eSefarad Noticias del Mundo Sefaradi
En asendyendo la hanukiya mos rendemos kuento ke istorikamente i aktualmente, los djudyos fueron i somos siempre vensedores de la malisya, de la inimista i de los ke kijeron i keren matarmos. Miles de anyos noche de Hanuka aboltamos muestra kare verso Yerushalayim i kantamos los biervos del ‘Maoz Tzur’ kuando las kandelas ampesan a iluminarsen, lo ke dyo i dará siempre la fuersa i la defiansa en mozotros. Kada kandela ke asendemos es una deklarasyon ke nunka vamos aser intimidados.
A esta okazyon Israel entero i mizmo una grande mayoriya de los umanos del oksidente deklararon la semana pasada ke están ombro kon ombro kon los ermanos i ermanas de la komunidad de la Australia en estos momentos terrivles onde fueron matados por un padre i un ijo de orijen pakistaneza. 15 de sus miembros, una kreatura, munchos mansevos i un ayedado eskapado de la Shoa. Eyos fueron masakrados solo porke eran djudyos i ke en el bodre de mar de Bondi en Sydney estavan djuntos kon miembros de la komunidad, nombrozos a asender la primera kandela de Hanuka.
Esta matansina del terror djihadisto en Desembre 15 de 2025 va kedar komo un símbolo de krueldad en la istorya umana. Eya no fue solo un insidente antisemitiko no kontrolado, ma una operasyon militara profesyonalmente endjenyada de muncho tiempo antes, komo parte del djihadizmo en su lucha mundial kontra los infideles. Todos los kontinentes oksidentales i la Australia son menasados, para todo modo de djudyo o kristiano.
Planifikar una operasyon semejante demanda tiempo i rekursos ke no serán posivles sin asistensya direkta o en indirekta de la otoridad Australyana la kuala permetyo a ke se dezvelope una infrastrukturya del islamizmo radikal. Ansina se kreyo un derredor de demonizasyon de Israel i de los djudyos ke egziste dainda en las sivdades de este payiz. Esto fue una buena okazyon a kantes tal komo “gazaldos a los djudyos” o “dezde del rio asta la mar” para deklarar ke se deve eksterminar todos los djudyos de Israel. Ademas esto mostra komo la Intifada se esta globalizando en aksyon jeneral en un djihad kontra los djudyos en el mundo. Oy en dia todas las komunidades djudiyas del mundo están debasho de esta menaza. Porke esta globalizasyon de la intifada kere dizir aviertamente ke kale kasar a todos los djudyos. No kale entenderlo komo un movimiento de protesto o de rezistensya ma un djihad para matar, terrorizar i detruyir todo lo ke es djudyo. Eya no tuvo i no tiene nada de tener kon el establesimiento de un estado palestiniano, el kual lo refuzo en 1948, en 1967, en 2001 i dainda oy en diya.
Komo el aktual primer ministro de la Australia Anthony Albanese i sus omologos evropeos rekonosyendo al estado Palestiniano durante la gerra entre Israel i el Hamas en Gaza, no se rendieron kuento ke esta rekonosensia lavorara kontra sus payizes i ke estan azyendo un yerro fatal para el furuto del mundo libero. Ademas no kijeron kon sus rekonosensyas del estado palestiniano entender ke los djudyos son los primeros a ser eksterminados i ke sus tornos viendran despues, los djihadistos keryendo matar a todos los infideles de la tyerra. No olvidar el famozo slogan de los djihadistos “en primero el puevlo de shabat i despues el puevlo de alhad”.
Basta de ver los lugares en las grandes sivdades evropeas tal Londra, Paris, Amsterdam, Berlin i mas onde la Sharia reyna, en la Afrika onde miles de kristyanos son matados por las bandas terroristas djihadistas i ansi a entender kuala es la ideolojiya de los Ermanos Muzulmanos ke mira en primero de konvenser a ke los infideles se konvertan al islam o sinon sean matados de vista. Esto prova ke un lugar aktual ke no es seguro para el djudyo no sera seguro para djente sivilizada kristyana. Estos ke kantan en el oksidente “viva la intifada” tal los miembros de los partidos de la ‘Siedra’, los akademisyenes, los politikos i la elit espyerta de la medya son los “tontos útiles” de los islamistos kon los kualos son unidos kontra un komun inimigo ‘las valores fundemantalas de la demokrasiya liberal’.
Enfin vino el momento despues de todo lo ke se eskrivyo aki ariva de demandar a Anthony Albanese el primer ministro a ke troke su diskorso i ke diga a su puevlo justo siete biervos –‘La Australia esta en gerra kon el djihadizmo’- i ke adjuste un ‘pardon’ a la uma djudiya de su payiz i a la del mundo.
Dr. Selim Salti
