eSefarad Noticias del Mundo Sefaradi
Alhad pasado, en el sud de Florida tuvimos muestro sejen Dia Internasional de Ladino. El evento se divizo en dos partes: muestro musafir en la primera parte fue uno ke no es ajeno a la Federasion Sefaradi de Palm Beach, Florida, muestro amigo de LK, Bryan Kirschner, profesor en la Universitad de Binghamton en Nu York.
Joe Halio, Bryan Kirschen, Jake Kohenak, Lewis Saltiel
Bryan divizo su presentasion en dos: en la primera parte, avlo sovre el futuro de Djudeo-Spanyol / Ladino i las diferentes aktividades ke s’estan aziendo en varios payises para preservar la lingua, i avlo sovre la establasion de los Shadarim por la Autoridad Nasionala del Ladino en Yerushalayim, ke meldimos en este foro, i ke Bryan dirije.
La segunda parte de la presentasion de Bryan inkluyo la partisipasion del audiensa. Djugimos la version Sefaradi de un programa muy popular de «repuestas i demandas» en la televizyon Amerikana ke se yama “Jeopardy”. El shef del program (Bryan) da las repuestas, i los djugadores kale ke den las demandas para ganar paras (en muestro kavzo regalikos)! Las repuestas (i demandas) eran sovre sujetos sefardies komo komidas, dichas, relijion, lugares, filmos i aktores i aktrisas Sefaradi, ets. Todos mos estavamos engleneyando.
La sigunda parte del dia era musikal: tuvimos un grupo ke tanyeron instrumentos komo oud/saz, davul, i tambur; i kantaron i baylaron. Este grupo se yama “Harmonic Motion”, ma en personas son Myriam Eli, Joe Zeytoonian i Diana Spring. Myriam es nasida en Cuba de djenitores Sepharadi i Ashkenazi; los djenitores de Joe vinyeron de Turkia. Diana era eleva de Myriam. Kantaron varias kantikas konosidas komo “Los Kaminos de Sirkedji”; “A La Una Yo Nasi”; “Tres de la Noche”, baylaron un chifteteli, kantaron varias komposisiones orijinales, i algunas de las kuales fueron akompanyada kon dansas de Myriam i Diane. Al final, el gitaristo Maurice Sedacca del Elias Ladino Ensemble, endjuntos kon Myriam, Joe i Diane, tanyeron unas kuantos pedasos musikales de Turkia i Gresia, i la djente se alevantaron de sus siyas para baylar en la sala.
Despues del konsierto, komimos borekas, baba ganush/berenjena kon pita, azeytunas, biskochos, ets.
Aviya mas de 250 personas ke vinyeron al sejen Dia Internasional de Ladino de sud Florida.
Jake
de Florida
