eSefarad Noticias del Mundo Sefaradi
Ver todos los artículos de esta sección
La komunidad sefaradi de Monastir
Yehuda Hatsvi
Komo ya lo savemos de la estoria, siempre bivieron Jidyos aki, en Erets Yisrael. A vezes, naturalmente, en numeros chikos.
Por egzempio, en el tiempo de los Kruzados, kuando vinyeron a konkistar a Yerushalayim (en el anyo 1099), los judyos en Yerushalayim, 200 personas i no mas, ayudaron a los musulmanos kontra los Kruzados.
Ma desde el siglo 16, despues de la expulsion de los jidyos de Espanya, la povlasion judiya en este pais pujo mucho, i no solamente en Yerushalayim, ma tambien en otras sivdades, inkluye la sivdad de Gaza.
La mayorita de la povlasion Judia asta el siglo 19, era sefaradi, i el Ladino era una lingua importante.
La hegmonia sefaradi en Yerushalayim por egzempio, fue kaje total, i asta los tiempos del mandato inglez kuando vijitavamos famiya o amigos en Yerushalayim, yo personalmete podia notar ke los yerushalmis tomaron los piyutim el los kales de los Selanklis, los pastelikos i boyikos de los de Turkiya i Bulgaria, ma el tono de avlar -en esto no tengo ningun safek- es de los Monasterlis:
Keridus amigus, vus asiguru ki estu es djustamenti ansina.
¿Komo puede ser ke en todas investigasiones sovre los sefaradim se avla por muchas komunidades en el Imperio Otomano, ma kaje nada sovre la komunidad de Monastir?
Bueno, oy vino la ora.
Ma, antes de todo, ande se topa Monastir ?
En las fojas ke tenesh en la mano toparesh una harta chika, una mapa de Yugoslavia.
Yugoslavia komo una federasion de paizes egzistyo (en una forma o otra) desde 1918 asta 1990, i el nombre sinyifika «los Slavos del sud».
A Monastir la topamos en la rejion de Makedonia, muy serka a la frontiera de Grecha, muy serka a la sivdad de Salonik. A kontinuasion vamos avlar un poko i sovre los kontaktos entre estas dos komunidades Judias.
El nombre Monastir derive de la palavra «monasterio» ke es מנזר (manastir, en turko i en albanez).
Por la egzistensia de jidyos en Makedonia ya savevos desde el tiempo de Alexander el Grande (-356 – -328) antes algunos 2400 anyos. Uno de los elevos de Aristo konto sovre un soldado yamado Meshulam (ke es nombre bien popular asta oy entre los Monastirlis). Este askier serviya en la armada de Alexander Mokdon.
Un dia, los saserdotes de la armada apozaron a mirar el bolo de un pasharo para endevinar el futuro.
Meshulam tiro una flecha (saeta) i mato al pasharo. A los amigos ke se pelearon kon el, el disho kalmamente:
¿Komo puede este pasharo dizir el futuro vuestro?
Si savia este pasharo el avenir, no iva bolar a este lugar».
Apropo, los saserdotes ke savian el ofisio de endevinar segun el bolo de los pasharos se yamavan «augurios».
I asta oy en muestra lingua dizimos «augurar ogurios»:
Bendisiones por el avenir.
Paulus, el misyonario kristiano, en los primeros tiempos del kristianizmo (kuando ayinda diziyan ke son judyos, ma ke Hristo es el Mashiah). Paulus (Shaul Ha-Tarsi) vijito en Filipi, en Makedonia, i de ayi se hue a Salonik i darso en una kehila, por tres Shabatot, una detras de la otra.
Ma, un testimonio muy solido es lo ke se topo en ekskavasiones muy serka de Monastir. Una kolona de marmol, engravada en letras gregas, ke dize ke es de la sinagoga, del treser siglo.
En jeneral, al menos desde el siglo 13, los judyos preferavan instalarsen a la longura del kamino yamado Via Agnetia (un kamino de mas de 1000 kilometros). Entre las sivdades bivas i aktivas era tambien la sivdad de Monastir, i era komo una vitrina de la kolonizasion de los djudyos en Makedonia, siendo ke Monastir es situada en el kamino de Salonik de Gresia asta Dures en Albania, a la kosta de la mar Adriatika.
Kuando en 1382 los otomanos konkistaron a Bulgaria i a Makedonia, eyos uzaron a Monastir komo una sitadela militara para defendersen de los Albanezes.
Los Otomanos dominavan en Monastir asta el anyo 1912.
Estos 530 anyos de rejim turko desharon una marka sovre la sivdad, ma tambien sovre la komunidad Judia, i esto se notava en la vida sosial i afilu ekonomika.
