eSefarad Noticias del Mundo Sefaradi
Ver todos los artículos de esta sección >>
ROSHASHANA
Yom ha teruah – tizku le shanim rabot, tovot u nehimot!
Este diya kaye en el primer diya del syeten mez del kalendaryo Hebreo ke es Tishrei (Levitiques 23.24).
El primer mes es Nisan, komo lo savesh. En la Torah el apelido de Rosh Hashana no egziste en dingun lugar. Pasa ke » YOM TERUA » el diya ke se asopla el SHOFAR. En Ezechiel 40.1 pasa ke el empesijo del anyo i no komo el primer diya del anyo. Muestra literatura rabinika lo nombra YOM HA DIN el Dia del Djuzgamiyento i YOM HA ZIKARON el Dia del Akodramiento.
Los 10 dias ke empesan dospues de las fiestas de Rosh Hashana fina el Diya de Kipur YOM KIPUR son Los Dies Dias de Arepientamento.
Asigun la Mishnah es de este diya de Rosh hashana – ke es el dia del Anyo Muevo para las personas, los animales i los kontratos entre las personas ke se empesa a kalkular los anyos de los kalendaryos, el anyo sabatiko (SHMITA) i los anyos de jubileo (YOVEL).
Rosh Hashana se fiesta dos diyas. Parese ke se fiestava un diya solo, fina el sieglo 13
A parte de los servisyos de kada diya ay tefilot ke se adjuntan, komo la orasyon de la AMIDAH por el Shaharit i el Mussaf. El Shofar es asoplado a variyas intervalas en el Mussaf. Versos de la Biblia son dichos. Asigun la Mishnah 10 versos (kada uno i uno) son dichos por el reyno el akodramiento i el shofar mizmo, kada uno akompanyado kon el asoplamiyento del shofar. Unos PIYUTIM se kantan ke son tefilotes de
la Edad Medya kon temas de arepiyentamento. La orasyon ALEYNU se aze al tiempo de la repetisyon del MUSSAF AMIDAH.
La gente se suhetan » SHANA TOVA «
Anyada buena, «SHANA TOVA I METUKA»
Anyada buena i dulse…
Porke seramos djuzgados por el Todo Poderozo Baruh Hu Baruh Shmo i por esto dizimos tambien «Ktiva u Hatima Tova » Ke te seya eskrito i afirmado por un anyo bueno.
El kalenderyo judyo es preparado de tala manera ke Rosh Hashana nunka kaye en Alhad, en Myerkoles i en Vyernes.
El mas d’emprano Rosh Hashana okuryo en el 5 de Septiembre in 1899, otra vez en 2013. El mas tadre Rosh Hashana okuryo el 5 de Oktubre en 1967 i va afitar otra ves en 2043. Mozotros no lo vamos a ver !
En el dospues de midi del primer diya se aze el TASHLIH, Se roga allado de aguas koryendo naturalmente. Munchos embiyan pedasoz de pan o piedrizikas chikas a las aguas para dezazersen de sus pekados (Ishaya 11,9) i se kantan los Psalmos 118.5 i 9, 121 i 130.
Komemos MANSANAS I MIEL Siiiiiiiiii !
Vedrura i aluenga ke karne porke se topa en el Rosh (kavesa) ! Yo meto al orno la kavesa entera del kodrero ! Ayyyyyy ke kuando lo eskrivo me ezgrimo ma no kuando lo ago !!!!! No lo veygo komo kuando lo eskrivo ! Madre mia bendicha !
La segunda noche frutas muevas se gostan para el «Shehiyanu» ….Agranadassssssss ! I esta noche es kontada ke la fin del Diya Largo de Rosh Hashana (2 diyas en 1)
Bendisyones…
(Kuando no ay ombres en kaza es a las mujeres ke kaye de avlar de Ley !)
Sharope blanco
SEFARADIMUESTRO
Istambul
