Entervista kon: Leon Recanati – Entervistador: Gadi Porat / Traduksión del ebreo: Matilda Koén-Sarano

Entervista kon:

Leon Recanati

Entervistador: Gadi Porat
Traduksión del ebreo: Matilda Koén-Sarano, 2015

Kualo es para ti la Kaza de Ansianos «Leon Recanati». Penso ke ay akí kozas de sentimiento, siguramente no de echos…

Siguro, fondar una Kaza de Ansianos es una de las echas mas nobles ke izieron los ijos de León Recanati, mi padre i mis tíos, para imortalarlo. En la imortalizasión ay una preokupasión verdadera por la jenerasión de los padres,  ke a la edá ansiana se topan en estrechura i tienen menester de ayudo en kompanía, sea del punto de vista moral, sea del punto de vista fíziko.  Kon la fondasión  de  un instituto,  una kaza kon atmosfera familiar, ande todos los moradores son ladino, fransés i espanyol-avlantes, una kaza kon  kondisiones optimales, para pasar la tresera edá en manera onorable i djusta. Esta es a muestra  opinión la mas ermoza manera de onorar la memoria del padre de la famiya.

Tú veyes en tu envolvimiento la realizasión de la savá de Daniel Recanati?

Siguramente sí. Kuando se avrió la Kaza de Ansianos en el anyo 1956, yo era un ijiko de ocho anyos. Me akodro del Ministro de las Finansas, Pinchas Sapir z»l, ke vino a la seremonía, i mi padre, Daniel z»l, me eksplikó ke Sapir operava muncho a favor de la ovra komunitaria-sosial i enkorajava donasiones, para la fondasión de institutos. De entonses, kuando yo vengo a la Kaza de Ansianos, i vengo frekuentemente,  me emosiono kada vez de muevo de ver a los moradores. Kuando penso a la alternativa ke tinían si la Kaza de Ansianos no existía, yo se orgolyozo i orozo ke la Kaza de Ansianos existe.

I kuando dizes ke vienes frekuentemente – es a sesiones de la Direksión?

Depende, antes de todo tenemos reuniones jenerales de la Kaza, tenemos el konsilio, i tenemos  el komitado direktivo, i yo vengo a sesiones formales. De vez en kuando, kuando suven al orden del día sujetos emportantes ke ovligan a tener debate i a tomar desiziones kon konsekuensias a larga distansia, entonses me envitan i yo vengo kon plazer.

Existe un livel de ovligasión de Recanati de oy a la Kaza de Ansianos, en mezos finansiarios?

Mozotros en la famiya kontinuamos durante todos los anyos a azer donasiones a la Kaza. En konfronto al envestimiento en su fondasión, las donasiones son mas modestas, ma siguramente akompanyamos i ayudamos, sovre todo en los proyektos de dezvelopamiento i un poko en el budjeto korriente.

I a los orijinarios  del Balkán/Salonik ke mankan de mezos finansiarios?

La Kaza de Ansianos fue fondada komo instituto para los ke mankan de mezos finansiarios – komo instituto sin entansiones de ganansia. Ansí ke ay un komitado de resivo muy responsable, muy serio, ke perkura ke el presio de la estada en la Kaza esté adientro de las posibilitás  de los ke keren morar en eya. I siempre van enkontro a las personas en el presio de entrada i/o en el pagamiento mensual. Personas en kondisiones finansiarias difisiles resiven kondisiones muy muy fasiles, mizmo asta entrar sin pagamiento, i ay eskampados de los kampos de la muerte, adoptados por la organizasión, a los kualos vienen dadas  kondisiones spesiales  de resivo en la Kaza.

Yo miro adelantre – propio agora resiví un artíkolo para «Dorot», ke niega la lejitimasión de la kontinuasión de la existensia de las kazas de ansianos sektoriales, sigún la orijín. Kere dizir ke no es siguro ke tú o yo vamos a deskojer de bivir kon personas de la mizma tierra de orijín, porké kon el pasar de los anyos ya mos kreímos un  un kampo sosial diferente, mas variado.