La influensa turka se via en la vistimienta de los judyos, sus ofisios i sus kostumbres.
Esta fue una komunidad judia-tradisional, ke demostrava lealidad al rejim otomano asta la revolta makedonika en 1903.
En este rebelion tomaron parte i judyos de la sivdad, i aki se vido empesijo de deskontentes verso el governo otomano, asta ke este kayo enteramente en las gerras de los Balkanes (1912-1914), i en la primera gerra mondial (1914-1918).
Mucho mas antes de la konkista de Monastir por mano de los otomanos (1382), los otomanos konkistaron a la sivdad de Bursa (en 1324) i despues -lo mas importante-la konkista de Konstantinopla (Estambol) («stin-polis») en 1453, kon el Sultan Mehmet el Segundo. No por nada lo yamavan «Sultan Mehmet FATIH (el konkistor)»
Desde akeos anyos empesaron a vinir al paiz de los sultanes muchos Judyos de varyos payizes komo Alemania, Fransia, Hungaria, i tambien de Italia i Sicilia.
Muchos de estos Judyos yegaron a Monastir tambien, i yevavan la alkunia de «Ashkenazi».
Durante las jenerasiones eyos se mesklaron kon la povlasion lokal, i adoptaron los uzos sefaradies, i la lingua, ke es Ladino.
Lo ke les kedo fue la alkunia , ke oy yamamos Ashkenazi.
En el anyo 1453, el Rav Yitzhak Sarfati publiko un apelo, un manifesto, yamando a todas komunidades judiyas en Evropa de vinir i instalarsen en el Imperio Otomano.
Tengo la impresion ke al Sultan no le plazio esta mueva imigrasion, i en el anyo 1460 (tres anyos despues) el empeso una deportasion de Judyos de Skopia, Ohrid Prilap i Monastir a la direksion de Estambol.
Este SURGUM, komo se yama en turko, es un sistem ke ya lo konosemos de muestra estoria kon los reyes de Asiria (Tiglat Pileser, Shalmaneser) ל שלושה פשעי עזה (עמוס א’ ו kuando expulsaron de aki Judyos i trusheron aki otros puevlos (ke despues los konosemos komo Shomronim. Porke lo azen?
Kada gayo i gayo, en su gayinero kanta !!
En el exilio, no ay el mezmo briyo i el mezmo koraje komo en tu propio territorio.
Dokumentos ke ay de viajadores turkos i Venezianos del empesijo del siglo 16, deskriven a la sivdad de Monastir komo una sivdad en prosperidad, kon edifisyos grandes i ermozos. Ma el total de la sivdad en akeos tiempos (por egzempio en 1544) era 3000 kazas, i algunas 900 butikas.
Avian en la sivdad 60 famiyas djudias.
Es interesante ke en este mizmo anyo vinieron a Monastir Judyos de la sivdad Evelina en Albania. Mos dizen ke la klima en Albania fue muy difisil, i por esto se mudaron (karrearon), imigraron a Monastir.
Este detalyo istoriko es muy interesante. Mos kontan ke el orijin de estos Judyos era de Catalunia.
Lo ke savemos es ke los Judyos de Catalunia fueron expulsados en 1391, i lo mas se instalaron en Aljeria.
Ma na, komo mos dize la dicha sefaradi: «El Jidyo ande no lo asembras – lo topas».
Judyos desgrasiados bushkavan ande bivir en paz, i no siempre fue posivle.
En los anyos 1520 asta parese 1522 moro en Monastir el Kabalista Shlomo Molho (Diego Perez), judio de los konversos.
En Monastir eskrivio su livro ספר המפואר ke es perush a la Tora, ma entre otras kozas, el estava seguro, komo i otros kabalistas, ke el anyo 1540 va yegar la Geula. Parese ke se yerro.
El se adjunto a un grupo de Judyos enkavesado por David haReuveni, ke kijo traer a un akordo militar kon Portugal i kon el Papa en Roma i organizar una marcha militar kontra Turkiya, kon el buto de liberar a Erets Yisrael de mano de los Musulmanos.
La fin de Shlomo Molho fue -komo ya lo savemos- muy amarga. El fue kemado por la inkizision en Mantova, Italia, en 1532.
Rabi Yosef Karo, ke fue impresionado de Shelomo Molho, disho:
«Kien dara (makare) mi muerte komo la tuya !»
Despues ke se fondo la inkizision en Portugal, muchos konversos empesaron a fuir a la direksion del Imperio Otomano, i muchos de eyos yegaron a Monastir.
En akel tiempo egzistiyan en Monastir dos kales grandes:
El Kal de Aragon, i el Kal de Portugal.
