En vista de Rachel: Tisha Be-av i mas, de Seattle

Ver todos los artículos de esta sección >>

_________________________________________________________

Tisha Be-av i mas, de Seattle

Para los ke praktikan los uzos djudios, oy (alhad 13 de agosto) es el tanit de Tishabeav (el 9 del mez de AV) una data ke komemora  trajedias en el pasado djudio, i ainda mas en el de los sefaradim.  Tratando de esto, i de livros atados a esto, un artikolo enteresante por Ty Alhadeff mos da a konoser la estorya de las personas ke uzaron i trusheron estos livros, i los uzos sefaradis, i muncho mas a Seattle.  Yo topi ke las informasiones de este artikolo, en inglez (http://jewishstudies.washington.edu/sephardic-studies/tisha-av-sephardic-seattle-ladino-journey-old-world-new/) meresen ser tradusidas i transmetidas aki,  aunke un poko akurtadas, para los ke no pueden meldar en inglez.

En una de sus koplas,  Bouena Sarfatty (asegun fue transmetida en el livro de Renee Levine Melamed, An Ode to Salonika) mos dize:

Ticha be’ave mos asentamos en bacho atomar tanid. La mama se viste de preto por honor de loz djidios Ke foueron masakrados a esta dato…

Aparte de la desgrasia de las dos destruksiones del Bet Amikdash (en 586 AEK*/BCE i 68 EK*/CE), en Tishabeav los sefaradim komemoran la ekspulsion de Espanya de 1492 i tanbien la deportasion de los djudios de Rhodes, por los Rodeslis ke pasaron sus ultimo Tishabeav en los chikos barkos ke se los yevo a Haidari, el kampo de konsentrasion en Atena, ke de ay fueron transportados a sus muertes en Auschwitz.

Siertas dichas en ladino se referan a Tishabeav (estas tomadas del livro de Rebecca Amato Levy, I Remember Rhodes):  Este es Yirmiya el Profeta (por persona ke yora muncho); Ke darse mi iju, ke sea en dia de Tisha B’Av ; Esta arastado komo la aftara de Tisha Be-Av (porke la aftara en Ladino de Yermiya en Tishabeav es muy larga.)  [Yo  konosko tiene la kara de Tishab’av. Puede ser vozotros konosesh mas dichas semejantes. R.]

El sitio de libreria dijitada de Estudios Sefaradis de la Universidad de Washington (UW) en Seattle (http://jewishstudies.washington.edu/sephardic-studies/sephardic-studies-digital-library-museum/) kontiene toda la liturjia sefaradi de Tisha beAv, entre eyos dos edisiones de «Seder Arba Ta’anit: ke minhag Sefaradim (Los kuatro Ayunos asegun el uzo de los sefaradim.)  [Los otros tres ayunos/taanites son del 10 de Ṭevet, Taanit Ester, i el del 17 deTammuz]. Aki se puede ver el de 1921 (http://digitalcollections.lib.washington.edu/cdm/compoundobject/collection/p16786coll3/id/1757/rec/2 ) i el de 1871 aki (http://digitalcollections.lib.washington.edu/cdm/compoundobject/collection/p16786coll3/id/2008/rec/1.)

Del de 1871 existen solo 3 deyos en el mundo. Todas las dos edisiones kontienen el teksto en ebreo i en ladino en karakteres rashis.

Estos son entre los 45 livros en ladino ke fueron dados al program de Estudios Sefaradis de UW por el Sr. Elazar Behar, miembro del kal Ezra Besarot.

Nota:
* AEK (Antes de la Epoka Kristiana); EK (Epoka Kristiana) – terminos ke inventi  yo!

Rachel Amado Bortnick
Dallas, Texas
Ladinokomunita

______________________________________________________________

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.