No ay duda. Kuando fue fondada la Kaza era una nesesitá vital, porké avían muevos imigrantes de Salonik.  La lingua en komún, la orijín, el esfondo, la tradisión i siguramente la kumidas, a las kualas estavan ambezados de la kaza paterna, tinían una grande valor para las personas. Kon los anyos menguó el número de las personas ke se identifikaron komo orijinarios de Salonik o komo ladino-avlantes i entonses entraron naturalmente personas de otras etnías, bulgaros, turkos. Oy, sigún mí, el 50% de los moradores de la Kaza es de orijín turka, ansí ke la Kaza se adapta  a los tiempos. Tuvimos i kavzos de polonezos o olandezos, o personas leshanas de la kultura i la tradisión i yo penso ke  eyos también se  integraron bien, ma fondamentalmente me parese ke las personas deskojen de vinir a la Kaza de Ansianos a kavza de sus orijín. Eyos también i sus ijos, kuando ay ijos, sienten ke la Kaza i sus moradores les akodran mas sus kazas. Ma si tú avlas de un futuro mas leshano, yo penso ke kuanto mas avrá meskla de galuyot en Israel, kuanto mas las personas se sienterán mas siguros en la lingua ke los aúna, la rekuesta de una Kaza kon karakter spesial sovre la baza de la etnía  irá menguando. Las kazas de ansianos serán djuzgadas sovre la baza de la kalidad del servisio, la kalidad de la kura, la kalidad de la kumida, el komportamiento verso los moradores.

I entonses kedará komo ovra de imortalizasión del nono?

Siguramente, siguramente, no veo dinguna razón ke no sea ansí.

Kuala será la spesialitá de la Kaza? Porké Recanati es una etiketa.  

Su spesialitá será en sostansia el fakto ke ay un instituto ke no tiene entansión de ganansia,  ke es echo para ayudar a las personas ke arivaron a la tresera edá, ke las kondisiones alternativas ke tienen no responden a sus menesteres, i la Kaza de Ansianos les viene enkontro, viene en sus ayudo i eyos biven kon onor, mas orozos.

Konoses a los moradores personalmente?

Konosko una parte de eyos. Enkontro ayá no pokos pensionados de la Bank Discount. Lavorí en la Bank Discount asta el 1986. Konosí munchos de eyos i me aze siempre plazer de verlos.

Tú empesates tu atadijo kon la Kaza en una vijita a la edá de ocho anyos. Te akodras de la inaugurasión kon Sapir? La próksima jenerasión viene  envolvida eya también?

Antes de todo puedo kontarte ke mi madre iva a la Kaza una vez al anyo, arrolava los moradores i las moradoras, para ke aprontaran produktos de sus manos i de sus talentos, o broderías, o chantas kon kuentas, o lavoros en lenyo, objetos varios. Después envitavan al ancho publiko al bazar annual. Yo me lo akodro,  era un espektaklo spesial. Los moradores de la Kaza estavan asentados de una parte de la meza, propozando los objetos ke eyos mizmos izieron, ke eyos mizmos krearon, i el públiko vinía i merkava. El bazar i los preparativos en vista de él traían tensión, emosión, i a parte el dinero ke avía en esto, avía okupasión, avía vivensia, avía   entereso, avía alegría.

De kuando yo era chiko iva a akeyos bazares i vía i en kaza todos los preparativos i toda la merkansía metida en mostra, i esto me atiró siempre. Malorozamente akeyos bazares no vinieron mas organizados, de kuando mi madre se izo hazina en djoven edá i no se sintió mas bien. El direktor aktual topó otras maneras de meter en ópera los moradores. Oy ay un kantón de animales i un kantón de animalikos de karesar , ay aktividades de kultura, kuentos varios, paseos, kozas muy ermozas. Mis ijos no veyen esto, porké se trokaron las vías de aktividad i de envolvimento, ma ultimamente mi ijo Daniel, inyeto de Daniel Recanati – mi padre, se alegró de mi propozisión de adjuntarse a la  asosiasión i oy él  es miembro de eya. Kero esperar ke  esto kontinúe.

Es ke tu serkanía i mizmo tu ekspertiza en lo ke akontese, te traen a enteresarte  al sujeto de los viejos, komo kontribusión a la komunitá en el kampo de la vejés en Israel, o tu kontribusión a la komunitá se topa al kontrario en el kampo de las kriaturas, la próksima jenerasión?

