eSefarad Noticias del Mundo Sefaradi
Keridos amigos i amigas.
En el Jewish News de esta semana avia el artikolo del sitio arkelojiko de SEBASTIA en el West Bank inaugurado el mes pasado en presensia de ofisiales del governo. SEBASTIA es konosido en ebreo por su nombre Bibliko «SHOMRON» ke un tiempo era la Kapital del Reinado Israelita en el Siglo 9 i 8 BCE. Oy mismo mantiene este nombre i se aplika a la parte al norte del West Bank. Las ekskavasiones son dirijadas por «Uzi Greenfeld» de la Administracion Civil.
SEBASTIA es una sivdad muy importante en muestra Erensia Nasional i Istorika. El Ministro de Heritage «Amihay Eliyahu» disho ke «Tenemos el dezeo de dar un muevo reflo al sitio i azerlo mas atraktivo para sienes de miles de vijitores ke aresive kada anyo». Esto va dar mas fuersa al puevlo en su koneksion kon sus erensia i pais. El plano es de inkluir un Sentro de Vijitores i un kamino muevo de akseso. SEBASTIA es lo ke keda de tiempos diferentes de la Era de Fierro al Tiempo Moderno.[1200-586 BCE] ke representan 3000 anyos, de los Reyes a los Konkistadores Romanos, Kruzadas i los Otomanes. Partes de las paredes i el Palasio son asosiados kon los Reyes Biblikos de Israel. Ay ruinas tambien de los Romanos. El sitio fue ekskavado por la primera vez por un ekipo enkavesado por «Harward» en 1908. En Mayo 2023 el governo aksepto un budjeto de 32 miliones de NIS por la restorasion i desvelopamiento del sitio. El Ministro de Heritage oy anunsia ke intenta gastar 4 miliones de NIS mas para renovar la vieja estasion ke se topa al lado de SEBASTIA. Es el resto de lo ke keda de la estasion demolida durante un atako Otomano al sud de EMEK YISRAEL-sivdad de AFOULA en el kamino a SHEHEM.[Nablus]. La intension era ekspander el kamino sovre las kolinas asta YERUSHALAYIM ke nunka fue implementado. Ma en 1920 kon el aumento de la poblasion i la yegada de los automobiles fue un elemento de yaves para el sistem de transporte.
Los Israelis i Palestinos reklamaron el sitio komo parte de la erensia kultural, mismo al no ser desvelopado. Israel kontrola el park en Area C i los Palestinos i Israelis kontrolan la Area B de la sivdad. En 2012 se sumetio una lista ke mete arientro la sivdad komo Erensia Palestina. Fue mantenido ke en el Reinado del Norte en la Era de Fierro i en tiempo Elenisto i Romano ke no avia una koneksion djudia. Dezde este tiempo el UNESCO ya la metio en la lista. Despues ke empesaron las exkavasiones muevas se sujero ke sean tomadas aksiones imediatas para prevenir a Israel de kolonizar i djudaizar el sitio. La Ministra de Proteksion del Entorno «Idit Silman» alavo el empesijo de las ekskavasiones diziendo «La Djusticia Final se esta aziendo» en la Kapital Ansiana del Reinado de Israel». Por anyos kijeron eyos efasarnms i inyegar a muestra identidad». Ensima de esto eya disho ke no avia un Puevlo Palestino para dizir ke era un sitio Palestino». Las ekskavasiones muevas fueron kritikadas por el Partido de la Siedra diziendo ke el sitio apartiene a todos los puevlo. El sitio esta dainda en la lista del UNESCO i la intension es de tomar kontrol solamente del sitio para ke en kortandolo de la sivdad se torne a un establesimiento turistiko ke traye a los Israelis a la Area «EMEK SHAVEH».
SALUDES A TODOS
Tradusido por Simon Geron de Sydney
Fuente: Ladinokomunita
