eSefarad Noticias del Mundo Sefaradi
Del anyo 1941 fin a 1948 bivimos en la Pansyon Nishan lokalizada en las eskaleras ke atavan la kaye Shishane al primer Tunel chiko solo de medio kilometro.
En esta pansyon chika solo de diez kamaretas, bivia en la kamaretika la mas chika una persona ekstraordinarya, bivda, sin kreatures i kaje sin paryentes. Eya se yamava Ester Levi (de bendicha memorya). Yo lo yamava Madam Levika.
Eya era aedada, bien vistida i bien peynada, tenia una sonriza ke kaje no le mankava en la kara.
Kuando mi madre (d.b.m) tenia de gizar en el mupak, ke se topava afuera de la kamareta, u si tenia de irse al doktor u ande una tia ke morava serka, Madam Levika viniya i le diziya a mi mama «tu perye kudyado yo tengo muncho de kontarle a tui ijo i kon su boz dulse eya empesava a kontar i kantar.
Eya me kontava de las famiyas Izmirliyas ke konosiya. En sonriendo me diziya «Yo so la muhtara» de los Izmirlis ke biven en Estambol. I yo malgrado mi edad chika la entendia muy bueno. Porke akeyos anyos, kada prensipyo de mes mos ivamos al muhtar de la maale para tomar «vesika de pan» kon las kualas puediamos merkar el pan del orno.
Eya me kontava de la personalidades grandes ke avian salvado
la Turkia de los inimigos, komo Ataturk, Padre de los Turkos.
Madam Levika fue la primera persona ke mos dyo los haberes (novedades) del «Varlik Vergisi» (Dasyos de Rikeza) ke fueron metidos solo a los non muzlumanos
para estruirlos ekonomikamente.
Para darmos un poko de moral mos kantava una kantika ke se avia ambezado u
eya mizma avia enventado:
«Mozos kon este varlik,
Komimos grande kazik.»
Kuando pasi la «Difteria» me era defendido de salir u resivir por 40 dias. La munisipalidad avia apegado un papel a la puerta de la kamareta. I ken es ke viniya para akompanyarme? Solo Madam Levika.
Eya me kantava kantikas. En la memorya me kedo solo «Delgadinya» ke yo dizia «Delgadilya perra mala». Es anyos despues ke enkontri a esta romansa en el livro de la senyora Matilda Koen Sarano.
Los vizinos me diziyan en riyendo tu profesora ya vino. Ma avia solo una vizina ke se selava de eya i la yamava la “yeveze» u avlistona. Kuando un dia Madam Levika sintyo esto, le disho a la vizina «el Dyo ke te apiade.»
Mashalla, Madam Levika era una persona muy sana.
I eya adjustava en sonriendo no tengo paras para gastar a estas bavajadas.
Eya era muy bedjerikliya (kapache). Se trikotava bluzas i djaketas de las lanas ke tenia u bozdeava (gastava) i trikotava de las bluzas vyejas ke tenia en la mano. I kon la riza ke no la mankava en la kara diziya «Yo devia ser la Ministra de la ekonomiya.»
Eya mos vino kon una kara sonriendo ke no aviamos visto fin akel dia.
Aviya vinido para darmos el «mujde» (novela buena) ke su ermano ke se topava en la Palestina le mando paras mezo la posta. I todos mos aviamos gustado de verla tanto oroza.
La demanyana, Madam Levika bevio un kafiko chiko, se fue kon adjele (asigo) a la sentrala de la posta ke se topava en Galatasaray, no tan leshos de la Pansion.
Despues unas dos oras, eya torno atras yorando «los ojos abufados i adolensyada
de yorar» komo diziya eya. I le empeso a kontar a mi madre un chiko sekreto de famiya. Su padre sea por neglijensia sea por espanto de ir a las otoridades del Sultan avia dado a Madam Levika la karta de identidad de la ermana grande ke avia nasido antes dos anyos i supito se avia murido.
Los vizinos le akonsejaron de eskrivirle una letra al ermano i eya aviya dicho, «al dezmazalado no le kamina ni el kavayo.»
Los dias de la sigunda guerra mundial eya mos dava pasensya en dizyendomos,
«kuando muncho eskuresa es para amaneser.»
En 1945 a la fin de la sigunda guerra mundial empesaron a fraguar en Shishli i Nishantash, kuartieres leshos de la Kula. Las famiyas empesaron a enstalarse aya.
I en 1948 mi padre i mi madre (d.b.m) dechidaron de alkilar un etaj en Shishli, a fin de enrejistrarme a la eskola Franseza serka de kaza. Madam Levika me disho, «udjula te vas a ambezar el fransez komo se deve.» I kon la kreasyon del estado de Israel empeso la furya de La Aliya. En la Kula i Shishane munchas kazas kedaron vaziyas. Madam Levika topo una kazika serka de la pansion para alkilar.
Malorozamente, komo diziya eya, «ken nase kon mazal i ventura i ken kon potra i kevradura.»
Eya no puido gozar la kaza. Kuando mi madre se fue para darle la envitasyon de mi Bar-Mitzva, Madam Levika mas no estava en vida.
Autor
Leon Sason
Holon, Israel