Komo siempre, los veteranos (Vatikim) no pueden ver a los muevos venidos, i las relasiones entre las dos komunidades djudiyas no eran buenas.
Jeneralmente, los judyos de Portugal parvinieron kitar sus bienes de Portugal, muchos de eyos kon la ayuda de Dona Gracia, ke en estos dias selebrimos 500 anyos de su nasimiento.
No se a tanto vos kombino oyir konversasion entre Jidios de Monastir. En apozando un poko de lado, un poko de distansia, para no sintir las palavras, ma la melodia del avlar, parese ke estas oyendo djente avlando en Portugez. Este es el fato ke demostra la influensa ke tuvieron los venidos de Portugal en Monastir.
Ma, sierto ke no solamente el tono de avlar ma tambien muchas palavras en ladino ke empesan kon la «f» komo figos o fijos, palavras ke en Turkia se dizen igos i ijos.
Ay diferensias en la pronusiasion komo por egzempio los Monatrirlis dizen «vini i vidi» i no «vine i vide» komo lo mas de mozotros. Eyos komo Julius Kesar: vini, vidi, vichi.
Komo todos los jidios sefaradim, los Manastrirlis tambien kulanean muchos sienes de refranes, i tenemos de notar ke este trezoro kultural se guadro asta muestros dias por Zehut de las mujeres. Fueron muestras madres las ke mos regalaron la lingua JudeoEspanyol i tambien los refranes ke eyas uzavan en kada nada, muy frekuentamente.
Vos apareji aki, en las fojas, una chika lista de refranes de los Balkanes (Sarayevo, bosina, Raguza (Dubrovnik) i Monastir.
Es posivle ke konosesh todos, o la mayoria de estos refranes, ma kiero notar unas kuantas palavrikas ke no son tan popular en el «mainstream» («el korriente prinsipal») de muestra lengua.
רשימת הפתגמים
Kontinuaremos kon la vida de la komunidad:
Los judyos moravan en un kuartier apartado, ke se yamava «Yahudi Male». Este kuartier no era enserrado kon muraya, ma fue konstruido en una forma ke dava proteksion a los moradores. En Espanyol se yamava «El kurtijo».
Savemos por un grupo de Judyos de Monastir
(en el siglo 16), ke se organizaron a partir djuntos para bivir en la Tierra Santa.
Esto no se afirmo a la fin porke todos estos judyos no reusheron a rekavdar los emprestimos ke dieron a devdores turkos.
Esto mos amostra ke avian judyos ke su ofisio era Saraf o ke emprestavan paras.
Una vez mas, de viajadores de Venezia ambezamos ke en Monastir avian en el anyo 1600 – 50 edifisios ke apartienen a Judyos.
En los siglos 17 i 18, pujo mucho la povlasion Judia en la sivdad, i ya no kavian en los dos Kales grandes. Entonses, se formaron kehilot en unas kazas arkiladas.
Las reglas, konosidas komo «Reglas de Omar» no permetiyan fraguar sinagogas muevas, o fraguar kazas ke son mas altas de las kazas de los musulmanos.
Avian dasyos i taksas sovre los Judyos, i el mas konosido fue la DJEZA, ke asta oy en muestra lingua es un sinonim a la palavra dasyo o taksa. La djeza era un «capitagium» komo se dize en la lingua latina מס גולגולת sovre kada uno de la edad 14 i arriva.
Es interesante ke rabinos, hazanim, maestros, eran liberados de esta taksa.
Ma, ya savesh ke en el Imperio Otomano, las taksas eran echadas kolektivamente sovre la komunidad.
Entonses, en tiempos de kriza ekonomika, el komite de la komunidad judia empesava ovligar a los rabinos i hazanim a partisipar en el pagamiento de los dasyos, i esto kavzava mucha tension i pleitos en la komunidad.
Naturalmente, todas estas taksas eran para finansiar las gerras turkas, i tambien para mantener los palasios de los sultanes i las mishkitas, los djamis de los musulmanos.
En 1620 salyo un orden del Sultan ke es defendido por Judyos de yevar armas, montar sovre kavayos, o de uzar chapeos de samarra. Tambien fue proibido de vistir pantalones de kolor vedre. Vedre es la kolor tradisional del Islam.
«Vedre», es asta oy un sovrenombre para los turkos musulmanos. (Vedre, en muestra lengua, es tambien un bovo).
Es kuryozo ke en un tiempo en Polonia fueron los djudyos ovligados de yevar chapeos de samarra, mahsus por ke era de animales no-kasher (enkonados), i de ayi se formo el Shtreimel de los ortodoxos.
