eSefarad Noticias del Mundo Sefaradi
El 10 de fevrero se fiesto el dia del ladino en la sivdad de Nu York, komo se izieron en otras sivdades dia de alhad. El sujeto del program fue: una selebrasion de palavras i muzika. El evenimiento tuvo lugar en el Sentro para la Istoria Djudia en Manhattan.
Avia alderedor de 330 personas ke asistieron: mas de 250 personas en el oditorio prinsipal i 80 mas en otrun salon ande se proyekto todo lo ke estava afitando en el oditorio en un ekran. Tuvimos el mazal de ver munchas karas konosidas, por siguro, unos kuantos de Ladinokomunita.
El direktor de la Federasion Sefaradi de Amerika, Jason Guberman, mos dio la bienvenida i mos espiego todo lo ke se aze en su sentro (uno de sinko en el Sentro de Istoria Djudia). Despues de sus palavras introduktorias, Jane Mushabac mos meldo partes de una de sus ovras, Siete Kantikas. Meldar no es el bievo djusto, porke Jane dio vida a su ovra. Kon el ayudo de Danny Elias i Marco Brehm, ke tanyeron sus instrumentos, sintimos varias kantikas ke mensiono (i kanto) Jane. Unos kuantos enshemplos de las melodias ke sintimos eran: Ya Se Va Durmir, Ken Me Va Kerer a Mi, i Streya Biva.
Despues de la prezentasion de Jane, avli yo, Bryan Kirschen. Avli sovre el djudeo-espanyol, su variasion, i los diversos rolos ke kada uno de mozotros tenemos para prezervar esta lingua (komo avlantes, elevos, ets.). El titolo de mi avla fue «En bushkida de avlantes: el djudeo-espanyol en el sekolo 21.»
Kontinuo el program kon el talentozo kompozitor djoven, Avi Amon. Avi kreo una pieza teatrala ke se yama Salonika, i tiene de ver kon la komunita djudia de Selanik en el anyo 1941. Su ovra tiene de ver kon un ijiko i una ijika ke se fuyen a un mundo imajinario para evitar la realita ke se topava en la Grecha. Avi mos kanto «Esto kon ti,» una kantika ezmoviente, kon partes en inglez i otras en djudeo-espanyol.
Tomimos una pausa kurta i segimos kon la saviduria del haham Nissim Elnecave. Mos konto kuentos i konsejas, kada uno ke mos izieron reir. Las tres konsejas incluian: El rey Shelomo i los tres shastres, el Siego, i Demandas sin repuestas. Despues, mos konto una de sus konsejikas de Djoha. Nissim es direktor egzekutivo de la Ermandad Sefaradi de Amerika i editor del buletin dijital La Boz.
Eskapimos el program kon kuaji una ora de muzika. Isabelle Ganz i su grupo El Ensemble Sefaradi de la Alambra kantaron onze kantikas. En algunas de estas kantikas partisiparon i los espektadores: Skalerika de Oro, Las Tres Klavinas del Namorado, i Avram Avinu. A todos mos dio muncho plazer sintir este grupo i ver la enerjia ke tenia su direktrisa, Isabelle, espesialmente kuando baylava.
El evenimiento tuvo reushita muy grande, grasias a todos los ke partisiparon, asistieron, i ayudaron.
Rengrasiamos muncho el ayudo finansial de varias organizasiones i universidades: la Federasion Sefaradi de Amerika, la Sosieta Istorika Djudia de Amerika, la Ermandad Sefaradi de Amerika, la Universita de Binghamton, i los Viajes de Erensia Djudia de los Balkanes.
