La boz de Yehuda: «Los piyutim de Yamim Noraim»

En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.

 

Los piyutim de Yamim Noraim

 

Los Piyutim, al uzo sefaradi, ke se kantan en el interval de los Yamim Noraim, son para mi, una eksperiensia poetika i muzikal.

Es una sensasion ke es un poko difisil de ekspresar en palavras: meldar, eskuchar i meditar en las poezias de Shelomo Ibn Gevirol, Yehuda haLevy, Moshe i Avraam Ibn Ezra, i otros grandes poetas.

Las melodias, bazadas lo mas sovre la muzika turka, i el hazan ke las kanta, en kavzos kuando me parese ke ENTIENDE lo ke kanta, me emosionan kada anyo de muevo.

Ay muchas diferensias entre los Mahzorim (livros de orasiones) de los Sefaradim, verso los Ashkenazim, Mizrahim, o los judyos de Yemen. No todos kulanean los mizmos piyutim, i el teksto de las orasiones no es siempre identiko. Ma, bushki i topi, ke ay dos (solamente dos) piyutim ke se kantan en todos los trivos de Yisrael:

1) el piyut «Im Afes» de Efrayim de Regensburg, del siglo 12,
2) «Anshe Emuna», de un poeta anonimo.

Vos do aki unas kuantas linyas en ladino de estos dos piyutim, traduksion libera (muy libera) por Reuben Eliyau Israel, Rabino i hazan de la Comunidad Israelita-Spaniola de Craiova en Romania (Elul 5670=1910):

1. «Im Afes»
   Si el servisio de los sakrefisios foe abandonado
   Si noestro santuario foe roinado
   El poevlo Israel no sera nunca exterminado
   Por amor del Patriarca Avraham el venerado.
2. «Anshe Emuna»
   Los ombres de boena fei se perdieron, akeios ke eran animados
   por sus boenas ovras
   Baraganes en virtudes ke rempushavan las malas sitensias
   Eran para nozotros forterisa i abrigo en tiempo de dezgrasia
   Calmavan la ravia de Dio con sus orasiones,
   i su sania con sus esclamasiones.

 

Aki mas abasho, podesh eskuchar a el piyut «Im Afes» kantado por Avraham Recanati al uzo de Salonik, i al hazan famozo Yitzhak Algazi al uzo de Turkiya.

Tambien toparesh ayi una linya de hazanim de Irak, Georgia, Libano, Italia, Iran, i mas.

Shabat Shalom !

 

 

Yehuda Hatsvi
Erets Yisrael
Para Ladinokomunita