eSefarad Noticias del Mundo Sefaradi
Matilda Koén-Sarano eskrive su rekordos de Kipur i las tradisyones del Kipur Sefaradí
Mi primer rekordo del Día de Kipur es la tanyedura del shofar, ke tanyía mi nono Moshé Sarano, kuando se exersava a tanyer en kaza en su veste de hazán en la Kaza de Repozo de Milano, durante las Fiestas. Por anyos no oyí este son limpio i ezmoviente, asta ke tanyó mi inyeto Zohar de 12 anyos, akí en Israel.
Mi mama kontava ke su mamá en Izmir, para la seremonía de las kaparot, merkava unas kuantas geynas mas, para sus vizinas proves. En Milano no avía manera de azer esta seremonía, ma las geynas eran uvligatorias en muestro menú.
Porké komo en todas muestras fiestas, i en Dia de Kipur mozotros tenemos un menú spesial, ke se adapta a muestras exijensias de simplisitad i de salud. Esta regla akompanya siempre muestras kumidas, ma sovre todo en Día de Kipur, ke es karakterizado por el ayuno i las orasiones, es partikolarmente emportante.
La kumida del Día de Kipur en seno a las komunitás sefaradías se diviza en «seudá mafséket», ke avre el tanit, i pasto de eskapadura del tanit.
Antes de todo el pasto, antes del tanit deve ser semple i liviano.
En jeneral es kompozado de arroz, ke puede ser blanko o kolorado, de poka karne i de una vedrura. La karne puede tener varias formas, mientres ke la forma preferada es kioftés kon salsa de tomat i la vedrura es en jeneral bamia o fasulya freska. La salsa es ovligatoria en este menú, porké aze bever muncho antes del tanit.
El pranso se uza eskapar kon una revanada de karpús i un kafé turko, i nada mas. Devemos apuntar ke las porsiones son siempre chikas, porké mas poko se kome al empesar el tanit, mas fasil es suportarlo. El kafé deve ser echo en la manera tradisional.
También el pasto ke termina el tanit es bazado sovre platos livianos i semples.
Para kortar el tanit mozotros uzamos komer una revanada de pan untado en la azeyte, kon un poko de sal. En Yerushaláyim se adjusta enriva un poko de zátar. El pan kon azeyte viene akompanyado kon un vazo de subiyá o pipitada, beveraje echo en kaza kon las pipitas del melón, arrekojidas i sekadas el anyo entero.
Deké se korta tanit kon pan i azeyte? Ay a lo manko tres ekplikasiones a este uzo. La primera es ke la revanada de pan kon azeyte arta momentaneamente, asta ke la patrona de kaza apronta la meza i keynta la kumida.
La sigunda es ke la azeyte es una koza pura, ke simboliza la vida de la persona. Komo de fakto se dize ande mozotros «Tener azeyte de vida» (o, el Dio ke no mos de, «No tener mas azeyte de vida»). La tresera eksplikasión es ke, después ke rogimos i demandimos pardón por muestros pekados, kale ke mos akodremos ke ay djente prove en el mundo ke tiene sólo una revanada de pan kon azeyte para komer.
Una ora después el pranso ya está pronto i deve ser liviano: Una supa de poyo, un pedaso de poyo sufrito, patatas kochas, un dulse, una fruta i un kafé.
En jeneral la supa de poyo no es popular ande mozotros. Me akodro ke kuando yo propozava supa o chay a mi madre z»l, eya me dizía: «Ke, hazina estó?»
Ma a la fin del tanit, mizmo en el mundo sefaradí la supa de poyo es ovligatoria i viene apresiada. El poyo no deve ser asado, ma sufrito i las patatas deven ser kochas i no fritas. Un ermozo razimo de uva, un dulse i un kafé turko serran el pasto, después del tanit. El dulse puede ser travados o tishpishtí, ke te deshan la savor en la boka. Gmar Hatimá Tová.
Matilda Koen-Sarano
Fuente: YNET
Amo a Matilda!!!
agradesco a noticias eSefarad, no solo es una alternativa importante para conocer.. aprender, y estar enterado de noticias. libros y articulos.. sino que le confieso que comparti un menu en face books.. en mi pagina rakso de cabarca, pues es importante que se conosca nuestros platillos y se difundan nuestras costumbres para que se borre el estigma que usan politicas en contra… gracias.. shalom toda raba.