eSefarad Noticias del Mundo Sefaradi
Keridos amigos i amigas,
Me vino komo una sorpresa kuando mostraron en la television ke el Rey de Espanya «Juan Carlos» venia de abdikar. Djustamente oy en el Daily Telegraph avia un reportaje sovre el. Vo a tradusirlo.
Saludes a todos.
EL REY DE ESPANYA «JUAN CARLOS» ABDIKO.
El Primer Ministro Mariano Rajoy viene de anunsar ke el Rey Juan Carlos esta abdikando en favor de su hijo. Ay menester de una ley nueva ley por esto. Juan Carlos ke tiene 76 anios fue rey desde 1975 i vido la transision de su pais de una Diktatura a una Demokrasia. Tuvo problemas de salud en los ultimos tiempos i su popularidad kayo despues de unos eskandalos.
Una vez en medio de la Crisis Finansera el se fue a kasar elefantes en Botswana. Se rompyo su cadera i tuvieron ke trayerlo atras en un jet privado.
Su yerno fue sospechado de tomar somas grandes de dinero en kontratos publikos.
Su ijo Felipe ke tiene 41 anios va resivir el titulo de «Felipe IV». El tiene un Diplom de Leyes i un Master de Relasiones Internasionales. Su mujer la Prinsipesa Letizia era djurnalista de Television antes. Tienen 2 ijas.
Komo su padre, Felipe viajo a traves de el mundo para mantener la influensia de Espanya, sovre todo en las kolonias Espanyolas de antes en la Amerika Latina.Lavoro siempre por los interesos de su pais.
El Rey Juan Carlos entro en poder en 1975, apenas 2 dias despues de la muerte de Francisco Franco. En 1981 abatio un Coup Militar kuando era mansevo. El Rey eskrivio ayer en una letra adresada a Rajoy sus intensiones. El se mostro siempre komo un ombre simpatiko, Mostro asta ke punto fue tokado kuando uvo el attako de terror en Madrid en 2004. 191 personas fueron asasinadas i el Rey kon lagrimas en sus ojos asistio a los funerales uno por uno, konsolando a las famiyas de los muertos.
Todo el bien ke izo en kuaji 40 anyos de reinado, en supito se demonto kon los insidentes de kasar elefantes en Botswana en medio de una krisis ekonomica. Munchos se demandaron si era nesesario mismo de tener una Monarkia ereditaria en estos tiempos.
El Rey disho en los ultimos tiempos ke keria ser akodrado komo el Rey ke unio a todos los Espanyoles.
[Yo kreyo ke djugo un papel grande en las relasiones kon Israel i en las relasiones kon la kommunidad Judia. El Edikto de Expulsion se alevanto (dunke nunka de fakto), avriendo las puertas de Espanya a los Judios Sefaradis i ofresiendo sivdadania. Pensar ke los Reyes Katolikos mas de 5 siglos antes avian echo el kontrario]
Tradusido por Shimon Geron
Para Ladinokomunita
