eSefarad Noticias del Mundo Sefaradi
Ver todos los artículos de esta sección
La kostumbre de komer kozas de leche en Shavuot, egziste en todas partes del puevlo judio. Naturalmente, kon siertas variasiones entre judios dispersados en los varios paizes del mundo.
No siempre se puede topar el orijin de alguna kostumbre o tradision; ma, el puevlo judio siempre bushka i eskarva, por asaventar. Ansi es ke se topan algunas siete razones para eksplikarmos deke komemos kozas de leche en este Moed yamado Shavuot (ma, tambien “la fiesta de la dadiva de la Tora”, “la fiesta de las primisias” i “la fiesta de la segada del trigo”).
De las muchas “razones” porke es ke komemos kozas de leche en Shavuot, vos dos aki kuatro de eyas. Las otras mas eksplikasiones son bazadas sovre la gematria i un “djugo de palavras” en ebreo.
* Antes 3340 anyos mos prezentimos todos, los 12 trivos de Yisrael, frente el monte de Sinay, esperando a resivir la Tora.
En akel dia no supimos ayinda kualo es karne kasher, o komo gizarla segun la Ley. Dunke, desidimos de komer en este dia solamente kozas de leche.
** La Tora es komparada, analogada, a la leche. Ansi eskrive en Kantar de los Kantares (4, 11):
“Miel i leche estan debasho de tu alguenga”.
Desde el primer dia del nasimiento del benadam, la leche mos mantiene el puerpo. Ansi, tambien, la Tora (resivida en Shavuot), mos da la alimentasion espiritual ke muestra alma tan nesesita.
*** Un pasuk “kompuesto” (en Shemot 34, 26) mos enkomenda:
“El prinsipio de las primisias de tu tierra trayeras a la Kaza de Adonay tu Dio. No kozines/gizes el kavrito kon la leche de su madre!”
En muchas komunidades se uza a komer komidas de leche en el dezayuno de Shavuot, i komidas de karne en el almorzo de mediodia; (bien entendido, en metiendo tino de no mesklar entre karne i leche). Esto es, por demostrar ke kumplimos komo se deve este mandamiento
**** Segun muestra tradision, mensionada en el Talmud, Moshe Rabenu nasio en el 7 del mez de Adar,
i kedo eskondido en kaza de sus djenitores, por tres mezes (asta el 6 del mez de Sivan).
Kuando fue sakado de las aguas del rio por mano de la ija de Paro, Moshe el bebe refuzava tetar leche de las mujeres ejipsianas. Entonses fue ke le toparon alechadera ebrea, (ke fue djustamente Yoheved, la madre biolojika de Moshe).
Este es un fenomeno maraviyozo en la vida de Moshe, ke komensa en el 6 de Sivan, el dia del Moed de Shavuot, i ke mos da una razon mas a komer i gozar de las savrozas komidas de leche en esta fiesta!
Moed alegre i bueno !
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
