eSefarad Noticias del Mundo Sefaradi
La kolor bronzada de sus karas, sus chapeyos kon plumas, el trezoro de oro i de piedras presyozas, la vayensya i la fama de los piratos… No me viniriya al tino ma ay unos ke eran Judyos tambien !
La ekspulsyon de los judyos ke fuyeron la horrible inkizisyon i se metyeron en kamino para dispersar sus raises en payizes ajenos fue el empesijo del tiempo de los piratos judyos ke duro kuaji dos siglos. Estos preferaron salir a la mar i a los leshos para kombatir sus enemigos i meter mano a sus rikezas. Otros fueron diplomates kon influensa en Britania, en Hollanda o en el Emperio Otomano tomar venganse de los ke los derrokaron de sus kazas i kavzaron tantas dezgrasyas.
Todas las naves de pasangeros i de komersyo se espantavan de oyir sus nombres solo…. Munchos navigavan kon naves de la armada para pueder kombatir si eran attakados. Puedo dizir ke la bandiera preta kon la kavesa de un eskeleto en blanko me teniya espertada, pyedrida en mis suenyos los mas terribles i aventurozos kuando era manseva….I no eran los filmos ke mankavan para mantener muestro tino bolando de izla en izla i de nave en palasyos, pasando por mares turkiz i arezvalandomos embasho en tiempos de fuertes tempestas….
Me imajinava ke era akeya manseva bruna kon los kaveyos ondulados i largos fina su talya fina…. Sus fustas bolando en el aver… La namorada del kapitan delkual las palavras eran kuaji santas ! Agora penso kon una medya soriza ke los mansevos deviyan tambien ensonyarsen de ser piratos kon largas espadas en sus mano i aharvandosen kon piratos enemigos para protejar sus namoradas ermozas fina dar a selar a las sirenas kon dientes de perlas i miradas de braza….
Mi madre siempre me diziya ke los suenyos no artan la persona ma yo pensava ke sin la imajinasyon i los dezeyos no se puediya progresar, no se puediya yegar al arte, no se puediyan amahar las tristesas i sufrir dolores ke no mankan en la vida…
David Abrabanel nasyo en Hollanda en 1580. Keriya vengarse de los marineros Epanyoles ke aviyan masakrado sus parientes kuando estos tratavan de fuyir kon una nave. David reusho a salvarse i avanso muy presto en la marina Ingleza. Se iva azer el famozo pirato «Captain Davis» de su nave de guerra el «Yerushalayim» i no deshando ni pasharo bolar por ande kruzava.
Un otro de los piratos judyos sefaradi era Moses Cohen Henriques Eanes… i pensava ke el Karibo le apartenesiya, Ayudo los Hollandezos a meter mano ensima del trezoro de los Espanyoles en Kuba durante una guerra ke duro 8 anyos en 1628. Fue una grande viktorya. Tomaron 16 naves Espanyolas, un galeon i 9 naves mas chikas de komersyo. Apanyaron tambien serka de Kuba, en el Golfo de Matanzas, 2 chikas naves i 4 galeones ke se estavan fuyendo…. Los Hollandezos se appropriaron de un botin de 11.509,524 Guldens en oro, en plata i en kara ropa merkantil. No se vazyo kuaji sangre en esta guerra. Los Hollandezos no tomaron prizonieros. Dieron a los marineros Espanyoles lo ke nesesitavan para marchar a Havana en Kuba
Mas tadre, Henriques se installo en Brazil basho la administrasyon Hollandeza, a la kavesa de una komunitad Judiya i establesyo su propria izla de pirato a los largos de la kosta Braziliana. En 1654, dospues ke los Portuguesos konkistaron de muevo el Norte de Brazil, Moses Cohen Enriques se fuyo a la Amerika del Sud i se izo el konsejero de Henry Morgan, el mas grande pirato de su tiempo. Las impresionantes tombas del pirato Yaacov Maschiah i de su espoza Deborah se topan en el simeteryo de Bridgetown, la kapitala de las Izlas Barbadas en el Karibo. Se puede remarkar gravados en el marmol, la estreya de David i los dos guesos kruazados de la bandiera pirata ke terroriza todos los ke lo ven.
