eSefarad Noticias del Mundo Sefaradi
Ver todos los artículos de esta sección >>
Ken no kijyera bivir en un Paradizo ?
EN UNA IZLA DEL PASIFIKO
En una de las izlas del Pasifiko
Kijyera ser peshkadora…
Bivir en una kabana de un solo kuarto
Entre ermozuras, leshos de todo,
Abrasada de paz
Jugando kon los pishkados i oyendo las olas..
Kedar durmyendo kuando el sol no esta mas…
A los angelitos kijyera soriyir
Sin nada saver, sin nada oyir
Sin ambisyones, sin pletos,
Inyorando los amores falsos,
Kontenta de unos bokados i de dos pareos.
Beveriya de la agua ke salta de las rokas
Arankariya de los arvoles
Las frutas de kolor de las naranjas
En las alturas de las montanyas.
Pasariya el tiempo en mi guertizika
Kon mi perro i mi kavretika
Ke me dariya su leche blanka
Mi pashariko, libre ensima de los ramos
Kantariya sus kantos alegres i majikos
Avreriyan mis flores kolor de vinos
Son fantazias, suenyos ! Ni dar…. Ni tomar !
Ni muncho pensar ni siempre meldar…
Sumergirme en las aguas profundas
I admirar los korales, las perlas i las esponjas
Arekojer piedrizikas i las konchas
En los bodres de mar de las playas doradas
Nadar, nadar sin kedar kon los dolfinos,
Yegar fina el fondo de los suenyos…
Ke enkantadores son el vedre i el blue…
En una de las izlas del Pasifiko
Tengo mis pies en la arena…
El friyo dezaparesyo !
La mar maraviyoza
Esta espandida frente a mis ojos
Kijyera kedar aki, en el silensyo …
Sin kavo !
Traduizida/adaptada al Espanyol
de mi poeziya en Turko
«PASIFIK ADALARININ BIRINDE»
Sharope blanco
SEFARADIMUESTRO
Istambul
