eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
Segunla Halaha,ay ke ensender las kandelikas de hanuka mas demprano.
Emprimero, se ensiende la Hanukia i despues, las kandelas de Shabat. Ensendiendo las kandelas mas demprano, ay ke utilizar unas mas grandes para ke keden ensendidas, a lo manko, 70 o 75 minutos.
Si mos ulvidamos de ensenderlas de antes i la mujer ya avia ensendido las kandelas de Shabat, los ombres de kaza, ke dayinda no resivieron el Shabat, deven ke ensenderla Hanukia antes del tramonto del sol.
Ay ke meter tino i de azer la orasion (tefila) de Minha, antes de ensender las kandelas por ke esta orasion fue kompozada para trokar los uzos del sakrifisio ke avian en el Templo.
En el Templo azian los sakrifisios antes de ensender las kandelas de Shabat i por esta razon munchos uzavan a orar mas demprano el dia de viernes i despues de aprontarsen para Shabat.
El gran Rabino Ovadia Yosef dize ke mijor es de ensender las kandelas antes de la orasion de Minha, kon un Minyan, ke de orar la Minha i depues de ensender las kandelas de Hanuka.
El ke no tiene munchas kandelas puede ensender, a lo manko, una para ganar la Mitzva de Hanuka.
Los Hahamim fiksaron ke ay ke ensender entre el tiempo del tramomto del sol, despues ke la kava (ultima) persona ya salio del merkado, porke akeos dias, el kamino a kaza tomava muncho tiempo.
La mitzva sera kumplida si la kandela kedara ensendida, a lo manko, una media ora antes de la entrada de Shabat.
En los otros dias de la semana ay ke ensender las kandelikas despues del tramonto del sol porke antes de esto ay muncha luz afuera i no se puede ver sus flama. Ay ke meterla Hanukia en un lugar protejado, para ke Has Vehalila no se amate de un ayre o de la serradura de una puerta.
En Yerushalaim se tadra el ensendimiento de la Hanukia asta 20 minutos antes del tramonto del sol para ke se aga serka de Shabat i mezmo, si la ensendian mas demprano el ikar era ke el mirakulo de Hanuka sea publikado i visto i para ke la luz turara mas tiempo afin de alkansar i de verla kuando ya esta eskuro.
Si ay una Hanukia de alzeite ay ke mirar ke abasteska asta media ora despues de la salida de Shabat.
Si alguno tiene solo una kandela, por enshemplo: si el se topa en la prezion, o en un lugar aleshado, el ensendera la kandela de la Hanuka, i, despues la luz, para ke la kandela sirva tambien komo esta de Shabat.
Kuando se topan solo dos kandelas una sera para Hanuka i la otra para Shabat, mezmo si este es el segundo dia de la fiesta o los dias sigientes.
El ikar es de kumplir la Mitzva a fin de akodrar el mirakulo (el Nes) ke muestro puevlo tuvo i para ke la luz del Templo kedara para siempre.
Medi Cohen-Malki