La edukasión, la preokupasión por la jenerasión ke viene, son  muy emportantes, endispensables, ma yo bushko de ekilibrar entre muestra konstribusión por la próksima jenerasión i la ovra en seno de la povlasión mas aedada. Mozotros semos sosios del fondo ke se yama «Vejés buena» del Prezidente del Estado endjuntos a Eshel, ke ayudan a los viejos en varias lokalidades en sentros de okupasión i de sojorno, en kuras de los dientes i de los ojos i en sujetos de salú, en boyá de la kaza – ayudo en kozas de baza. Un fondo muy ermozo, pekado ke no se está podiendo anchearlo, ma a mí me aze plazer de azer parte. Ultimamente me demandaron  también de ser shefe del komitado ke da estreyas a las kazas de ansianos en el kuadro de la kampanya del konsilio para Eretz Israel ermoza. Ansí ke tengo el zahú de ser shefe de esta kompetisión en el sektor de las kazas de ansianos. Opera ermoza ke pusha i enkoraja las kazas de ansianos a kompeter en el livel estétiko i la kalidad del ambiente.

Es ke sos aktivo en la direksión de Recanati?

Ay shefe del komitado direktivo i ay personas buenas ke son volontarias. El tiempo ke se deve dedikar es muy muncho. Yo ayudo kon un konsejo, detrás de la shena. El shefe aktual es Avi Romano, el padre del kual Papo Romano era un buen amigo de mi nono i miembro del konsilio direktivo de la Kaza durante munchos anyos. Antes de él avía Itzhak Burla, ke lavorava kon mí en la Bank Discount, i Shlomó Magriso, buen amigo de mi padre i mío en la Bank Discount. I a vezes tuvieron la karga personas buenas komo David Nahmías, Aharón Ruso, Lazar Hacohén, Shlomó Venezia, i todos izieron un lavoro fiyel i devuado por el bien de los moradores de la Kaza.

I por teminar…

Yo penso ke la Kaza tiene el mazal de tener una asosiasión muy aktiva, muy responsable, muy devuada. I pensar ke todo esto empesó al tiempo de mi nono en el kuadro de la «Kuzina barata para menesterozos». La «Kuzina barata para menesterozos» era una organizasión ke dio a mediodía pastos a los menesterozos, sovre todo viejos. I kuando la Kaza de Ansianos fue fondada, en sostansia fue fondada por los fondadores de la «Kuzina barata para menesterozos»: la famiya Carasso, mi famiya, i personas buenas komo Shlomó Venezia,  Itzhak Saporta, David Filosof, Avraham Braha.

Kon el pasar de los anyos restorimos todas las kamaretas. En lugar de banyo kondjunto a dos kamaretas, todos tienen dush. Ay mas kamaretas para síngolos. Un tiempo avían también dos en una kamareta. Oy perkuramos de alevantar el standard, sigún el livel jeneral de la vida en el Estado. En la Kaza de Ansianos mozotros keremos ser siempre  entre los mijores. Para el instituto ke no tiene buto de ganansia es difisil azer esto, por esto rengrasiamos a kada ayudo de parte de la famiya de los moradores, ke kerrán imortalizar i ayudar también a mijorear las moradas i las kondisiones de estada.

Esta ermoza tradisión de asosiasión envolvida, donante i kudiante, karakteriza i  aze spesial, yo penso, la Kaza de Ansianos, Yo puedo suetar a la Kaza i a los moradores ke esta ermoza tradisión kontinúe. Personalmente yo espero ke las posibilitás de la Kaza i su direksión permetan de mijorear todo el tiempo las kondisiones.

Roni Aranya es un direktor muy talentuozo, muy sensible i muy atento a los menesteres de los moradores, i pusha todo el tiempo a envestir en el mijoreamiento de las kondisiones, en el adjustamiento de kozas nesesarias, endispensables, ke pujan el bienestar de los moradores. Espero ke la Kaza pueda, kon el ayudo de amigos i de parientes de los moradores, topar los medios para ser una kaza de ansianos ekselente i kompetitiva kon kada otra buena kaza de ansianos.

Espero ke respondí a tus demandas. Penso i espero ke no vamos a anchear la Kaza a un kuadro mas grande. Yo penso ke el kuadro íntimo, adjusta kualidad i partikolaridad a la Kaza, ansí ke no tenemos aspirasiones a engrandesimiento, si no ke tenemos  aspirasiones al mijoreamiento interior kontinuo.