eSefarad Noticias del Mundo Sefaradi
En esta mueva seksion «En vista de Rachel», Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
En Ladinokomunita (muestro foro en djudio-espanyol), lunes el 15 Febrero, 2010, Sarah Bejerano Ashkenazi de Israel mos mando un mesaje avizandomos de la muerte de Ovadia Baruch, orijinario de Salonik, eskapado
de Auschwitz, i mos dio un kurto resumen de su vida.
Vos kopyo aki lo ke eskrivyo Sara, i despues vo adjustar mis sentimientos i reaksiones sovre esto:
«Dia de viernes pasado, desho la vida un reskapado de la SHOA Ovadia Baruch, su alma ke repoze en gan eden. Su istoria personal arranko korasones. El era reskapado de la SOHA, de Salonik.
En MARSO 1943 Ovadia Baruch se arranko de su kaza kon toda grande famiya a AUSCHVIZ. A toda la famiya los mandaron los Nazistas a los krematorios, anel lo mandaron a lavorar lavoro forsado.
En Auschviz es ke enkontro a su mujer Aliza z»l, ke era tambien de Salonik . los dos se namoraron.
Aliza paso eksperiementos satanikos en blok 10, ma el doktor djidio Samuel le disho «Si te vas salvarte de aki, a mi me vas a nombrar. Un dia me vas a entender». (Eya lo yamo Satan por kavzo de todas operasiones i esksperimentos dolientes ke izo basho los ordenes del Dr. Mengele).
Despues de la gerra se enkontraron Aliza i Ovadia en Salonik. Ovdia Baruch demando kazar, ma Aliza refuzo: «No vamos tener fijos por kavza de las operasiones de Mengale». Ma el insistio, i se kazaron, les nasyeron un fijo i una fija, sinko nyetos i kuatro biznyetos. Parese ke akel doktor djidio parvino «falsar la operasion sin ke se deskuvra……»
Aliza i Ovadia Baruch se dedikaron a presevar la memorya de la SHOA , 40 vezes salyo Baruch a Auschvitz para kontar lo ke paso, eskrivyo
un livro kon el nombre «O MADRE» .
Antes dos anyos le izyeron un filmo kontando su pasado.
Ovadia Baruch , de bendicha memotia , muryo a la edad de 88 anyos.
Sarah Bejerano Ashkenazi
de la famiya Haguel Bueno
ISRAEL»
Me sinti muy agradesida a Sarah por avermos eskrito esto. Yo no konosia el nombre del Sr. Ovadia Baruch, ma me akodri ke poko antes avia meldado esta estorya en un lugar. Devista me fui a bushkar en el Internet a ver mas kualo fue dokumentado por el.
I ya topi deke la estorya me avia venido konosida. En el sitio del diario Haaretz de Israel, en el 29 Enero de 2010, se avia publikado el teksto del deskorso del Dr. Ahmed Tibi, miembro arabe del Knesset en Israel, a esta asemblia, adresandose a su presidente, a la okazion del dia internasional del Holokosto. Ayi el Dr. Tibi, despues de nombrar el Holokosto (la Shoa) «una industria de muerte, nasida de una ideolojia de aborresimiento, rasizmo, i limpieza etnika», disho, en parte:
«…yo esto en empatia kompleta kon las famiyas de las viktimas del Holokosto ande se toparan en el mundo, inkluyendo los ke biven en la mizma tierra, el mizmo pais, ke yo. En este momento deve kada persona … deve vistirse solamente el vistido de umanidad…»
Kontinuando , el Dr. Tibi adjusto la estorya de Ovadia Baruch:
«La liberasion del kampo de ekterminasion Auschwitz fue una viktoria para Ovadia. Vos kontare la estorya de Ovadia, el protagonisto del filmo «Yehi Zichrech Ahava» (seras akodrada kon amor).
Ovadia Baruch i su mujer Aliza Tzarfati eran de orijin de la sivdad de Saloniki. El 11 djulio, 1942, el dia konosido komo «Shabat preto,» kuando 6,500 ombres djudios fueron ordenados a asemlarsen en la Plaza de Liberta, i ayi fueron abuzados i arrebashados i despues yevados a kazales leshanos para lavoro forsado. En el 15 Marso 1943 se realizo la primera ekspulsion de los djudios de Salonik a Auschwitz. Los djudios de Salonik ….fueron ovligados de pagar de sus propios fondos el bilyeto de treno a Auschwitz…
Ovadia estava entre eyos…»
I sigye en kontando la estorya de Ovadia, mas o menos komo mos la konto Sarah Bejerano Ashkenazi en LK, kon un poko mas detalyos, bazandose en el filmo. (El teksto kompleto del deskorso del Dr. Tibi lo podesh topar, en inglez, en: http://www.haaretz.com/hasen/spages/1146180.html )
En el Internet topi tambien una mostra chika del filmo dokumentaryo (47 minutos, echo en 2008) ke mensiono el M.K. Tibi:
http://wejew.com/media/6253/May_Your_Memory_Be_Love_Story/
Ay tambien otro kurto, ande lo vemos al Sr. Ovadia kontando su estoria (en ebreo kon sutitolos en inglez):
Grasias al Dio por estos filmos, ke van a kedar komo un testimonio mas de los pokos sefaradim ke pudieron salvar de los kampos de muerte, i de los munchos miles ke se deperdieron ayi.
