eSefarad Noticias del Mundo Sefaradi
«El tamaral»
En la fiesta de las frutas, el datle/datile es una de las frutas mas preferidas para la beraha de «Bore Peri aEts».
En el salmo de Tehilim 92 topamos eskrito:
«El djusto, enfloresera komo el datlanar/tamaral» (palmera, en espanyol). Mos eksplikan ke este pararelizmo es porke el tamaral es un arvol kon raizes fuertes, i ke tiene frutas dulses i saludavles.
Oy, me parese ke topi otro un perush a esta metafora entre el djusto (tsadik) i el tamaral.
En los tiempos del Mandato Britanico en Erets Yisrael, uzavan todas las eskolas djudias a salir a los paseos organizados en los espasios del pais, kada elevo kon su livro de la Biblia en la mano. En kaminando por las kolinas i las wayes, los maestros mos amostravan las sitasiones en el livro por kada sitio de muestra patria: Hevron, Yerushalayim, Bet-El, Shehem, etc.
En los 60 anyos de alkavo, la Biblia en Israel se izo un pokito «tabu», i tienen myedo aki, ke identifikarmos kon la Biblia, se intrepretara, has ve-halila, komo un akto de nasionalizmo…
Me akodro ver a las kazalinas asentadas a deskansarsen a la solombra del tamaral. Era una koza kuryoza, porke la solombra de este arvole alto aparese (segun la direksion del sol) en una distansia bien larga del lugar ande este arvol esta plantado.
Dunke, este rekuerdo leshano me aze avrir el livro de Djuezes, i meldar en kapitolo 4:
«I Devora…..una mujer profetiza, governava en akel tiempo a Yisrael. Devora era akostumbrada asentarse basho el tamaral ….
i los ijos de Yisrael suvian a eya a djuisio».
A mi me parese, entonses, ke este arvole de datiles mos ensenya ke el benadam (o el djuzgador) djusto i onesto, no se eskondera en ninguna solombra espesa i eskura. La solomra del datlanar esta pozada en el ancho i avierto espasio del kampo, vizible klaramente a todo el derredor. «La djustisia deve azerse, pero ser tambien visto por todos».
En mi opinion, esta es talvez la korrelasion entre el arvol de datiles i el djusto.
Fiesta alegre a todo Yisrael.
Yehuda Hatsvi
Erets Yisrael
Para Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
