eSefarad Noticias del Mundo Sefaradi
(Odysseus i Iliada de HOMER)
Asigun la leyenda, las armadas Griegas kon sus alliados entraron en Troya (Canakkale de oy en Turkiya) en konstruisiendo un grande kavayo de tavla, vasio al interior i inchido kon soldados.
Es aryento de este kaveyo ke se eskondyeron los guerreros i avriyeron de aryento de las muralyas las puertas de la sivdad a la armada grega kuando los Troyanos estavan endurmidos, borrachos de fiestar la batalya ke ganaron kontra los gregos!
Era dayinda presto para fiestar! Los asperava la muerte i la destruksyon de sus sivdad!
El Rey ODYSSEUS era el Rey de ITHACA i el fue konosido tambien basho del nombre ULYSSES. Kon su viktoria fue immortalizado. Era el aliado del Rey Menelas ke keriya vengarse de Troya porke fue Paris (Aleksandro) el ijo del Rey de Troya,
Priam, ke le kito su mujer, la ermoza Helen i se kazo kon eya en su payis Troya.
«Chasing Odysseus» es el titulo del muevo livro eskrito por el autor Australiano S.D.GENTILL.
El rey se topa en el Odyssey de Homer. En realitad no ay traza de Odysseus, ni en su historia ni en el mytho. No hay nada ke mostra ke Odysseus era una figura historika. En el Odyssey de Odysseus el dise «Bivo en ITHACA ande se topa una montania alta NERITUM ke es kuvierta kon boskes i no leshos del grupo de las Islas ke son serkas unas de las otras. En mirando al horizonte en la mar se ven DULICHIUM i ZACINTHUS a la kaida del sol.
Otras islas se topan mas leshos al amaneser. «ITHACA fuera de la Kosta Grega no parese tanto a esta deskripsion. Por siglos los eskolares de HOMER pensaron ke haviya un yerro en esto i ke Odysseus utilizo puedeser una lingua poetika.
Una otra theoria dise ke la ISLA DE KEFALONIA serka de ITHACA en la Peninsula de PALIKI puedia ser el lugar. Odysseus era alliado kon las Sivdades Gregas de Estado/City States i dunke del rey Menelas.
Su hermano AGAMEMNON Rey de MYCENAE assemblo su flota para destruir Troya. Odysseus no hizo una oferta al Dio POSEIDON para su viktoria i por esta razon el fue prevenido en sus viajes en barkos de tornar atras a su kasa.
En su kamino tuvo munchas aventuras. Se metio kontra el Gigante POLYTHEMUS. Enkontro los sirenas mujer i medio peshkado ke kantavan kantos irresistibles para los marineros.
Ulysses torno a su kasa dospues de 10 anyos. Todos sus kompanieros se aviyan murido. Al yegar a su kasa topo su mujer Penelopa akompaniada por gente ke kierian kazarla porke pensavan ke Odysseus despues de tantos anios era muerto. El se deguiso komo un mendigo i mato uno por uno a todos.
Estos evenemientos son detalliados en el Odyssey de Homer. Explika sus pensamientos, lo ke esperava i tambien lo ke le dava espanto. No komo una figura historika tanto ma komo una figura literaria.
Izieron de el statuas, pinturas, poesias, kantikas, operas i novelas.
Fuente: SefaradiMuestro
