eSefarad Noticias del Mundo Sefaradi
«Defendido de abokarse de la ventana». Ansina dezia en el metro de Barcelona en el anyo 2000. De kreatura me akodro ke mi madre me avlava lo mismo, kuando me metia a djugar en basho kon las bilyas, al eskapar de komer un bokado en la meza: «Herrnaniko vas a gomitar si te abokas kuando ainda estas englutiendo». Senti komo un enkontro kon las raises de mi 
kultura djudia, en la Espanya ke mos arondjo en 1492. De la parte Rodriguez, mi famiya viene de la Catalunya, porke en la karta de identidad (nüfus) de mi padre esta eskrito. Era el segundo viaje ke kon mi mujer aziamos a Barcelona- aviamos estado tres anyos antes – ma por pokos dias. En esta okazion mos emprestaron un apartamento kon todo djusto por semana entera. Se topaba en un kuartier muy ermosiko, en la plaza de la Sagrada Famiya, la afamada ovra del arkitekto Antonio Gaudi.Djusto mos afito un konsierto de muzika klasika i la djente venia kon su siyika de kasa, para asentarse delantre de la eglisia, ke ainda no eskapo de fraguarse kompletamente.
Las mijores promenades las kaminimos en la rambla, ke es una sola, ma todos dizen Las Ramblas, porke va trokando de nombres. Al empesijo en la Plaza de Catalunya se yama Canaletas, kontinua kon Dels Estudis, de Sant Josep, Dels Kaputxins, i a la fin Rambla de Santa Monica, ande se topa el monumento a Kristof Kolomb. Kinze blokes donde ay muncho de ver, komo el Mercat de la Boqueria, para merkar todo lo ke es de komer. Para gostar un pasteliko o un chokolat amargo, la Casa Figueras. Un buen kafiko en el Cafe de L’Opera, enfrente del Gran Teatro de Liceu. En la entrada del Museo de Cera avia dos ombres enkolgados kon un teneke de pintura i una furcha en las manos, ke paresian de vedra. Si un benadam kiere tener repozo i asentarse en una siya en Las Ramblas, kale dar paras.
El korazon de Barselona (bar-sielo-ola,komo yaman los katalanes a sus sivdad) es ariento del Barrio Gotico, un labirento de kalejas medievales, ande el tiempo se areto. En el primer viaje mos kedimos en un otel ke se 
topava a dos puntos del Museo Picasso i kaminimos enteros los carrer (kalejas) del Gotico. En la plaza Sant Jaume, kon estasion de metro, estan los batimentos de la Genaralitat i del Ajuntamiento, muy antikas i ermozikos. Una bira bien yelada en el Bar del Pi i turrones en Planells-Donat, ke los fabrikan desde el 1870. Para ver el bodre de la mar, la Barceloneta, remodelada para los djugos olimpikos de 1992, kon buenos restaurantes. No kale mankar de visitar el Montjuic i las ovras de Gaudi en el Park Güell, las kasas Batllo i Mila (mas konosida komo La Pedrera), en el Paseo de Grasia, una ancha i ermoza kaleja.
Dunke mos plazio Barcelona, el manadero djidio de la Catalunya lo topimos en la sivdad de Gerona. Kaminando por la kaye de la Forka, arivimos al kuartier djidio (el Call), ande estan lavorando para decharlo al modo ke era desde haloshentos anyos. Es konsiderada una de las aldjamas mas importantes de la Espanya medieval, la de las tres kulturas. En el Centro Bonstruc ça Porta, yamado ansina al onor de Moises Ben Nahman (Nahmanides), un grande kabalista, mos aresivio su direktora en akeyos anyos, Assumpcio Hosta i Rebes. Mos amostro el proyekto del Museo de Istoria de los Djidios de Catalunya i del Instituto Nahmanides de Estudios Sefarditas i Kabalistikos. Mas despues mos yevo por las estrechas i oskuras kalejas, dandomos a entender la istoria de la sinagoga, la mikve, el ospital i las eskolas ande los djidios se ambezaban fina 1492. En el Museo Arqueologico vimos una piedra ke estuvo enriva de la puerta de la sinagoga i ke dizia: «Kasa de Jakob, venid i kaminad a la luz de Yahve. Dios es muestro refugio, abrid las puertas para ke entre un puevlo djusto ke guadra la lealtad. Sasiarvos del bien de vuestra kasa, de la santidad de vuestro templo».
La eskola kabalistika de la kaye de la Forka, de grande importansia por su orijinalidad filosofika, le dio a la sivdad de Gerona un prestijio en todo el mundo. Indemas tuvo famiyas famozas en el komersio komo los Halevi, Desmestre, Ravalla, Cresques, Bonjorn, Sabarra, Falco. En eskapando muestra visita mos abonimos komo kolaboradores de la biblioteka ke se estava empezando a inchir de livros, komo antes kinientos anyos.
La partensya al Pais Basko fue en tren i mos kedimos en la sivdad de Bilbao por tres dias i uno en San Sebastian. El Museo Guggenheim es lo primero ke vijitimos, un batimento fraguado de titanio, ovra del arkitekto Frank Gehry, una ermoza fantazia en una sivdad ke tenia mankansas de turistas. La otra sorte de kosa ke atiro muestros ojos fue lo ke la djente yamaba «los fosteritos», las estasiones de un moderno metro. Le metieron ese nombre komo una chaka a Norman Foster, el arkitekto ke los desino. El governo basko estava metiendo munchas paras en Bilbao para ke se atakanara i le diera plazer al visitante. El mayor esforso es alimpiar el rio Nervion, en medio de la sivdad, ke estava yeno de suziedad por las fabrikas ke arondjaban sus tosigos desde el porto en el Golfo de Bizkaia. Un profesor en la Universidad del Deusto mos avlo del mijoramiento del Pays Basko en la ekonomia i mas muncho en el Desvelopamiento Umano Sostenible. Desde una de las ventanas de su ofisina vide komo unos mansevos se engleneaban baylando fandango (la jota) i me dishe para mi: aki ay kalidad de vida.
A la Donostia, San Sebastian, viajimos en otobus por una ora desde Bilbao. En la playa «La Concha» mos banyimos en el mar Cantabrico. Vimos el batimento ande kada anyo se fiesta el Festival de Sinema i kaminimos por una agradavle sivdad, ande komimos el mijor piskado, aparejado a la baska. La kanserya mos izo tornar al otel, ainda mos mankava konoser un buen karar de lugares de la Peninsula Iberika.
HERNAN RODRIGUEZ FISSE. SANTIAGO DE CHILE.
*Publicado en el El Amaneser, suplemento mensual del diario Shalom de Istambul, Turquia, en el mes de Febrero 2010
