eSefarad Noticias del Mundo Sefaradi
Keridos amigos
Vos eskrivo en mi lingua de kaza para darvos la buena nuvela ke en el 24 de Mayo 2017, los 21 profesores ke ovran komo rektor i dekano, todos miembros del konsilio akademiko de la Universitad de Bar Ilan, desidieron a la unanimita para ke el Sentro Salti se transforme en Instituto.
El Instituto seyama de ayer endelantre en Ebreo i en Inglez» SALTI INSTITUTE FOR LADINO STUDIES. El sera dirijado por el prof. Shmuel Refael kon sus ayudantes aktuales i bien entendido el nombre de doktoras i doktores ke van ambezar i investigar sera majorado sigun la nesesita ke se azera sintir. Por el momento el Instituto okupara las salas del Sentro fin ke sera posible de fraguar su edifisio alseno del kampus de la Universitad.
La adminiztrasion de la Universitad mos rezervo un tereno en la partida vieja del kampus serka de la entrada prinsipal de 1500 metros kuadrados a este efeto, kon permision de la munisipalidad de Ramat
Gan de pueder fraguar. Oy en dia lo ke manka solo es el dinero para abasteser a fraguar el edifisio ke penso sera el sentro akademiko mundial de la investigasion de la kultura sefaradi i de su lingua. Todos los gastos para el fonksionamento del Instituto sera dado por la Fundasion Salti sovre el akordo egzistiente kon la administrasion de la Universitad.
Espero ke todos los amigos de esta unika Institusion ansi ke mis keridos amigos personal ovreran para ke la nuvela de la kreasion del Instituto seya konosida por una mayoriya grande de djente ladino avlantes en el mundo.
Grasias al sistema muevo ke adoptamos, la direksion del Instituto sera independiente de la administrasion de la Universidad todo en estando debasho su «patronaje» Reuchita teneremos i ke en los anios vinideros purfiaremos a dezvelopar el konosimiento de muestro idioma.
Kon karinyo
Dr. Selim Yeushua Salti
Fondador de la Fundasion Salti i del Instituto para los Estudios en Ladino
