eSefarad Noticias del Mundo Sefaradi
Ver todos los artículos de esta sección
El livro de Kronikas (Divre aYamim)
Yehuda Hatsvi
Muestra Biblia kontiene 24 “livros”. El ultimo livro ke aparese en la Biblia es el livro de Kronikas (Divre aYamim), divizado en dos partes, ke mos dan una deskripsion konsiza de la estoria de muestro puevlo asta el anyo 538 (antes del “kalendario sivil”).
El ultimo kapitolo de Kronikas mos konta, i mos aze akodrar, ke en el tiempo de muestro rey Yehoyahaz (-486), el rey de Ayifto lo kito de enreynar en Yerushalayim, i empozo pecha sovre el pais, i el rey Yehoyahaz fue ekspulsado a Ayifto.
Despues de 11 anyos, en el tiempo del rey Yehoyakim, suvio kontra el, Nevuhadnesar, rey de Babilonia, i lo ato kon kadenas, para yevarlo a Babilonya.
Ademas, el sakeo una kantidad de atuendos de oro del Bet aMikdash. Tres mezes despues, Nevuhadnesar invadio una vez mas, i izo ekspulsar al rey Yehoyahin (un ninio de ocho anyos) i kon el, muchos de los nobles de Yehuda i Yerushalayim (en el anyo –597).
En el anyo 586 (antes del kalendario sivil) el rey de los kaldeos konkisto de muevo el pais, sakeo todos los trezoros de la kaza de Adonay, izo kemar el Bet Amikdash, i a todos los sivdadinos ke kedaron de la espada, yevo en kativerio a Babilonia, “asta enreynar el reyno de Persas”.
Segun la profesia de Yermiyahu (29, 10): “Ansi dize Adonay: kuando se kumpliyaran a Babilonya setenta anyos, Yo vos vijitare i afirmare sovre vozotros mi buena palavra, para azervos tornar a vuestro pais”.
En el anyo -539, el reynado persiano konkisto a Erets Yisrael (de mano de los Babilones), i ansi mos kontan en el ultimo paragrafo de la Biblia:
“I al primer anyo de Koresh, rey de los Persas (en el anyo 538 antes del kalendario sivil), para ke se kumpliyera la palavra de Adonay por boka de Yermiyahu, desperto Adonay el espirito de Koresh, rey de los persas; i izo pasar pregon por todo su reino, i tambien por eskrito, diziendo: ‘Ansi dize Koresh, rey de los persas: Todos los reynos me dyo Adonay, Dio de los sielos. i El me enkomendo de fraguarle kaza en Yerushalayim, ke es en Yehuda.
Kien ay entre vozotros de todo su puevlo?
Adonay su Dio sea kon el, i suva (a Erets Yisrael).”
Sigiendo la deklarasion de Koresh (Ciro en Espanyol, Cyrus en ingles), tornaron al pais kaje 42000 de los egziliados de Babilonia.
En el anyo –516 se fraguo el Segundo Bet Mikdash.
Semanada buena i klara!
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
