eSefarad Noticias del Mundo Sefaradi
Ver todos los artículos de esta sección
PIRKE AVOT
Yehuda Hatsvi
La Masehet “Avot” (“padres”) es una parte de la Mishna. Ma, kon la diferensia, ke en esta masehet (una koleksion de temas) no mos avlan por Alaha i Dinim, ni por rituales de relijion.
Esta Masehet (bien konosida tambien komo Pirke Avot), trata solamente de konsejos de moral i etika (kon relasion al judaismo).
Naturalmente, se puede meldar Pirke Avot en kualker tiempo ke mos da la gana, ma segun muestra tradision, se melda en partikolar en los dias de Shabat, entre Pesah i Shavuot.
En esta “sezon”, a las manianadas, despues de la Tefila de Shabat, los sefaradim del tiempo de mi chikez, uzavan a dizir:
“Venid, meldaremos Perek”.
El primer Perek (kapitolo) mos da una kadena de “geneolojia” de savios, pasando la tradision judia, de jenerasion a jenerasion, desde Moshe Rabenu asta los Hahamim ke koleksionaron toda la Mishna.
En este kapitolo “peshki” para vos un pasuk (1, 4):
“Yose, ijo de Yoezer de (la sivdad) de Tsereda, dizien:
“Sea tu kaza, kaza de reunion para los savios.
I seas enpolvoreante en polvo de sus pies (en kaminando detras de los hahamim), i seas bevien kon sed (komo un benadam sediente ke esta ach a bever agua) a sus palavras”.
* * *
Me aze akodrar el refran sefaradi: “Un anyo mas, un sehel mas”. Este refran mos indika ke kada anyo mas, akumulamos ayinda mas de eksperiensa de vida.
Ma, yo propozo “atakanar” un pokito a tal refran:
“Un anyo mas (kon estudio), un sehel mas”.
Vos do aki dos paragrafos de gia i instruksiones del kapitolo 2 de Pirke Avot:
- “Hilel (jeneralmente yamשdo Hilel el viejo) dizien: No te apartes de el sibur/publiko/sosiedad (porke “todo Yisrael es responsavle el uno por el otro”.
Kuando esta el publiko en Sar, seas i tu tambien en tristeza, afilu si el Sar no te toka en la karne.
Por este zehut, yegaras a ver dias alegres djuntos kon el sibur/publiko)……I no djuzges a tu haver/kompaniero asta ke ayeges a su lugar
(a su grado i su hal i eksperiensa; komo dize i el refran sefaradi: “ninguno save el Sar de oya, sino la kuchara ke la menea”).…I no digas kuando tendre tiempo libre, meldare (la Tora, o kualker estudio); kisas (has vehalila) no tendras tiempo libre.
(no toparas rat de tus okupasiones, i no estudiadras nunka. La dicha sefaradi mos enkomenda de kaminar en el kamino intermediano, i mos konseja “Alaha kon melaha”, topar el ekilibrio entre los negosyos i los estudios).
- Rabi Tarfon, dizien: el dia kurto (la vida del benadam en este mundo es kurta), i la ovra mucha (el estudio de la Tora, o kualker otro estudio tambien, es grande, komo mos eskriven en el livro de Iyov 11,9,
“Su medida es mas larga ke la tierra, i mas ancha ke la mar”. I los ovreros perezosos (los organos del benadam son haylazes de okuparsen en la Ley i kumplir sus mandamientos) i el salario (rekompensa de los sielos) mucho, i el duenyo/patron de la kaza apretan (el Santo-Bendicho-El mos pusha de estudiar la Tora i kumplir las mitsvot).El era dizien: no sovre ti la ovra para kumplir i no tu “ijo-foro”/libre para ke te baldes de eya”(en todo kavzo, no sos libre de no estudiar la Tora.
Tienes de estudiarla segun tus fuersas i tu kapachedad).
Vos do aki dos o tres sitasiones del treser “Perek”:
- “Rabi Hanina, ijo de Dosa, dizien: Todo el ke sus ovras (buenas) muchas mas de su saviduria, su sensia se afirma (porke lo apoyan de los sielos;
i todo el ke su sensia/saviduria mucha mas ke sus ovras ke no kumple las Mitsvot aun ke las konose bien, i emplea su saviduria solamente por kontenerselo i “darse ayres”,
su saviduria no se afirma”
- “Rabi Yishmael dizien: See resivien a todo benadam kon alegria
(lo tenemos enkomendado de viejo de muestros nonos sefaradis, ke “la sonriza no te kosta nada, i en realidad, jeneralmente, la resives de muevo atraves de tu interlokutor/kompaniero. De toda manera, es mas plaziente de ver kara de riza ke una facha de mutra.
apropo, “moutra” es palavra grega ke sinyifika “paperas”)”.
