eSefarad Noticias del Mundo Sefaradi
Ver todos los artículos de esta sección
Meldi kon interes el mesaje transmetido en LK por Yaffa Shuhami, bushkando informasion sovre el Dr. Yitzhak de Botton.
La kuriozidad me yevo a la Internet (en ebreo!).
Ayi topi una pajina larga de informasion detalyada sovre sus aktividades komo autor, jurnalista, aktivista sionista, i dientista.
La informasion jeneral ke mos regala aya la Internet, puede asistir a kualker investigador, i darle varias direksiones para akumular mas i mas detalyos esfesifikos en la vida del Dr. de Botton.
Entre otras, me ambezi ke Isaac de Botton partisipava en todos los jurnales de ladino ke aparesiyan en Gresia i en Israel.
Tambien, el eskrivio, i kito a luz, algunos tres livrikos:
* Rekolyo de poezias diversas 1931
* Kuaderno de poezias 1935
* El ensendio del 18-19 Agosto 1917 (Salonik 1919).
Un epizodio en la vida de Isaac de Botton:
A la edad de 13 anyos, komo elevo en la eskola de la Alliance, el establesio una asosiasion de elevos, yamada “Tikvat Tsion” (“Esperansa de Sion”), kon el buto de difundir el Ivrit (el ebreo) mezo estudio, independiente i bien organizado, de la lengua.
El direktor de la eskola, el Sr. Joseph Nehama, ke era muy entuziazmo por la difuzion de la lengua franseza, desidio de detener los sertifikados de graduasion de akeos elevos ke se okupavan en el estudio del ebreo.
Isaac de Botton deklaro, ke el va publikar este evento en los jurnales.
Entonses, el direktor ordeno de privar las komidas ke se les davan a la eskola, de todos akeos elevos ke estudiavan i enseniavan el ebreo.
Indemas desidio de ekspulsar de la eskola todos los miembros de la asosiasion ebrea.
Naturalmente, despues de tala amenaza, lo mas de los elevos de “Tikvat Tsion” retiraron de la asosiasion.
Kedaron solamente Isaac de Botton i otros kuatro elevos obstinados.
El fin del kuento fue ke Isaac reusho a publikar este evento en un jurnaliko lokal, i de ayi se interesaron todos los jurnales judios.
Despues de la publikasion jeneral, Joseph Nehama, el direktor, tuvo miedo ke estas notisias en los periodikos yegaran a los oyidos de la direksion de la Alliance en Paris, i no tuvo otro remedio sino konseder los Sertifikados de Graduasion a todos los elevos,
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
