eSefarad Noticias del Mundo Sefaradi
Ver todos los artículos de esta sección
Simhat Tora en el Moshav de Nevatim
Yehuda Hatsvi
En el interval de los Yamim Norayim eskuchi, mezo el Youtube, a muchas versiones del piyut Kol Nidre (ke lo korrekto, en arameo, es komo los sefaradim uzamos pronunsiar: KAL NIDRE. Djustamente ansi dizimos en la manianada ke presede el moed de Pesah: KAL HAMIRA)
Entonses, de todos hazanim, me impresiono el buen judio venido de Cochin, resitando el Kal Nidre, klaro i korrekto, ambos en ebreo i en arameo.
Aki lo tenesh en un enlase; oyendolo:
Aze 2500 anyos de kuando bivian judios en Cochin (el estado de Kerala en el sud de India). La komunidad de estos judios fue al pareser la mas izolada en la Diaspora, aun ke kuriozamente, en el siglo 16, un punyado de ekspulsados de Espania arrivaron tambien a Cochin i se instalaron aya.
Es solo en 1949, ke empesaron, avagar avagar, a venir a Israel judios de Cochin.
Desde el anyo 1953 desharon todos los judios la rejion de Cochin, i se instalaron en Israel, lo mas en el Moshav (kazal) Nevatim en el Negev, serka de Beer Sheva.
Ayer resivi de un fotografchi yamado “Danchi” una koleksion de fotos ke deskriven las Akafot de Simhat Tora, (bueltas i bayles kon los livros de la Ley), en el Moshav de Nevatim.
1) En la primera foto se ve una kaye en Cochin serka de la sinagoga.
Mas abasho mos dan a saver komo reusheron estos judios ke vinieron de un pais tropiko, ma kon mucha agua, a un lugar esteril i seko en el Negev, i yene lograron azerlo un kazal enfloresiente i prospero.
Esta chika komunidad preserva sus antiguas kostumbres, i ansi selebran la fiesta de Simhat Tora en la manera tipika suya.
En los anyos de ‘70 se fraguo el Kahal en Nevatim, ke es una kopia del Kal ke desharon en India.
La “teva”, en el sentro de la sala, fue traida de India.
Segun el uzo de Cochin ay una teva adisional arriva (se ve en la foto sovre la kavesa del hazan), arres de la Azara (la sala de las mujeres), ansi ke puedan oyir bien al hazan.
3) El hazan vestido en una toga, kolor de pertukal.
4) En la noche de la fiesta, se fragua para los livros de la Tora un talamo espesial, bien dekorado, ke sirve komo Ehal, solamente para la fiesta.
Kuando se terminan las Akafot se meten los livros sovre un “pulpito”, al lado de la entrada; de ayi se toman una vez mas para las segundas Akafot. Despues de los bayiles se retornan los livros al pulpito, i la djente pasan a bezar los livros de Tora.
En fin, se meten los livros en el talamo dekorado.
5) En las fiestas i en las bodas, los judios de Cochin uzan Kipot de varyas kolores.
6) Los Livros de la Tora en el talamo echo espesial para la fiesta.
7) Yaakov Yosef, de edad de 97, el mas viejo del kazal.
Segun la kostumbre, despues de Arvit, salen los kazalinos akompanyarlo a su kaza. Ayi apareja su famiya mezas kon aperitivos al estilo de Cochin.
El Dio ke mos ayege, kon bueno, a plazos i fiestas alegres.
Yehuda Hatsvi
Israel
————————————————
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