Para arrebashar a los Judyos todo es Kasher i permetido.
Lo mas de los ofisios de los djudyos de Monastir era de lavoros manual: shastres, konduryeros, teshedores, i mas.
Siendo ke los djudyos se okupavan en la Shehita, entraron muchos a los komersios de karne.
Ma el echo mas grande de los Judyos Monastirlis era en el lavor de kueros (curtiduria), i tambien fabrikasion de telas, ropas. (El meoyo es una tela de sevoya).
Komo ya nombrimos antes, avian i djudyos uzurarios (emprestimo de moneda). Estos djudyos azian muchos echos kon los kazalinos al derredor de la sivdad.
Es kuryozo, ke avian i judyos patrones de vinyas i aziendas (chiflikes), o tarlas.
En avlando por los echos ke teniyan los djudyos afuera de la sivdad, todos estos echos eran bien peligrozos, porke avian bandidos en el kamino, i halis komo dize en
ונתנה תוקף
la orasion ke se melda en el musaf de Rosh haShana:
בנפשו יביא לחמו
«Kon su alma trae su pan».
El siglo 18
En el empesijo del siglo 18 suvyo al poder el Sultan Ahmed el Treser, i el teniya en la idea de azer reformas al estilo del oksidente. En el tiempo de su reynado se mijoreo la flota naval (la armada marina), i se avrio la primera impremeria musulmana; (los jidios i los kristyanos ya tiniyan de kuando). Ma en lo ke toka a los judyos no se troko nada de bueno. El vizir grande kito regla ke judyo no puede vistirse kon kondurias (sapatos, kalsados, chapines) kafe/maron), o vistimienta kon filos de oro o de plata.
Bueno kon estas reglas ayinda se puede bivir, ma en el anyo 1708 demandaron los jidios de postpozar el pagamiento de la djeza, ma el Sultan no acheto de nada, i afilu amenazo ke si no pagaran, los va tomar a todos i atarlos komo remadores en los vapores del Sultan.
Los judyos pagavan la djeza, i tambien dieron emprestimos al governo, i muchas otras taksas, komo la taksa sovre la karne, i otros akchesis (fondos de rezerva).
Malgrado todo, los otomanos los yamavan «Chifut» komo un ensulto (torsion de Djiyahud?).
En Grecha sinyifikava «eskarso». Tambien se uzava tsigounis. Los selaniklis dizen chingun por eskarso).
Eskaso=
נדיר, מצומצם
El siglo 19
En el empesijo del siglo, reino el sultan Mehmet el Segundo (1808-1839). El anulo i dezmonto la armada de Yenichares (esklavos kristianos ke servian komo gerreadores kon paga desde 1350, formado por el sultan Murad).
En lugar de los Yenichares, el sultan Mehmet II formo una armada moderna, i fondo eskolas de enjinieres, de marineria, i mas.
En 1816 el paso el Beyler-beyik de los Balkanes de Sofia a Monastir, porke tiniya de machukar el rebelio de los pashas albanezes en Shkoder, en el norte de Albania, i en Yanina en el sud (territoria grega en muestros dias).
El fuego grande de los Monatrirlis es en 1834, en el kual se kemo lo vedre i lo seko, kazas i grutas, kehilot i Talmud-Tora. Los dirijentes de la komunidad azian kojetas en todas komunidades judias, demandando ayuda.
Los anyos de 1839 asta 1876 son yamadas «los dias del tanzimat». Tanzim (en turko) es arreglamiento, ma «El Tanzimat» se dize en avlando por las reformas otomanas.
Ma no komo en muestros dias ke en partes de los puevlos arabos se demandan reformas. En el Imperio Otomano fue por modo de presiones de parte de los imperios Evropeos en favor de los sivdadinos kristianos.
El primer reformador fue el sultan Abd el-Madjid, ke publiko en 1839 muchas oredenes muevas, i entre eyas la orden ke anulo la inkriminasion entre musulmanos i non-musulmanos.
15 o 16 anyos despues, izo el sultan otro un progreso liberal i publiko una orden ke prometio libertad de relijion, i egualidad en las taksas i los dasyos, tambien se dyo la posibilidad para djente de todas relijiones de lavorar en servisio del governo i en el askerlik.
Ma, en el fin del mizmo anyo (1856) se adjuntaron los Kadis de Monastir i publikaron una Patwa ke las reformas del Sultan kontradiktan a la Alaha musulmana.
Yine, las reformas kontinuaron, i en los Bate-Din de los Jidyos kedo solamente la autoridad de okuparsen en kestiones de matrimonios. Bueno, no es ke tenemos derito de kesharmos sovre esto, siendo ke en Israel tambien, el Bet-Din Rabani, esto es lo ke le kedo en mano.
