eSefarad Noticias del Mundo Sefaradi
Ver todos los artículos de esta sección
Rekuerdos sovre supertisiones
Desde mi chikez me ambezaron en kaza de no “embelekarme” en supertisiones.
Yene, me kontavan por mi nono/avuelo en Salonik ke kulaneava una sola supertision: En dias de alhad, empesijo de la semana, sea lo ke sea, el evitava de merkar koza en la farmasia.
Me da a pensar ke tiene un poko de semejansa al refran sefaradi: “El buen dia, (o la semanada…), se ve de la maniana”.
De toda manera, asta oy, yo no yevo kon mi ambaras blu o de kolor siel, i no tengo en mi kaza el amulet “mano de Hamsa”.
Desde la alvorada de la estoria umana, las personas uzavan a echar sus miedos sovre los animales. Eyos elijieron algun animal ke les paresiya eskuro i ostil. Por enshemplo, la piola/lechuza/kukuvaya o sovre la kuerva/graja, i naturalmente sovre gatos pretos.
Asta oy en dia, de vez en kuando, se puede oyir a la djente avlando de gatos komo kriansas egoistas, anti-sosiales, torpes.
Me akodro de un dia en la eskola primaria, al pareser fue esto en el anyo 1940. La maestra entro a la klasa, yevando kon eya un elevo muevo, i lo prezento kon estas palavras:
– «Este es Felix, muevo venido de Almania. Su nombre judio es Pinhas.
El entiende un poko el ebreo, ma tenemos todos el dover de avlar mucho kon el, para ke sepa bien muestra lingua”.
I na ke la maesta lo asento a Pinhas al lado de mi, aun ke eya savia bien ke yo no era algun parlantino.
Un dia me demando Pinhas: – “Es verdad ke ay mala suerte si algun gato preto se traversa en mi kamino?”
Yo le respondi kon lo ke mi madre me avia dicho: “Depende. Depende si sos benadam o raton”.
Pinhas se ofendio, i se enojo kon mi.
En akel tiempo yo no savia ayinda ke, jeneralmente, los tudeskos (aun ke judios) no arreyevan shakas.
Tuve de afalagarlo a Pinhas kon eksplikasiones, asta ke aparesyo una sonriza en su kara.
Unos kuantos anyos despues meldi (en ebreo) un livro de Edgar Allan Poe, una koleksion de istorias de orror, entre eyas la istoria de “Gato preto”, ke halis me estremesyo.
En estos dias, meldi de muevo esta istoria, en entrando a la Internet.
החתול השחור – אדגר אלן פו
Si keresh, podesh meldarlo en Espanyol: El gato negro – Edgar allan Poe o, tambien en inglez: The Black Cat (poe) – Wikipedia
* * *
En la semana pasada, dia de alhad, a la maniana, le telefono muestra vizina de al-lado, a mi mujer, rogandole kon una boz de hazina, ke le merke una sierta melizina.
Dunke, kiero no, me toko a mi de ir a la farmasia.
Me maraviyi de notar ke un mabul de djente, mucho mas de lo uzual, ya estavan apozados en una sira/linya larga, en akel dia despues de Shabat, esperando a merkar algo.., Guay! Tuve de esperar ayi mas de media ora irritante, asta ke, en fin, vino mi torno.
Ma, enmientres, tengo agora la impresion ke ya entendi el preteksto ke avia topado mi avuelo para no irse a la farmasia en dias de alhad.
Semanada buena!
Yehuda Hatsvi
Erets Yisrael
————————————————
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
