eSefarad Noticias del Mundo Sefaradi
Me parese ke muestro foro de Ladinokomunita ya trespaso de kuando el limito de unos kuantos miles de lektores interesados en la kultura i la lengua de los sefaradim.
Ayer me telefono uno de la famiya Chelouche, (aun ke no mos konosemos personalmente), i me pregunto a saver si alguno de los miembros de LK savra koza sovre el orijin sefaradi de su famiya, ke bivio en la sivdad de Uran (en Aljiria) desde muchos siglos, i talvez fue esto despues de la ekspulsion de los Judios de Espania (o de Portugal).
La famiya Chelouche es muy konosida en Israel, i pronunsiada komo «Shlush».
En 1838 organizo Avraam Shlush, el rabino de Uran, un grupo de 150 Judios para venir kon un vapor (galeon) a Erets Yisrael, i bivir aki una vida produktiva. Despues de muchas penas se instalaron en la sivdad de Yafo, ke en akeos tiempos la mayoria de sus abitantes eran arabos.
En esta chika komunidad Judia lo topamos tambien a Rabi Yehuda Levi de Raguza (Dubrovnik), ke servio komo el rabino i el lider de la esta komunidad.
Mientras ke estaremos bushkando alguna posibilidad del orijin sefaradi de la famiya Shlush, vos ago saver ke Hana, una de las ijas de Avraam Shlush, se kazo kon Alter Luria, un mansevo ashkenazi de Safed (nasido en 1837).
Los de Luria son desendientes del kabbalista muy famozo Rabi Yitzhak Luria de Safed (1534-1572), ke su madre era sefaradita, de la famiya Franses.
Sesenta anyos despues del kazamiento miksto de las famiyas Luria i Shlush, uvo otro un kazamiento, (en 1918, durante la gerra mondiala), entre Yeshayahu Luria i Sultana Shlush, la nieta de Avraam Shlush.
Muchos detalyos mas ay, por seguro, en el livro (en ebreo) «Los Judyos del oriente en Erets Yisrael», eskrito por el istoriador Moshe David Gaon, (ke ayinda esto yo en bushkeda para merkarlo)…
En los anyos 1881-1882, pasaron muchos pogromes sovre la kavesa de los Judyos en Rusia i Polonia, tambien en 1903 okurio un pogrom muy brutal kontra los Judyos de Kishinev.
El poeta Hayim N. Bialik eskrivio su poema (en ebreo) «La sivdad del masakro», ke estremesio a todo el mundo Judyo.
En Salonik, i en otras partes del imperio otomano izieron kolektas para ayudar a los sovrebivientes i refujiados.
Ayinda me sona en mis oyidos la triste melodia de una elejia en djudeo-espanyol, ke mi madre kantava en dias ennuvlados; ma no me akodro mas de una chika estrofa:
Las montanias de nieve
ya estan koreladas
de la sangre de los Jidios,
de los Jidios matados;
esto es en Polonia,
esto es en Rusia,
i en todos los paezes
ande bive Yisrael.
I en todos los paezes
ande bive Yisrael.
Muchos filantropos se «arremangaron» a dar ayuda a los refujiados, ma, mas de todos fue el Baron Maurice Hirsch el ke dyo mano.
Aparte de sus kompras de tierras en Ardjentina para instalar ayi
djudyos, el merko tambien en la izla de Kipros una azienda grande (30000 dunames) serka de Nikosia. La idea (o, si keresh, la vision) del Baron fue de fondar una kolonia de agrikultores djidyos en la izla.
» Ya ke el imperio otomano no permetiya kolay la imigrasion de djidyos a Palestina, ma kon el tiempo (ansi pensava i esperava el Baron Hirsch), el sultan se rekonsiliara, i los kolonizadores de Kipros pasaran a bivir en Erets Yisrael, ke es un pais serkano a Kipros (de punta de vista jeografika i klimatika)».
Es muy kuryozo, ke muy pokos refujiados de los pogromes profitaron la okazion de instalarsen en Kipros, en la azienda «Margo» ke fondo el Baron, kuidando mahsus para eyos. No menos kuryozo es el fato ke a esta azienda vinieron a bivir unos kuantos de las famiyas de Shlush i Luria de…Erets Yisrael!!
Primera vino Behora Luria, la nieta de Avraam Shlush, kon su marido David Shaul. Despues vino i Marko (Mordehay) Luria, el ermano de Behora, i despues de tiempo vinieron i las ermanas Rachel i Roza. Estas dos ermans ke eran maestras en una de las eskolas en el Galil, tambien ayudavan voluntariamente a la organizasion sekreta,(yamada «Nili»), en dando haberes i informasiones sovre los pasos i kaminos de la armada otomana en el norte del paiz. Kuando se asaventaron los turkos de sus okupasion sekreta, fuyeron las dos ermanas, i se adjuntaron a los abitantes de «Margo» en la izla de Kipros.
Aki, en la kaza de la famiyas Luria i Shlush kontinuava la aktividad de eshpionaje en favor de los inglezes.
La komunidad Judia en la izla de Kipros kontava kaje 30 famiyas, i durante los anyos, otros miembros de las famiyas Shlush i Luria se arresentaron en la azienda de «Margo», i todos se mantenian muy bueno, aparte de Behora, ke se enbivdo en 1926 de su marido David Shaul, i paso a bivir kon sus ijos en una otra koloniya del Baron Hirsch (en la Provinsia de Entre Rios en Ardjentina).
Despues de la gerra de 1948 tornaron muchos de los miembros de esta famiya a bivir en Israel.
En el tiempo de la gerra mondiala II, (en 1941), los alemanes konkistaron la izla de Creta. Entonses, los inglezes desidieron (por razones de preokupasion) de evakuar a todos los djudyos de la izla de Kipros.
Lo mas de los abitantes fueron egziliados a varios paizes en Afrika, i en otras partes del mundo. Naturalmente, los de las famiyas Shlush i Luria fueron tornados a Erets Yisrael, i aki kontinuaron ser agrikultores. El ganado (revanyo) grande de la azienda se vendyo a un ombre de negosios de leche, ke fondo ayi una lecheriya grande.
Los ke moran en Israel se akodraran por seguro de la butika lejendaria de Aroniko en Tel Aviv ande se vendiya el ekselente «kezo de Kipros», ke ya no egziste mas. Agora lo konosemos aki -en varyas kalidades- komo «kezo bulgaro».
Oy, de la azienda de Margo no kedaron mas ke las ruinas de las kazas, i tambien el semeterio (ke esta en la rejion turka de la izla).
Me kontan ke un solo desendiente de la famiya Chelouche (Shlush) torno a bivir en Kipros, i es patron de verjel de pertukales.
…Una de las istorias de el Judio errante.
Yehuda Hatsvi
Erets Yisrael
Fuente: Ladinokomunita