- Rabi Elazar ijo de Azaria, dizien: Si no ay Ley, no ay dereh-eres/jentileza,
(el benadam ke nunka estudyo, no save komportarse kon la djente) i si no ay dereh-erets,
no ay Ley (el ke no se komporta bien, se le olvida su estudio);
si no ay arina (si no ay parnasa),
no ay Ley (komo ke estudye el prove si no tiene algo de komida;
si no ay Ley, no ay arina (tiene ke ver el uno kon el otro).
Vos interesa meldar unas kuantas direktivas i gias del kapitolo 4?
Aki las tenesh:
- Ijo de Zoma (Este savio murio en su djoventud i no alkanso ser rabi. Por esto es yamado “Ijo de Zoma” i no kon su propio nombre Shimon), dizien:
Kual este savio? el ke aprende de todo benadam.
Kual este riko? el ke se alegra kon su parte.
entre los sefaradim se uza la dicha, sitada de la tefila de Shabat: “alegrarsea Moshe kon dadiva de su parte”).:
Kual este onrado? el ke a las personas. - Rabi Matya ijo de Harash, dizien: see antisipan en pas/Shalom (i buenos dias) de todo benadam. I see koda/kola a los leones, i no seas kavesa a las rapozas.
- Elisha ijo de Avuya, dizien:
El ke aprende Ley de siendo ninio, a ke el asemeja?
a tinta eskrita sovre papel muevo.
I el ke aprende Ley en su vejes a ke el asemeja? a tinta eskrita sovre papel arrematado/borrado.
(de toda manera mos enkoraja la dicha sefaradi: “la fortuna es por kien la perkura!”).
(apropo, Rabi Elisha ben Avuya, en su vejes, se alesho de la relijion. Aun kon todo, los Hahamim no anularon sus konsejos de saviduria.
Vos akodrash? “Kual es el savio? el ke aprende de todo benadam”
- Ribi (Ribi Yehuda Nassi), dizien: No konsideres al atuendo, salvo en lo ke ay en el.
Ay atuendo nuevo yeno de viejo. i viejo ke aun nuevo no ay en el
(esto se avla por personas yenas de saviduria verso personas “vaziyas”, inyorantes.
Sin kerer, a mi me aze akodrar de la dicha sefaradi sovre algun ombre aksi/ravyozo:
“Vinagre fuerte, a su atuendo (su kuerpo/puerpo) aze danyo”).
En la mas grande parte del sinken “Perek” no se mensionan los nombres de los savios. Al pareser ke estos fueron unos eskritos antiguos de savios ke kedaron anonimos.
- Siete kozas en el nesio/estupido/tonto, i siete enel savio.
El savio no avla delante kien es mayor ke el en sensia i en edad, i no entra entre palavras de su kompaniero, i no apresura para responder. Demanda i responde, oye i enyade, demanda komo el propozito, i responde komo el Din (komo se deve), i dize sovre primero primero, i sovre el posterior posterior. I sovre lo ke no oyo, dize (sin ezitar): no oyi. i atorga sovre la verdad.
…I areves (al kontrario) de el, el nesio.
- El ijo de Bag Bag (su nombre fue Yohanan, konvertido al judaismo), era dizien:
De edad de sinko anyos a el pasuk
(meldar el Humash/pantateuko durante 5 anyos)
De edad de diez anyos a la Mishna,
De edad de tredje anyos a las enkomendans/mitsvot “kumplir minyan”),
De edad de kinze a el Talmud (Gemara)
De edad de dieziocho a el talamo (Hupa/kazamiento),
De edad de vente para persegir
(korrer i lazdrar por la parnasa)
De edad de trenta a la fuersa (lavoros duros),
De edad de kuarenta a el entendimiento,
De edad de sinkuenta a el konsejo
(lavorar en ovras ke nesesitan eksperiensa),
De edad de sesenta a la vejes,
De edad de setenta a la kaneza
(kaveyos grizos/blankos),
De edad de ochenta a la baraganiya
(siendo ke supero a la natura, i parvino ser viejo, ”entrado en dia”),
De edad de noventa, kamina enkorvado
De edad de sien anyos komo si murio, i paso,
i se baldo del mundo.
(la ekspresion sefaradi dize: “ya eskapo de entender”.
Ma, de la otra parte, muestras konsejikas de amor, se terminan ansi: “I kedaron kazados para sien i un anyo”. Dunke, desde sus 18 anyos de Hupa i 101 anyos de kazados, mos aze kaje de 120 anyos de vida).
El sejen Perek, es el ultimo en Masehet Avot.
- (dicho por Rabi Yehoshua ijo de Levi):
“El ke aprende de su kompaniero un kapitolo, un Din (ley), o un verso, o una koza, o afilu una letra, es menester uzar kon el kavod/onra”.
- (esta fraza la disho Rabi Elazar de boka de Rabi Hanina):
“Todo el ke dize koza en nombrado de su dizidor, traye redension/Geula al mundo. Ke ansi dize el verso: “I disho Ester a el rey en nombre de Mordehay” (Megilat Ester 2, 20).
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