La estorya de los de Baruch esta inkluida en dos livros, tambien. El uno es en ebreo, del Dr. Shemuel Refael (el titolo, en traduksion, es: «El kamino al inferno: djudios gregos en el Holokosto» – Yerushalayim, 1988) ande el tiene sus entrevistas kon munchos reskapados de la Gresia en Israel, i el otro es «Greece–a Jewish history» (Gresia — una istoria djudia) de K. E. i K. E. Fleming, ande las entrevistas del livro del Dr. Refael estan sitadas.
Asta agora miles de livros i sienes de miles de artikolos ya fueron eskritos sovre la Shoa. Ma ¿kuantos tratan de la eksperiensa de los sefaradim, de la destruksion de las komunidades sefaradis? Muy pokos. Verdad ke el porsentaje de sefaradim es chiko adientro de los 6 milyones djudios ke fueron asasinados. Ma esto no desmengua la emportansia del asasinato de personas sefaradis, i kon eyos de la lingua i kultura djudia-espanyola en la Shoa.
No mos olvidaremos ke aparte de la dezgrasiada destruksion en Gresia, miles de sefaradim biviendo en paizes evropeos murieron en los mezmos kampos de muerte. El lavoro difisil de dokumentar estos se esta aziendo agora por una komite en Paris.
Kreygo ke es muy emportante ke kada Sefaradi sepa la istoria de los Sefaradim en la Shoa, kon kuantos detalios posible, i de dar esto a konoser a otros tambien, porke munchos tienen la empresion ke los solos ke sufrieron fueron los ashkenazis de Evropa.
Kuanto a Sarah Bejerano Ashkenazi, eya es sin duda una ke kreye lo mezmo.
Eya me konta: «…yo so fija de reskapados de la SHOA de Saloniki, en mi chikes, mis djenitores no avlaron sovre los malos ke pasaron, En kavza, del dia ke mis paryentes se muryeron me esto dedikando a preservar la memorya de la SOHA de los djdyos de Gresya.»
En estos mezes se avla, se eskrive muncho.
Rachel Amado Bortnick
Dallas, Texas
Felicito a este boletin semanal sobre la recopilación de hechos como el relatados en este artículo. Es una forma de conocer sucesos acaecidos bajo el régimen nazi y que sufrieron los griegos judios, especialmente los de Salónica. Gracias por tan buenos artículos.
Yo estuve en el Museo del Holocausto y me senti hororizada de la crueldad que puede INSPIRARA satanas en los seres humanos en contra de otros humanos.
Pero NO debemos decir:» LO QUE NO ES CONMIGO NO ME AFECTA». Debemos tener amor para nuestros projimos y , projimos somos todos,
TODA LA HUMANIDAD QUE SUFRE necesita ayuda. En muchos países se tiran alimentos al mar, se entierran para mantener los balances del mercado mientras otras naciones se mueren de hambre. TAMBIEN,NO DEBEMOS APOYAR LAS GUERRAS.
DEBEMOS PEDIR APOYO Y CREATIVIDAD A LOS DIRIGENTES DE LAS NACIONES AFRICANAS, AMERICANAS, ASIATICAS Y DE EUROPA ORIENTAL QUE ESTAN SIENDO DESTRUIDAS LENTAMENTE POR GRUPOS QUE BUSCAN SUS RECURSOS MINEROS, SU AGUA, SU PETROLEO, SUS JOVENES. ESE TAMBIEN ES UN HOLOCAUSTO QUE SE DESARROLLA FRENTE A NOSOSTROS Y NO DECIMOS NADA, CALLAMOS.
EL SEÑOR NOS LO DEMANDARA EL EN JUICIO FINAL.
Impresionante relato. Recorrí las calles de Salonica donde aún vive la herencia sefaradi. Para nosotros argentinos Borges ha escrito un hermoso poema Las llaves en Salonika. Muchas gracias