eSefarad Noticias del Mundo Sefaradi
Ver todos los artículos de esta sección
Bendision de kandela de Hanuka
A la rekuesta de una buena amiga, kopyi de un Siddur viejo i “konsumido” (Vienna 1891), la bendision de kandela de Hanuka, i ize la transliterasion a letras latinas.
Ke las bendisiones las estas vos serviran por muchos i buenos anyos!
Yehuda
* * *
Bendicho tu Adonay nuestro Dio, rey de el mundo,
ke nos santifiko kon sus enkomendansas i nos enkomendo por ensender kandela de Hanuka.
Bendicho tu Adonay nuestro Dio, rey de el mundo,
ke izo milagros a nuestros padres en los dias los estos i en el tiempo el este.
(noche primera dira tambien bendision esta):
Bendicho tu Adonay nuestro Dio, rey de el mundo,
ke nos abediguo i nos sostuvo i nos ayego a el tiempo el este.
Las kandekas las estas nos ensendientes sovre los milagros,
i sovre la rehmision, i sovre las baraganiyas,
i sovre las salvasiones, i sovre las maraviyas,
i sovre los konortes ke izites a nuestros padres en los dias los estos,
i en el tiempo el este, por mano de tus kohanim los santos.
I todos ocho dias de Hanuka, las kandelas las estas, santedad eyas,
i non a nos lisensia por servirmos kon eyas, solo por verlas tan solamente,
para loar a tu nombre sovre tus milagros i sovre tus salvasiones,
i sovre tus maraviyas.
Yehuda Hatsvi
Erets Yisrael
————————————————
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
