La istoria de Aaron Leja por Nissim Ashkenazi

Karos todos

Ya pasaron anyos de akea epoka kruela del holokosto, i dainda sintimos konsejas i istorias de akel tiempo, ke te dan emosion, pena sufriensa, i dolor. antes de la gerra segunda mondiala, se topo en la komunidad djudia en Salonik, un mansevo, Aaron, i una manseva, Mari, ke eran amigos de alma i korason, grande amor, i klaro ke los penserios eran de kazarsen i fraguar famiya en el avenir. Eran orozos, i se enkontravan kon alegria, i se engrandesieron kon amor i amista. Ama el destino penso de manera diferente.

Aaron era kapache en sus lavoros i Mari era shastra talentoza i reushida. Todos la amavan i eya ayudo a todos kon su ofisio, en kuziendo i adovando las vistimientas. Kuzio afilú velas fronias i savanas. Ya tokava la ropa, ya savia kualo fazer, talento ke aresivio de los sielos.

Una famiya Grega, rika, sintio sovre Mari, la envitaron ke sea la shastra de famiya, onde ke avia siempre lavor de shastra. Las tadres se enkontrava kon Aaron i pensavan kon dolsura sovre el avenir. Ama la gerra empeso, i trusho sar a las almas. Los Alemanes entraron a Salonik, arekojeron a todos los ombres djudyos en la plasa de la Patriya. Los arebasharon i los mandaron a Aushvits Birkenao, a los kampos de la muerte.

19 tranportes kon vagones de animales yevaron la komunida entera de los djudyos de Salonik a los kampos de konsentrasion i en tiempo kurto ya estavan kemados. Muchos djudios rezios se puediyan salvar en korer, fuir, o eskonder, ama el ayre i el respekto  no desho abandonar a la famiya, se kedaron kon los parientes asta la muerte.

Aaron fue tomado i arrivo kon los trenos pretos, a Aushvits. La famiya Grega, vido ke Mari esta en perikolo, i la eskudieron. Mari se salvo i se kedo en la famiya Grega.

Aaron kon mucha sufriensa paso el gehinam de los kampos, flako, palido, hazino i flosho, sin esperansa, i sin saver kualo fazer, kaminando i bushkando en la Evropa. Un diya enkontro un Selanikli ke le konto ke todos de Salonik fueron matados i kemados, este haber lo fizo a Aaron medio muerto. Paso tiempo i Aaron suvio a Israel i fizo esforsos para kontinuar la vida. Estava desasperado i sin esperansa.

Un diya, en kaminando en la kaledja Levinski en Tel -Aviv, se enkontro kon un Selanikli konosido ke le konto ke la vieron a Mari en Salonik de atras de la gerra. Este haber le trusho un shok de enerdjiya, se fizo komo un arvole seko ke le vino agua. Se enrezio i desidio a irse a Salonik i bushkar su amor.

Aaron arrivo en Salonik i empeso a bushkar a Mari. La famiya Grega ke salvo a Mari, troko kaza, i Aaron bushko information sovre el adreso muevo, topo el adreso, i kon piezas tetereando, apreto el suneri de la puerta, la puerta se avrio, i Aaron estava en frente de su amor Mari. El abraso i las lagrimas de alegriya amostran la sufriensa i dolor ke pasaron los dos, sin ke tengan ninguna kulpa, solo ke son djudios. La famiya Grega vido ke dos luses amatadas, empesaron arelumbrar de muevo.

Aaron i Mari suvieron a Israel rapidamente, se kazaron i se unaron kon Redjina, la ermana de Mari ke bivio en Israel kon su marido Avram Levi. Mari i Aaron trusheron al mundo dos ijas i un ijo.

El ijo es Yosi Leja, uno de los djugadores famozos de basketbol en Israel, en el ekipo de Makabi Tell-aviv. Mari i Aaron son el simbolo de djente fuerte, ke salieron de la siniza i trokaron el destino, fraguaron kaza en Israel i enreziaron la dicha. Am Israel Hai !!!

Mari i Aaron ya desharon la vida buena, ama mos amostraron ke devemos estar siempre kon esperansa, afilu en tiempos pretos i eskuros ke pasaron los djudios. Sus almas ke topen repozo en Gan -Eden.

Kon amista.