eSefarad Noticias del Mundo Sefaradi
por Rosina Karako Smeraldi
enviado a la lista LadinoKomunita
Surinam no es una izla, aze parte de Venezuela, i no en la mar Karibe, ma en el oseano Atlantiko.
Vos esto eskrivyendo sovre Surinam porke me atiro la attension meldando el livro de Harry Ezratty.
Fueron aki ke se asentaron los primeros sefaradim. Los istorianos toparon ke la primera emigrasyon de sefaradim ke formaron una koloniya fue antes de 1536 yamada TORARIKA derivado de la palavra «Tora rika».
Se topo una ketuva eskrita en Surinam en el anyo 1643. Un grupo organisado vinyeron de la Ingletierra en 1652 garanteados por el governador Lord Willoughby.
El enkorajo a los sefaradim ke se muden a esta parte tropikal, permetyiendo liberamente de praktikar la relijion, de konstruir sus moradas i de merkar terreno al deredor del riyo Cassipora para kultivar.
Es en Surinam ke enflorensyo una rika komunita de agrikultura yamada «Joden Savanna» (Savanna of the Jews)
Esta komunita teniya mezmo su militia kon el kapo Isaac Pinto ke peleyo kon los piratas i kon una koloniya franseza de Guiana.
Otros grupos de sefaradim vinyeron mas dospues de Recife kon el komandante David Nassi, yamado mezmo Joseph Nunes de Foureca
En 1665 la komunita azyendose grande pudyeron avrir la primera keila «Beraha ve Shalom (Blessing of Peace). Probabilmente era la primera keila del entorno.
En 1667 mas sefaradim se adjuntaron a eyos, ke fueron forsados afuera de la Guiana franseza kon el «code noire’.
Este grupo fraguo la segunda keila . En los rekordos de la Olanda indika ke aviya 100 famiyas judiyas, kaji 600 personas, 9 mil esklavos, 2 semiteryos, 2 keilas i munchas plantasyones en «Joden Savanna» en 1694.
En 1730 otro grupo de sefaradim vinieron de Livorno /Italia. El governo olandezo dyo terreno para ke se frague la tresera keila, Neve Shalom, se kompleto en 1720.
En 1731 los sefaradim donaron la keila a los askenazim kon kondisyon ke los ritos seygan al uzo sefaradim
Los sefaradim avrieron otra keila «Tsedek ve Shalom» i esta teniya el pizo de safra.
En el sieklo19 mas de 1500 personas biviyan en Surinam. Las kongresyones del kontinente nort i sud demandavan emprestimo de paras, ayudo de los hahamin i hazanes de Surinam
En 1792 David de Isaac Cohen Nassy, un doktor de Surinam, fue envitado a Philadelphia para ke ayude kon la epidemiya de «yellow fever», kayentura amariya. Fue el ke sugero de dar a los hazinos banyos yelados i otros tretamyentos para esta hazInura.
Oy lo mas de los sefaradim de Surinam emigraron a los Estados Unidos o a la Olanda. Los ke kedaron son misklados entre sefaradim i askenazim. Mezmo ay judios desendientes de los esklavos de Afrika.
En 1992 kitaron «pules» (timbros) komemorando los sefaradim kon los nombres de los patrones de las plantasyones: De Casseres, Nunes de Costa, De Silva, De Pinto.
Otros timbros mostrando las tombas de los sefaradim, otras kon eskrito «Sepharad», menoras, i shadayes.
De la keila «Beraha ve Shalom» kedo solo la fondasyon i siertas tombas viyejas en el simiteryo.
Kuando se eskrivyo este livro biviyan en Surinam solo 150 judios.
————-
Rosina tomó siertas partes de este livro para eskrivir a LadinoKomunita, el livro se lo dio el profesor David Siman (Z’L) en sus klasas de ladino.
Título orijinal: 500 YEARS IN THE JEWISH CARIBBEAN: THE SPANISH & PORTUGUESE JEWS IN THE WEST INDIES – ISBN 0-942929-07-1/1997
Fuente: LadinoKomunita
