eSefarad Noticias del Mundo Sefaradi
Komo no tuvi la oportunidad de rengrasiar a Moshé Shaúl en la tadrada ke tuvo lugar en Yerushaláyim oy en su onor, por su plurima aktividad para el mantenimiento i el arrebivimiento del ladino, lo estó aziendo agora por eskrito. I ya se save ke Verba volant, scripta manent (Las palavras bolan, los eskritos kedan).
En verdá ke yo sé entre los primeros elevos de Moshé en el Kurso para redaktores de programas en ladino ke él organizó en el 1979. Me akodro la emosión de los días del Kurso, ke kitó de adientro de mí mi verdadera identidad, i a la fin del kual dishi a Moshé ke yo tinía unos kuantos kuentos de kaza en la memoria. Le demandí si devía eskrivilos. El me respondió: «Ke estás asperado?» I de estas palavras empesó mi aktividad de eskritora en ladino.
Naturalmente uzí la grafía establesida por Moshé, ke me fasilitó la manera de eskrivir i ke yeví en mis livros en todo el mundo.
Nunka no me vo ulvidar de «los días de Akí Yerushaláyim», porké de vez en vez ke devía salir la Revista, ke empesó después del Kurso, yo me metía i eskrivía sovre un muevo sujeto i asperava kon ansia de verlo publikado. Se puede dizir ke en «Akí Yerushaláyim» me «izi los guesos» de eskritora i de poetesa. I kuando yo estava para empesar a lavorar sovre el diksionario, Moshé me enkorajó muncho a azerlo, apuntando a la emportansa de un diksionario semejante.
Komo no dizir grasias a Moshé a nombre mío i de munchos otros, ke fue el primer ke on Akí Yerushaláyim arivó al mundo entero i lo «despertó»de su suenyo, ke metió reglas, aprontó un livro de estudio, ambezó el ladino en el liseo i en la Universidad, inchó el rolo de Viche Prezidente de la Autoridad Nasionala del Ladino i está kontinuando su aktividad sin kedarse.
Kerido Moshé, te sueto munchos anyos de aktividad bendicha, kon salud kumplida.
Matilda Koén-Sarano – 21.7.2015
