La boz de Yehuda: La Dadiva de la Ley por Yehuda Hatsvi

Oganyo, 5781, segun el kalendario judio (2021 en el kalendario sivil), fiestamos el Moed de Shavuot en notando ke antes 3333 anyos, frente el monte de Sinay, resivimos la Tora.

Ansi meldamos en el livro de Shemot/Exodo (19, 1):
“En el treser mez de la salida de los ijos de Yisrael de Ayifto, en akel dia vinieron al dezierto de Sinay….i pozo Yisrael delante del monte”.

El numero 3333 mos aze akodrar ke muestros hahamim avian notado ke muestra Biblia esta dividida en tres (3) partes: Tora, Neviim, Ketuvim (en abreviasion: TaNaH).

i muestro puevlo esta dividido en tres (3) partes: (Kohen, Levi, Yisrael);

i la Ley fue dada por mano de el treser (3) (= Moshe rabenu, ke es el treser
despues de Miriam i Aharon);

en el treser (3) dia, komo meldamos en el livro de Shemot (19, 11):
(“porke en el treser dia, Adonay desendera a vista de todo el puevlo
sovre el monte de Sinay”.

(Bazado sovre el artikolo de Menahem Rahat en el semanal de Ben Ezer).

* * *

Aki, mas abasho (i tambien en el anekso) vos do la primera estrofa de la Ketuba de la Ley, eskrita por Rabbi Yehuda Leon Kalay:

Es razon de alavar a el Dio grande i poderozo
Kon temoridad de korason i alegria i gozo
En el dia el este santo i temerozo.
En este dia, abasho el Dio en Sinay
I milarias de mallahim kon El
A dar la Ley a su puevlo, Kaza de Yisrael,
Por mano de Moshe Rabenu pastor fiel.
Non kijo abashar sovre ningun monte alto
Salvo en monte de Sinay ke se arrebasho tanto
Porke deprenda el ombre i tome la anava por manto..

Moed Alegre!