eSefarad Noticias del Mundo Sefaradi
Karos Amigos, sera para mi bastante difisil de pueder darvos a entender lo ke se realizo durante esta konferensia en pokas linias. Es por esto pensi ke seria djusto de aparejar 2 eskritas distinktas, en la primera darvos a konoser la Makedonia i espesialamente Skopje (Uskup), sus djudios, sus istorias i la situasyon aktual de eyos i del país. En una sigunda transmetervos un resumen de las sesiones de 3 dias enteros, las prezantasyones i diskusiones akademikas ke tuvieron lugar, los participantes i mas…
———————————————————————–
La Makedonia era una de las republikas federalas de la Yugoslavya dospues de la fin de la dominanasyon otomana, de la kuala se espartyo ay 19 anios para ser independiente.
Su povlasyon es un poko mas de 2 milyones de djente donde el 30 % son de orijin Pomak i musulmana, el resto de orijin Serbia i kristyana.
Oy en dia solo 200 djudios biven en el país, lo mas en su kapitala Uskup. Deke este kadar de poko, por la simple razón ke durante el Olokosto 97% de los 7800 Djudios fuerons matados o enforkados por los nazistas dospues ke los emplearon komo syervos en los kampos de la muerte de Treblinka.
Durante la sigunda guerra mondiala La Makedonia fue okupada por los Bulgaros aliados de la Alemania nazista, i fueron eyos ke incheron los vagones de bestias en arekojiendo debasho el kontrol de la Gestapo a todos los djudios del país. Difisil de pueder juzgarlos! Estos mismos Bulgaros malgrado toda la presyon de Berlin ke no dieron a sus djudios, komo achetaron a kolaborar para mandar otros djudios a la muerte? Situasyon ekivoka ke kreo una inimista entre la Makedonia i la Bulgaria, ke dura mismo oy en dia. Al prensipio del sieglo pasado siertos de los djudios de Ohri i Uskup para no servir en la armada turka se avian ekspatriado verso los países de la Amerika del sud, komo el Meksiko, Arjentina, Shile i mas. Para estos djudios ‘ladino avlantes’ la Amerika del Sud era ideal visto ke puedian komunikar en sus muevos paises fasilamente grasias a sus judeo espagnol. Kontan ke kreaturas djudias ke arivavan a Meksiko se maraviavan de ver tanto djudio(!) en las kayes ke avlavan una idioma semejante a las suyas.. Se puede dizir estos fueron los reskapados de la muerte ke kedaron djudios kon kustumbres balkanikas.
La elit de los djudios de esta parte de los Balkanes, era kompozada por lo mas de merkadores, doktores de medisina, avokatos i rabinos de alta sensia. Ademas avia una klasa media echa de vendedores de panyos en butikas, i otros ke vendían ropas en indose de kasal en kasal. La mayoriya de los djudios de Makedonia son de desendesya espanyola i una chika parte de la romaniota.
Muncho mas tadre eyos se enteresaron al Fransez komo lingua franka, ma pokos eran los ke avlavan el alemán. Esto kavzo grande prejudisyo porke no savian darse a entender, o por lo mas, no entendían lo ke se les dizia en esta lingua los nazistas. Esta situasyon se agravo en los kampos kuando los djudios de Evropa santral se alesharon de estos sefaradís ke no konosian el Yidish i en munchas sirkonstensias no miraron mizmo de ayudarlos. Dospues de la guerra, la Makedonia kayo en una grande proveda i todo lo ke apartenia a los disparesidos de los kampos de la muerta se deklaro proprieta del estado federal. Ansina un grande patrimonio djudio paso en las manos del rejimen komunista.
En 1963 Uskup se meneyo i se deroko kaji totalmente, en dechando en ruinas el baryo djudio ke se topava en el sentro de la sivdad serka del rio Vardar.
Disde la independensia el governo Makedoniano desidio de dar atrás kon siertas kondisiones el patrimonio djudio a la komunidad djudia del país.
Es ansina ke se fraguo el Sentro Memorial del Olokosto de los djudios de Makedonia. Un edificio model i ermozo, justo en medio de la sivdad serka del rio Vardar de 3500 m2 . A esto se ajusto un edificio igual para ser alkilado, fuente de dinero del sentro . Un muzeo se esta kreyendo al momento, i el sinyor Goran Sadikarijo CEO de la Fundasyon del Holokosto apuyado por un grupo espesialisto mira de desvelopar munchos proyektos de kultura en este sentro. Se espera ke serka kuarenta mil personas vijitaran en un anyo esta lugar. Sinyor Sadikarijo kere yevar este nombre a sien mil.
Mos rendimos kuento ke las Otoridades administrativas del país están keriendo, para azer adelantar la ekonomia del país , desvelopar un turismo siblado, i unas de las alternativas es el turismo djudio i israeliano. No ay duvda ke el dinamiko Goran Sadikarijo tiene todo el apuyo de su governo ansi ke el de Israel, partikularmiente de los sentros akademikos de los estudios sefaradís de las grandes universitades israelianas para reushir.
Koza unika en la istoria de la universitades israelianas Bar Ilan por primera ves grasias al Sentro Dahan i kon la asistensia akademika del Sentro Salti acheto de organizar esta konferensia en mando 36 elementos de su seno.
Selim Salti