Monastir gozo desde 1856 algunos 7 o 8 anyos de prosperidad:
El Estado Mayor Militar del Sultan en Makedonia se instalo en Monastir, i este fato fasilito komersio libre, i pasaje seguro de karavanas; se dezvelopo la industria i los kontaktos komersiales kon los paizes vizinos, i ayinda mas se mijoreo, kuando Monastir fue konektada a la sistema del telegraf.
Ma, poko turo la alegria.
En 1864 se separaron los Albanezes del imperio otomano, i Monastir pedriyo su pasaje a la mar, i torno ser una sivdad isolada.
Al pareser ke el kristianizmo bushka a ver ande egziste mizeria i provedad:
Desde la metad del siglo 19, funksionaron en Monastir misyonarios de variyas sektas kristianas.
Los esforsos de los misyonarios no reusheron, porke ningun jidyo no paso a ser kristiano; aunke un misionario de Scotland eskrivio en su raporto ke parvino entrar en todas las kazas de los Jidyos.
Ma, komo fue esto?
En 1863, en el fuego grande, se kemo kaje todo el kuartier jidyo, i muchos kedaron arrastando sin techo sovre la kavesa. Peor de peor, desbrocho una magefa de Tiphus.
Aki es ke vinieron los misionarios en ayuda a los muadjires, i ansina es ke konvensieron a unos kuantos de eyos de mandar sus ijos, i ijas tambien, a las eskolas kristianas en la sivdad.
De la otra parte, el rabino Yaakov Yisrael, i otros Judyos eskrivieron letras al Sir Moshe Montifiore.
Montifiore izo una akojeta entre los Kales en Londra i tambien adjusto moneda de su kasha privada.
Un anyo despues (1864) empeso la Alliance bushkar kaminos para fraguar eskolas judias en la sivdad, i en el mizmo tiempo los Shefes de la komunidad en Monastir
rogaron al komite de los Kales en Londra ke les ayuden a fraguar de muevo el Talmud Tora i los dos Bate-Midrash ke se kemaron en el ensendio grande.
Ma, los de Londra refuzaron a ayudarles porke kijeron ke se avrieran en Monastir eskolas modernas, i no Yeshivot o Talmud Tora.
Bien entendido, ke los misyonarios «toparon kazal sin perro», i empesaron a fraguar varyas eskolas en las kualas estudiavan ninios Bulgaros, ma tambien i Judyos.
En jeneral, la situasion socio-ekonomika de los Jidios de Monastir era en un nivel muy modesto. Afilu los kales ke avian en la sivdad, aparte de los kales de Portugal i de Aragon, eran no mas de un edifisio chiko o a vezes una uda en la kual se adjuntavan los Yehidim para azer tefila.
Avia la kehila de Hevra Kadisha,
Tres kales al nombres de famiyas de LEVI:
El kal de haham Yitzhak Levi /Shelomo Levi/Yehiel Levi
El kal de Aroesti
i el Kal para ninios i eleveos en el Talmud Tora.
Me demandan a vezes, i me demando i yo de mi para mi:
Komo podieron rezistir i bivir los jidiyos de Monastir, i de otros lugares, en provedad, en problemas de parte de los governos, o en tiempos de gerras.
Me parese responder en dos kozas ke sosteneron a los sefaradim en todas las estadas ande bivieron.
La una la topo en el pasuk en Tehilim 119:
לולי תורתך שעשועי, אז אבדתי בעניי
«Si non era tu Ley mis divirtimyentos, ya me uviera deperdido de tanta sufriensa».
La otra koza ke los izo mantener la kavesa endriva de las- aguas-de-rios-furyentes fue el senso de umor, el tipiko umor sefaradi ke topa siempre algun aspekto alegre o umoristiko en kualkier situasion.
En una de las fojas ke tenesh en mano vos do una kurta konsejika para gostar un pokito de este umor Judyo de los Balkanes.
En el Akuerdo de Berlin despues de la gerra (1878), el Imperio Otomano salyo muy eskorchado, i muchas territorias evropeas del Imperio ganaron la independensia
(komo Serbia, Bulgaria, Montenegro) ma tambien partes de Romania i de Herzogovina ya no eran mas basho el reino del Sultan.
En toda esta epoka, asta la revolusion de los Djovenes Turkos, estos eran dias de espertamiento nasional entre los Judyos tambien, i egzistiyan impulsos grandes al enkontro del progreso, a la edukasion, i al dezvelopamiento en jeneral.
