eSefarad Noticias del Mundo Sefaradi
Ver todos los artículos de esta sección
Karos amigos i amigas,
En estos dias de pandemia, estamos enserrados kada uno en su kaza por kavza del virus peligrozo, yamado Korona.
Djuntos kon mozotros, estan enserrados toda la djente del kazal global (el mundo entero).
El mandamiento del ensierro por tratar a kurar a los hazinos, i en el mizmo tiempo protejar a la djente de la kontaminasion de la enfermedad, no es una koza mueva.
Bien mos akodramos lo ke eskrive en la Biblia (Vayikra kapitolo 13) kon los mandamientos a los Kohanim (saserdotes) de enserrar por 7 dias al pasiente sospechado por ser leprozo, i kon el buto de averiguar si esta enfermo o no.
Djeneralmente, en ladino, yamamos al “ensierro medisinal” kon el nombre “karantina”. (en espanyol: cuarentena).
El biervo derive del italiano “quarantina”, el ensierro de 40 dias, ke se imponava sovre naves/vapores serka de las kostas de Italia en tiempos de epidemias komo kolera, landra, viruela. Londje/leshos de todos mozotros!
En mi chikez (aki, en mi payis, en periodo de una epidemia de tifus), me akodro oyir una vez el biervo Lazzaretto komo un sinonim del biervo karantina.
Tuve de konsultarme oy kon Google, i na ke topi ke si, esta palavra italiana se uzava al tiempo en varyas lenguas tambien para definir “ospital para los leprozos”.
Mas me ambezi fresko fresko ke “Lazzaretto Vecchio”/viejo, es una izla chika de la laguna de Venezia.
Entre 1403, i la plaga del 1630 fue uzada komo un ospital ke se okupava de kuidar a las personas durante las epidemias de peste.
El Dio ke mos guadre de todo mal!
Shabat Shalom!
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
