eSefarad Noticias del Mundo Sefaradi
Rosina Karako, moderadora de la Ladinokomunita, un grupo dedikado a preservar le ladino I la kultura sefaradi, fue konosida “virtualamente” por sienes de personas.
Aviya yo entrado muevo en la Federasyon Sefaradi de Palm Beach (Florida) i saviya ke eya i su ijo Jack fueron las personas , ke aze djusto vente anyos atras, tuvieron la ideya de azer un grupo o klub para reunir a los sefaradis ke moran enderedor.
Un poko de tiempo mas tadre ke entri en la Ladinokomunita, Rosina me telefoneyo, estuvimos avlando de aki i de aya, de ande semos i otras kosas. Le demandi ke teniya muncho entereso de konoserla personalamente por kavsa ke en el grupo no tenemos otras personas ke avlan el ladino I son nasidos de la Turkia. Me dijo ke esto era difisil por kavsa ke el marido sufriya de huertes dolores de la espalda i ke no podiya moverse de kasa.
Vino el enverano i izimos un festival de filmos sefaradis. Eya aresiviya la envitasyon i me eskriviya, “riushita buena ke tengash”. La telefoneyi i le dije, -Yo tengo un otomovil grande te vo a ir i tomarte djunto kon tu marido para ke vengash i estesh kon mozotros i te vo a tornar. Malorosamente, no acheto.
Rosina eskrivya en la LK por todo modo de kosas, finasta komo estava el tiempo, I en espasial teniya un grande espanto por las fortunas ke se asekavan a los bodres de la Florida en kada enverano, en veses eskrivia por el “visino de abajo”, este era yo.
A la fin vino rasiele de toparmos. La Federasyon Sefaradi estava kumpliendo el 20en aniversaryo I para emprensipiar kisieron aserdle un omenaje a Jack Karako i a Rosina I darles una plaka de rekonosimiento.Fue diya de alhad, 11 de disembro de 2011, me akodro komo si fuera oy. Rosina i su ijo entraron al salon, los saludes i besos fueron de gran alegriya. Daysi Newell moz empresento, me miro i me dijo-Yo pensi ke eras komo de mi edad, veigo ke son mas mansevo. Le dije- No penses esto, es ke a la noche me meto arientro el trushi i la demanyana me bevo el kaldo. Eya me aregalo una de sus sonrisas.
Mos asentimos muy serka, pasaron los deskursos I el akto se eskapo. Kuando moz alevantimos eya se abolto al publiko i me dijo- Mira lo ke se izo esto , eramos un buchiko de personas kuando emprensypimos la Federasyon. Penso ke mas ke la plaka esto fue la alegriya mas grande de Rosina, ver ke lo ke fraguaron kon esforzo 20 anyos atras no solo kontinuo sino tambien ke enfloresyo a una organizasyon mas grande I kon mas aktividades. Es komo una madre ke paryo un ijo I lo engrandesyo.
Rosina estava muy ermoza vistida de kolorado akel diya, inchida de alegriya i de enerjias. Eya eskrivia por los famosos “kokteles” ke teniya ke tomar I lo ke meldava en espera de estas kuras. Sabiya ke estava luchando a la kontra de una negra hazinura.
Mos asentimos endjuntos kon su marido , Jack, su ermuera i su kerida inyeta, Rosina estuvo a mi derecha I Daysi a la mi iziedra. Ablimos de la famiyas, i de muestras pasadiyas. Miri ke Rosina apareshava el komer de su marido, mirava kualo esta aziendo la inyeta i pensi – Esta mujer tiene los ojos en kuatro, no piedre ni un detalio de nada. La tipika “nekochera” muestra.
Moz espartimos, yo estava muy kontente de konoserla, una por ke era un personaje de kadal diya en la LK. Una mujer muy kapache , afilu si saliya a su ventana topava kualo kontar, sus memorias eran un libro abierto de toda una generasyo. Topar un halis sefaradi nansida en la Turkia no era kosa de kadal diya.
Para mi sorpresa, pasaron dos semanas I meldo ke Rosina kito un tema muevo. Estava demandando komo se diziya, inyiksyones o algushas. Una kosa chika ke aviyamos avlado a la mesa. Dishe de mi para mi, komo de capache mujer, de un chiko biervo ya kito una tema para airear en la LK.
Poko tiempo sispues la telefoneyi I le demandi ke keriya enregistrarla en un video, me dijo- Agora eskapi de las kuras, esto muy kansa, aspera dos semanas i lo azeremos.
Ken puedia pensar ke esta entrevista no se iba a azerse. En la levaya de Rosina, tuve la misyon de azer el jesped (eulogio) en nombre de la LK. Espliki kualo es la LK i la lavor ke eya aziya komo moderadora ansina komo representante del “Ladino en versyon estambouli”, su grande pasensya para korektar I ayudar a los ke se keren ambezar i sus memoryas ke enrikesieron los mensajes.Demandi lisensya para avlarle algo a Rosina en ladino en delantre de su aron , le dije:- Kerida Rosina, oy diesenas de mansajes de los kuatro kantones del mundo inchen a la LK , tu espartisyon es sintida kon dolor por todos los ke kadal diya meldaron tus eskritos por diez anyos. Lo uniko ke te aprometo es ke vamos a kontenuar a mantener I amchear el ladino i la kultura sefaradi. Ansina , no manko el ladino en la despedida de una grande i umilde mujer, una vedradera Eshet Hayil sefaradi.
No se si en el Gan Eden ay un lugariko para los ladino avlantes , ma si lo ay , esto siguro ke Rosina kontinuara en su neshama avlando muestra dulse lingua sefaradi.
Su alma goze de pas i de la glorya del Dio. Amen.
Elias Barokas.
Para Ladinokomunita