En el anyo de 1894, la povlasion de Monastir kontava algunos 65000 personas, (la metad de eyos eran gregos) i la komunidad Judia – 6000 almas.
Ma en todo este periodo, en una manera bien permanente, egzistiya una imigrasion kalma de Jidyos de Monastir a la direksion de Salonik, kien para topar lavoro, kien para bushkar su mazal i kazarse.
Los Jidyos kaje todos saviyan avlar en turko i en grego tambien. Ma su lingua prinsipal era el ladino. Todos los Jidyos de Monastir guadraron la fe Judia i la tradision,
malgrado la mala situasion ekonomika.
En este mizmo anyo de 1894 desbrocho en la komunidad un rebelion kontra las pokas famiyas rikas.
El shefe de la revolta era el Sr. Ovadia Yosef Ferrera diziendo ke los rikos no se okupan del hal negro de los proves. Dunke, el, fondo la asosiasion «Ozer Dalim»: una koza semejante a lo ke konosemos oy komo «Kupat Holim».
Otra una institusion se yamava «Matanot laEvyonim – Menza de elevos proves» ke despartiya kada dia almorzos a 200 ninios.
Apropo la palavra «menza», ke muchos de mozotros la konosemos del bufe de los estudyantes en la universidad, esta palavra poko se uza en ladino jeneral, ma es bien konosida entre los Jidyos de Monastir.
El dasyo ke kada uno en la komunidad de Monastir pagava kada mez, segun su poder ekonomiko, se yamava «Pecha». El verbo «pechar» (a vezes sin saver su orijin) se uza en Ladino por dizir «pagar koza kontra tu veluntad».
O por egzempio, si rompites koza en alguna butika o en algun restorant, deves de pecharlo.
Otro un ensendio grande okurio en la sivdad en 1898, i kemo a todos los «kurtijos» de los Jidios. El ke ayudo mucho a los proves en esta situasion era el Baron Hirsh,
ke aki, en las eskolas de Israel, kaje ke no se nombra, ma el ayudava a Judios en muchos paezes no menos, i talvez mas ayinda, del Baron Rothschild.
Aki vengo a dizir unas kuantas palavras sovre el rolo ke djugo el movimiento Sionista en Monastir i en otras komunidades de los Sefaradim en los Balkanes.
Los Djudyos sefaradim no asperaron a Herzl o al movimiento Sionista para ser Sionistas (amatores de Sion). Durante todas las jenerasiones, mezo personajes komo David Alroi, o Shelomo Molho, David haReuveni, Donia Gracia Nassi, o afilu Shabtay Sevi, trataron de topar akuerdo kon reyes i Sultanes, para tornar a bivir en Erets Yisrael independiente.
Ma desharemos epokas tan antiguas;
el rabino Yehuda Bivas (nasido en Gibraltar) ke era el Rabino de Korfu en 1805 ya izo propaganda i se enkontrava kon diplomatos en la kestion de tornar a la Tierra Santa. El Ribi Yehuda Alkalay, ke nasio en Sarayevo eskrivyo un livro, «Minhat Yehuda», en 1857 kon un plano detalyado, i yamando a tornar a la tierra de muestros padres. Malorozamente, malgrado sus esforsos diplomatikos, parese ke no vino el tiempo de la Geula ayinda.
De toda manera, unos grupos de djovenes sefaradim, elevos de Ribi Yehuda Bivas i de Ribi Alkalay, vinieron a Erets- Yisrael durante todo el siglo 19, i se instalaron – lo mas en Yaffo.
Los sefaradim en los Balkanes, antes ke nasiera Herzl,
i indemas despues ke Teodor Herzel mos propozo a bivir en Uganda, tuvieron la aspirasion de tornar a Sion.
Vos kantare una estrofa del imno de estos djovenes de los balkanes:
אלפיים שנים כבר עברו מיום שאנו נודדים
מכל מקום ומקום גורשנו, ואחינו כולם שדודים
הפעמון מצלצל, לציון נשוב.
שירו נא אתי אחי, נשוב נשוב נשוב
שירו נא אתי, אחי, נשוב, נשוב, נשוב !
El movimiento Sionista, en su arrogansia, inyoro, i ayinda – asta oy – no se da kuenta por entero ke todos akeos kabalistas «lokos» i fantazistos, (komo asi mos ambezaron en las eskolas aki), demostran el dezeo permanente de muestro puevlo a tornar a la tierra de muestros padres.
El movimiento Sionista «reusho» (guay de esta reushita) a dar al mundo la impresion ke los Jidyos empesaron a vinir aki, antes no mas de 130 anyos, para rovar i tomar por fuersa el pais de los arabos.
