eSefarad Noticias del Mundo Sefaradi
La primavera se siente en Izmir en medio del mez de Marzo.Yegando a April la primavera se va. Los ke pasan por Izmir tienen la impression ke hay solamente 2 temporadas.El verano i el invierno. Para respirar la gente se van a uno de los mijores lugares ke es KARATASH. Kon una historia de kaji 9000 anios es un lugar ande los Turkos i los Judios vivieron endjuntos por anios. Aki se topa un edifisio entre las kayes de MITHAT PASHA i HALIL RIFAT PASHA, kon un puente ke ata a las dos kayes. El edifisio tiene 155 eskalones para fasilitar la tarea.
Un hombre de echo «NESIM LEVI» konstruio en BAYRAKOGLU un ascensor en 1907. En 1993 lo metieron en la Munisipalidad de BUYUKSEHIR para restorarlo. El ascensor lavoraba antes kon agua .En 1985 lo hizieron lavorar kon elektrisidad. Este lugar attira la atension de los turistos lokales i extranjeros.
IZMIR es la sivdad ande nasio Dario Moreno, en una kasa de proves en MEZARLIKBASI en 1921. Su nombre verdadero era «David Arugete» i su padre lavoraba en la estasion de treno. El padre fue aharvado de una manera trajik i kayo muerto. Su madre al no poder okuparse de el, lo metio en una kaza de orfelinos ke se yamaba «Nido de Guerfanos». Su vida empezo una vez ke termino sus estudios primeros en la Eskuela Djudia. Se fue a lavorar al lado de los abogados komo sekreter i en su tiempo libre se iva a la Libreria Nasional para ambezarse el solo el fransez. Djusto en este tiempo se intereso tambien a la Gitarra. Despues se metio a djugar la guitarra i a kantar en las kayes para ganar su pan.
Kuando tenia 18 anyos, en la eskala de vapor, en el Klub de Konak, djugo en la shena. Las puertas de la fama se avrieron de esta manera. De ayi se fue a djugar en Palas Otel, indo despues a Istanbul i a Ankara para djugar en los kasinos. Tuvo la okasion de enkontrar al poeto «Orhan Veli» i los dos se izieron amigos. Despues djugo en la Orkestra de»Fritz Kertel» komo solisto por un anio i se fue a Atenas. De Atenas se dirijio a Fransia.
En los primeros anyos djugando en» Perto Del Sol Muzik Hol» no tuvo muncha reushita. Djugaba solamente en los klubes de los soldados amerikanos en Alemania.Tornando a Fransia, empezo a kantar la kantika de»Jezebel». En Cannes en el Otel Palm Beach kanto las kantikas «Adieu Lisbon, Cou,Couru Cou Cou» i kon las kantikas del calypso, empezo a ser un kantante bien konosido en el ekstranjero. Tenia el aire de uno del Mediterraneo, kon su bigote delgado,su kara redonda i sus kaveyos buklados. Su sonrisa era una kosa ke amaban los Turkos. Djente komo «Fecri Ebcioglu i Sezen Cumhur Onal» trokaron a unas de sus kantikas al Turko. Dario Moreno djugo en mas de 30 filmos.
En su testamento eskribio «Izmir mi dulse i amada sivdad. Si un dia me muero en un lugar leshos de aki, ke me traigan a ti. Ma en mi tomba ke no metan Dario se murio.Ke metan Dario esta durmiendo».
Su destino fue de morir en el Aeropuerto de YESILKOY en Istanbul. Se murio de una krisis de korason. Su madre kijo ke los funerales sean echos en Israel i asi lo enterraron en el Sementerio de Holon serka de Tel-Aviv.
Tradusido por Shimon Geron
Para Ladinokomunita
Abril 2013
Muchas gracias por el artículo. No conocía la vida de Darío Moreno y me maravilla saber de un hombre tan cosmopolita y amante de la vida.