eSefarad Noticias del Mundo Sefaradi
Ver todos los artículos de esta sección
El Piyut «Akdamot Milin»
Yehuda Hatsvi
Por kontarvos sovre el Piyut “Akdamot Milin” (“Prefasio de palavras”), prefero de empesar kon una lejenda judia.
Segun esta lejenda antigua, egziste en el mundo, mas aya de las “montanias de la eskuridad” un rio misteriozo, ruidozo i furiozo, ke yeva aguas i arroja piedras todos los dias de la semana, ma en dia de Shabat, el rio repoza i detene su korriente.
En realidad, el nombre ebreo del rio es SHABATion, ma en meldando i kopyando (en forma yerrada) los eskritos gregos, el rio “troko” su nombre a Sambation.
En el Talmud Yerushamli mos kontan ke un komandante romano demando a Rabi Akiva: “Komo savesh por seguro ke el “dia seteno” nombrado en la Tora, es el dia propio del Shabat vuestro?”
Rabi Akiva le respondio: “El rio Sambation lo demostra!!”
Esta firme repuesta de Rabi Akiva mos demostra a tanto fuerte fue la emuna (kreensia) ke tal rio realmente egziste.
Indemas, de esta lejenda kresieron otras mas lejendas kontandomos, ke aya leshos, al otro lado del rio, biven kon paz i bienestar los “diez trivos perdidos de Yisrael”.
Entonses, no vos maraviyesh si afillu el Piyut sakro “Akdamot Milin” tiene tambien un atadijo lejendario al rio de Sambation.
Mos kontan komo un maase, ke un tiempo, avia un papaz ichizero en la sivdad de Worms en Alemania ke
kavzava mucho mal a los judios.
Una noche se sonyo Rabi Meir, ijo de Rabi Yitzhak Nehorai, ke un buen judio de los “diez trivos” es kapaz de venser al tal papaz malo. Estonses, Rabi Meir tomo sovre si la mision importante i salyo, djuntos kon un grupo de judios, a bushkar al judio savio ke morava al otro lado del rio Sambation.
En kurto, akel judio vino a Worms, i a la prezensia del rey reusho a venser en el debate kon el papaz, i trusho alegria i gozo a los judios.
Asta aki las lejendas!
El Piyut “Akdamot Milin” fue kompozado en arameo por Rabi Meir Nehorai, (en el siglo 11). Rabi Meir fue uno de los maestros de Rabi Shelomo Yitzhaki (Rashi) en su chikez.
En todas las komunidades de Ashkenazim, este Piyut se kanta kon mucha devosion en el primer dia de Shavuot, antes de meldar los Diez Mandamientos ke en la Tora.
Es muy kuriozo, ke la kostumbre de meldar los Diez Mandamientos no egziste entre mozotros, Sefaradim, ni el Piyut “Akdamot milin” no entro en las orasiones de las komunidades sefaraditas.
“Akdamot Milin” da alavansas al Dio por krear al mundo, a sus andjeles para servirlo i a su puevlo Yisrael para loarlo.
Tambien deskrive el debate kon las nasiones del mundo ke pushan al puevlo de Yisrael de abandonar la fe.
Me, los ijos de Yisrael responden ke tendremos siempre la grande esperansa de ver la salvasion del puevlo.
* * *
En el primer enlase (link) ke vos do aki, toparesh el teksto en arameo, kantado por el hazan Hayim Burstein, al uzo de los Hassidim de Breslev.
En el segundo link se kanta el Piyut en su akurtada traduksion al ingles (i kon rimas henozas).
Moed alegre ke tengash!
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