Un yerro fatal.
Ma esto no es todo:
El Sionismo muevo nasio en Rusia i Polonia komo una reaksion kontra la tradision Judia, i esta tendensia Sionista impedio a miles i miles de Jidyos Sefaradim de adjuntarsen al movimiento.
Malorozamente, no tenemos medios seintifikos para provar agora kuantos Jidios sefaradim ezitavan de adjuntarsen al movimiento Sionista tan laiko, tan radikal,
I talvez podiyan bivir oy aki kon mozotros.
De toda manera, mos kontan ke en 1909, vino en Monastir el senyor Yosef Uziel de Salonik i konvensio a muchos djovenes de Monastir a interesarsen en el Sionismo.
Sierto ke los ke imigraron, i izieron Aliya A Erets Yisrael, entre 1909 asta 1939, eyos son los verdaderos sovrebivientes de la Shoa, del Olokosto, ke apanio a muestro puevlo tres dekadas despues.
En 1912 i en 1913 desbrocharon una detras de la otra dos gerras konosidas komo las gerras de los Balkanes:
La primera, entre Grecha, Bulgaria, Serbia i Montenegro kontra la Turkia. I despues, kon un kurto armistisio ke turo egzaktamente un mez, empeso apansis (supito), una gerra entre Bulgaria, la ke atako a Serbia i a Gresia.
Kaje ke no mos importa kien gano i kien pedriyo terrenos i territorios en estas gerras, ma siendo ke estas gerras tomaron lugar en Makedonia, fueron los Jidios del paiz los ke sufrieron mas de todos.
Las fuersas de Serbia konkistaron a Monastir; todo bueno esta, ma butikas i magazenes de Judyos fueron sakeados.
La Gerra Mondiala la Primera desbrocho en 21 de Junio 1914, achakes del asasinato del princhipe Austro-Hungares por mano de un djoen Bosnio. Ma esto fue no mas de un preteksto i no mas. Siempre en kulakier gerra ay otros intereses eskondidos.
Lo ke kiero notar espesialmente es ke los Bulgaros eran en esta gerra aliados de Almania, Austria, (Hungaria) i Turkiya.
En la segunda Gerra mondial, una vez mas, Bulgaria tomo el lado de Almania. Ya lo avlaremos un poko mas adelantre.
En Desembre 1915, kayo Monastir en manos de los Bulgaros; de la otra parte Monastir fue bombardeada por los Fransezes; asi ke uvieron muchos feridos i muertos entre los sivdadinos.
Uno de los rezultados de la Gerra, ke se termino en 1918, fue la fondasion de la Yugoslavia, i de la otra parte Bulgaria ke pedriyo en la gerra toda la kosta de la mar Egea, i tambien fue ovligada de pagar indemnitas muy altas.
Una de las primeras kozas ke izo el governo de Yugoslavia fue de tornar ofisialmente al nombro slaviko de la sivdad de Monastir, i desde agora yamarla Bitola.
Ma a lo ke toka a la situasion de los judyos en Bitola nada no se troko. O mijor dizir, el hal se izo mas i mas negro.
Kazas, inkluye eskolas, eran totalmente derrokadas, i la parnasa fue muy muy zor. Muy difisil.
Los djovenos judios eran organizados en varios movimientos komo «HaSomer haTsayir», Kahol-Lavan», «Ahdut haTsofim», ma tambien muchos Jidyos djovenos se adjuntaron al partido komonista de Yugoslavia.
Los aktivistas Sionistas izieron todo lo posivle a konvenser a los Judyos de deshar todo i imigrar a Erets Yisrael.
El Rabino de la sivdad desde 1924, Shabetay Jaen, izo esforsos para topar lavoros para los djovenos ke izieron Aliya, ma no siempre kon reushita, i avian kavzos ke djente tornaron atras a Yugoslavia.
Shabetay Jaen salyo a la Amerika para tratar de obtener ayuda de los Monastirlis ke biviyan aya. No se a tanto reusho, ma enmientres – el, personalmente desidio de no tornar a la sivdad, i ansi desho a la komunidad sin pastor.
Ay muchos apresios entre los Monastirlis por Leon Kamhi, uno de los lideres de la komunidad, i aktivista Sionista ke izo todo lo posivle en favor de Aliya a Erets Yisrael. Naturalmente ke i el, Leon Kamhi, kijo azerlo kon toda su famiya, ma se konsentio ovligado de kedarse en la sivdad komo el kapitan en un vapor ke estava para baterearse.
En mientres, en los anyos 1938-39, el governo Yugoslavo kito leyes ke diskriminaron demasiado a los Judyos.
La situasion ekonomika i sosiala fue terrible.
