande keren ke vengan… komo keren ke se yamen son todas de las mismas rayizes

Rosina
de Florida