eSefarad Noticias del Mundo Sefaradi
En 1533, en Salonik, en la Noche de Shavuot, dos djóvenos i briyantes hahamim, se reunieron para estudiar toda la noche asigún la kostumbre mensionada en el Zohar.
En este Shavuot, Yosef Karo (ke después eskrivió el Shulhan Aruh) i Shlomó Alkabets (ke kompozó el Lehá Dodí) tuvieron una esperiensa mistika ke les trokó la vida. Los dos se avian arronjado de la Espanya djunto kon sus famiyas en 1492 i esta esperiensa iva a trokar sus vidas i después también la del pueblo djudió.
En akeya noche, kuando el Rav Karo estudiava la Mishná, el Rav Alkabets i los otros haverim en el Beit Midrash sintieron la boz de la Shehiná saliendo de la boka del Rav Karo diziendo:
– Párate en tus piezes i enaltéseme.
Todo tiempo ke Rav Karo estudiava la Mishná, una boz aguda se apoderava de él, deskuvriendo sekretos misteriozos de la Torá. El Rav Karo eskrivió estas esperiensas místikas en su livro “Magid Mesharim”. El “Magid” ke avlava era la Shehiná, la boz feminina, profétika i místika del Dió.
Ke kijo dezir la Shehiná kon “Párate en tus piezes i enaltéseme”?
Kuando sintieron la boz de la Shehiná akeya noche, Rav Karo i Rav Alkabets formaron un grupo de tektos de la Torah ke tenían mesajes importantes i apropiados. Estos tekstos avlavan de la Kriasión del Mundo, la Revelasión en Har Sinaí i el kuento del retorno de Ezra i Nehemyá a Yerushalayim para rekonstruír el Templo. Estos tekstos tienen la forma de Kriasión, Revelasión, Redensión, ke simboliza el modelo “de la golá a la redensión”.
Kuando estudiavan estos tekstos, la Shehiná les avlava otra vez, eksplikando la fraza “Párate en tus piezes i enaltéseme”
La Shehiná disho: “Vate a Erets Yisrael, porke no todos los tiempos son oportunos”. La Shehiná komandó al Rav Karo i al Rav Alkabets de azer aliyá a Erets Yisrael i ansí traer a la Shehiná de la golá a la Tierra Santa.
Tres anyos después, la famiya Karo i la famiya Alkabets se embarkaron para Erets Yisrael. Se asentaron en Tsefat i empesaron una mueva “Epoka de Oro”, no en la Espanya, sino en Erets Yisrael.
Esta es la Epoka de Oro de la Kabalá i el mistisismo, ande se kompozaron livros de leyes djudías, de mistisismo, komentarios de la Torá i poezía ke influensaron a todo el mundo djudió asta muestros días.
Ma, además de la Kabalá, akel Tikún de la noche de Shavuot también inspiró azer aliyá a Erets Yisrael, porke “el tiempo era oportuno para eyos de azer aliyá a Erets Yisrel”.
Daínda lo es oy.
Shavuot alegre!
Rav Daniel Bouskila
Director internacional del Centro Educativo Sefardí.
Trezladado por Miriam Sherman
Kalifornia
Fuente: Ladinokomunita