La gerra mondiala segunda empeso en 1939, i en 1941 ya entraron los almanes a Yugoslvia.
Makedonia fue entregada a los Bulgaros, kaje toda la armada Alemana salyo de Makedonia, i askyeres Bulgaros entraron al paiz. Los Bulgaros dominaron a toda Makedonia desde la invasion de los Alemanes asta la fin de la Gerra.
Todas las limitasiones sovre los Judyos de Monastir, komo ya mos fue kontado muchas vezes en otras sivdades, en otros paizes, fueron kargados sovre los Jidyos de Monastir. I komo siempre, segun la sistema satanika de los Nazistas eyos izieron konsentrar a todos los Judyos en un chiko kuartier, i segun las muevas leyes anti-judaikas del governo Bulgaro, echaron dasyos muy pesgados sovre los Judyos, i el plano fue, komo de verdad ansi se realizo, de konfiskar todos los bienes de los Judyos, i despues eksterminarlos.
Muchos djovenos djudyos en Bitola demandaron a adjuntarsen a los partizanes, ma fueron refuzados. La razon fue -al menos komo les eksplikaron los shefes del partido komonisto- ke el apoyo i el ayudo ke pueden dar los mansevos adientro de la la sivdad sera mas valuable de las gerilas en la frontierra.
En Desembre 1942 el governo Bulgaro eksilio a los lideres de la komunidad de Bitola a varios kazales leshanos en Bulgaria la vieja, esto kon el buto de deshar todo en keos, i para azer mas kolay al embiyo de los Judyos a los krematorios.
Los Bulgaros, djuntos kon los Alemanes, planearon «la final Solusion» de los Judyos de Makedonia, i ansi kon enganyo ke los estan mandando a otra rejion en Bulgaria, fueron mandados todos 3342 almas de Judyos de Monastir (ansi kon miles de Judyos de Makedonia i Trakia = Bulgaria la mueva) en un kampo de konsentrasion en Skopia (en la fabrika «Monopol» del governo Bulgaro), i de ayi al kampo de ekterminasion de Treblinka.
Jamila-Andjela Kolonomos de Skopia, eskrivio en ladino un livro yamado «La rezistensia i los Judyos de la Makedonia». Jamila gerreo komo kolonel kon los partizanes, i mos konta por muchos djovenos Judyos, entre eyos djovenos de Monastir ke gerrearon kontra los Nazistas (unos de eyos salvaron, otros toparon la muerte en las batalias).
להזכיר את הסיפור מתוך הספר של ג’מילה
Los ke salvaron del destino amargo en la Shoa fueron los Monastirlis ke imigraron entre las dos gerras mondialas a varios paizes de los Estados Unidos (en Nueva York, Indianapolis i Rochester).
La absorpsion ayi, afilu entre los sefaradim no fue fasil por modo del aksento Monastirli tipiko. Ma kon el tiempo se adelantaron ekonomikamente i los Monastirlis i fondaron komunidades aktivas.
Desde 1900 empeso imigrasion de Monastir a la sivdad Tamuco en Chile. Oy ay una komunidad grande de Monastirlis en Santiago de Chile tambien.
Los ke imigraron en varyas epokas a Paris, o a Salonik,
Florina i Kastoria, toparon el amargo destino de los Judyos de estas sivdades desgrasiadas.
En Erets Yisrael, mansevos monastirlis se adjuntaron a varios Kibbutsim komo
Alonim, Ashdot Yaakov i Shaar haAmakim.
שער העמקים, אשדות יעקב, אלונים
No todos kedaron en los Kibbutsim. El karakter Sefaradi, por muchas razones, no parviene estar orozo i kontente – 22 – en la atmosfera demaziada liberal i komunal de los Kibutsim de al tiempo. Ma avian Moshavim en los kualos se instalaron djente de Monastir komo Magshimim, Kfar Sirkin, Betset i mas.
כפר סירקין, מגשימים, בצת, ועוד
Komo ya lo avlimos, siempre avian en Erets Yisrael Judyos de todas partes del mundo. Ma desde 1839 ya savemos sovre komunidad organizada de Monastirlis en Yerushalayim.
En 1888 fraguaron Kehila yamada «Yagel Yaakov» i otra kehila yamada אהבת חסד La kehila «Yagel Yaakov» es al nombre de uno de los livros del Rabino Monastirli Yaakov Yisrael.
Entonses, terminare kon el pasuk ke kontiene los nombres de estos dos livros:
מי יתן מציון ישועת ישראל.
בשוב ה’ שבות עמו,
יגל יעקב
ישמח ישראל
(Tehilim 14)
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
