eSefarad Noticias del Mundo Sefaradi
Ver todos los artículos de esta sección
Komo mundar la agranada
La Tora (en Devarim 8, 7) glorifika i alava a los frutos de la Tierra Prometida: “Tierra de trigo, i de sevada, i de vides, i de igeras, i de agranadas; tierra de olivar de azeite, i de miel”.
Oy, en Erets Yisrael, grasias al Dio i a muestros agrikultores, ay una abundansia de otras mas i mas frutas.
Yene, la agranada/mangrana es una de las frutas preferidas.
En las berahot de “Yehi Ratson” en Rosh aShana, tenemos la bendision sovre la agranada (“Rimon”, en ebreo):
“Ke se muchiguen muestras Zehuyot (o, tambien, muestras Mitsvot) komo la agranada”. (la agranada kontiene una multitud de granos, dulses i savrozos).
Ay kien kreen ke la agranada kontiene egzaktamente 613 de estos granulos; djustamanete 613 es el numero de las Mitsvot ke en muestra Ley…
La agranada kontiene vitaminas i minerales por el bien funksionamiento del puerpo. Indemas, komo ya lo savemos, es un fruto muy savrozo!
Ma, ke se aze para mundar la agranada? A prima vista parese un pokito komplikado, ma NO!
Aki tenesh dos enlases (uno en ebreo, el otro en turko) ke mostran djustamente komo mundarlo al Rimon (la agranada/mangrana) sin mucho esforso.
Beraha i Salud!
————————————————————-
Aseret Yeme Teshuva
Yehuda Hatsvi
Los diez dias entre Rosh aShana i el Dia de Kippur se yaman en muestra tradision judia: “Aseret Yeme Teshuva” (“Los diez dias de arrepertimiento”).
La Prof. Nehama Leibovich (1905-1995), komentadora famoza de la Biblia, mos avia kontado en una de sus konferensias rekuerdos de su chikez:
“En mi chikez, mos disheron en la eskola, ke ay de komportarmos muy bueno, espesialmente en los diez dias entre Rosh aShana i Kippur.
En kaza, mi padre me disho ke es djusto, ma no menos djusto es de komportarmos bueno entre el dia de Kippur i el Rosh aShana”.
Gmar Hatima Tova!
Yehuda Hatsvi
Israel
————————————————
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
