eSefarad Noticias del Mundo Sefaradi
Ver todos los artículos de esta sección
El jaket de Leon
Lo ke vos esto kontando, paso antes muchos anyos en la komunidad judia en Yerushalayim, en el tiempo del dominio otomano. Kiere dizir, mucho antes de la gerra grande de 1917.
Vos do estos datos istorikos, porke en akeos tiempos, los djudios de Yerushalayim (afilu los Ashkenazim!) avlavan judeoespanyol. La lengua de los sefaradim era rika i fluente, porke eyos vinieron de todas partes del imperio otomano (Turkiya, Salonik, Monastir i Bulgaria), ansi ke uzavan a vezes varyos o diferentes biervos uno del otro. Sierto, ke los biervos sinonimos dan “kolor” i bivez a la lengua.
Por enshemplo, el kuento de oy, yo ya lo avia eskuchado tres diferentes vezes.
Un buen judio me lo konto, diziendome ke se tratava de un jaket (o jaketa) ke se vendio al onor del Shabat aGadol, (el Shabat antes de Pesah, en el kual se uza, segun una kostumbre antigua, a estrenar vestimienta).
En otra okazion lo sinti este kuento de boka de otra vizina, avlando sovre la «sultuka», i en la tresera vez, kreendome o no, me kontaron la mizma istoria, uzando la palavra «sakaki».
Kurto lo azeremos agora.
Hanino, uno de los lavoradores en el merkado de la sivdad, se topo en estrecho, dos tres dias antes del Shabat aGadol, porke no teniya bastante paras para merkarse un jaket muevo. Despues de muchas ezitasiones, entro a la butika de Leon su konosido, kon el achake de merkar un poko de pepitas o kirikites (fistokes, kakuetes).
Avlando por aki por ayi, le konto Hanino a Leon ke tiene de menester de un jaket, ma no tiene bastante dinero para merkarse uno.
Leon le propozo de venderlo el jaket suyo.
– «Este jaket ermozo», disho Leon, «lo merki el anyo pasado para Shabat aGadol, por 100 liras. Entonses, te lo vendo agora por solamente 50 liras.
Alegre i kontente, aksepto Hanino a esta propozision, korrio en kaza, kito las 50 liras ke avia guadrado basho de una fronia en el dolap (armario), i merko de mano de Leon su jaketa.
Este «komersio» kontinuo komo un ritual algunos sinko o sesh anyos.
Un dia de viernes del Shabat aGadol, torno Hanino kon el jaket uzado, ma kaje muevo, ke merko komo su uzo de su konosido Leon; una vez mas por solamente 50 liras.
Mizurandose el jaket, disho Hanino a su mujer:
– «Bendicho sea Leon, ke me vende kada anyo su jaket, kaje muevo muevo, por 50 liras».
– «Bovo arrastado i desmazalado!!!» grito la mujer «Ya ay sesh anyos ke Musyu Leon se viste una sultuka mueva mueva kada anyo, i en realidad le kosta presizamente no mas de 50 liras.
I tu, Hanino dezmazalado i bovo, te merkas kon el mizmo presio un jaket ke ya fue uzado una anyada entera !!»
Hanino se kedo kayado, i despues murmureo: – «Bueno, bueno; tienes razon».
Ma la mujer kontinuo a gritarlo: «Sos desmazalado, sos el vise-prezidente de los desmazalados de todo el mundo»!
Hanino trato de kalmarla kon un aire de shaka, i le disho: – «Vise-prezidente de los desmazalados? i porke no el prezidente»?
-«P-o-r-k-e?!» esklamo la mujer «Por ke sos un desmazalado!!!»
Al desmazalado, le kaye afilu el bokado
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
