eSefarad Noticias del Mundo Sefaradi
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
«Ventanas altas de Salonik» el CD muevo de la muzikologa Dra. Susana Weich-Shahak
En estos dias sale a luz un Doble CD de kantes sefaradis, el fruto de una investigasion folkloristika de la muzikologa Dra. Susana Weich-Shahak.
El Doble Disko es una produksion espesial del departamento de muzika en la Universidad de Haifa.
La koleksion de los kantes en «Ventanas altas de Salonik» es bazada sovre gravasiones autentikas de judios, orijinarios de Salonik, ke avia echo la Dra. Weich-Shahak desde 1975.
Esta koleksion de kantigas resive agora una vida mueva i freska kon kantadores i muzikantes ekselentes.
Los dos diskos son una integrasion artistika entre las investigasiones i la devosion de los kantadores i muzikantes. Son komo un regalo de agradesimiento a todos los judios sefaradim ke supieron preservar el
trezoro muzikal de los judios de Espanya.
Yehuda Hatsvi
Erets Yisrael
Para Ladinokomunita