La vida de todos los piratos judyos, sus naves i sus kombatos i aventuras se kontan dayinda por los aedados. Los de la izla Curacao son los mas importantes piratos. Itshak Gabay, Manuel Levy, Yoshua Mendes son los mas importantes. Los nombres de sus naves eran : Mazal Tov, Meleh David, Zevoulon, Issakhar, Malkat Esther ets…
El mas famozo i el mas karizmatiko pirato judyo por seguro ke er el Rabino Shmuel Pallache. Era en mizmo tiempo un grande komersante internasyonal, diplomato i espion. Este hombre ekstraordinaryo fue la pesadilla de los kapitanos Espanyoles. Afito ke konosyo derrotas ma siempre supo salir kon las suyas en ganando mas i mas fama. En Julio 1614, en un kombato kontra los Espanyoles su nave se danya de negra manera. El puerto el mas serka es Plymouth en Inglaterra. Todos se intregan de su vinida ! El Embasador Espanyol no va deshar pasar ansina de opportunitad ! Prezenta sus keshas al Tribunal de las Fuersas Marinas. Mizmo el Rey de Inglaterra viene para ver este hero de grande fama ke kombate la armada de mar de los Espanyoles !
Mientres el embasador en Inglaterra de los Payizes Bashos, Noel de Caron se prezenta para ser su avokado. Sus rapores mos permetten de seguir el proseso kada diya ke pasa….. De Caron afirma ke la audiensya se alevanta kuando viene el akuzado i se asenta a su lugar dospues ke se asento el ! Pallache guarda su kavesa kuvyerta dospues ke deklara ke es un judyo pratikante. El embasador se inyerva muncho… Demandava la kavesa de este pirato judyo…. Los juzgos le azen la remarka ke esto es un sinyo de saver-bivir ! «I el ? El puede guadrar su chapeyo de judyo ?» le responde el juzgo «El, el es Shmuel Pallache ekselans ! «
El Rey muy impresionado de la dinyitad del akuzado lo invita a kedar en el palasyo fina su liberasyon…Dospues ke sera liberado Pallache torna a Hollanda i es aya ke termina su vida… Lo azen embasador de los Payizes Bashos.
A esta epoka mizma en lakuala los Inglezes deskuvren un judyo ke les inspira el mas grande respekto, el puevlo judyo no tiene el permiso de instalarse en el payis de Shakespeare. El famozo autor ke publika en el mizmo anyo (1614) su piesa de teatro «El Merkader de Venezia». Malorozamente el publiko Inglez va konoser un judyo komo lo deskriven a esta epoka ! Alguno odiozo, sin orgulyo, feyo, de basho rango komo lo prezentavan en sus fanatizmo desgrasyado i en sus antisemitizmo…
Es regretavle ke Shakespeare no partisipo al proseso de Pallache… Puedeser ke Shylock, en el rolo del Pirato seriya dayinda oy el simbolo de la reziztensya judiya kontra el antsemitizmo…
Komo en un eskrito asemejante no avlar del Guerko del Golfo de Mexico ? El Prince de los Pirates ? Jean Lafitte (Levy) nasyo en Bordeaux en 1782. Era sefaradi de Madre i de padre. Kuando su padre muryo, su madre tomo a sus dos ijos Jean i Pierre i se installo en Lousiana basho los Fransezes… Se kazo de muevo i tomo Jean a su lado i dyo Pierre a una famiya para ke lo engrandeskan…
A Jean le plaziya observar i explorar las kostas de New Orleans. Konosiya el golfo entero de manera muy detalyada… Pierre, su ermano se izo pirato ! Jean empeso a vender lo ke su ermano rovava. Se eskondiyan en los lugares los mas sekretos.
Kuando Lousiana paso a los Amerikanos Jean i Pierre se viyeron restriktados por las Leyes…. Bushkaron un lugar seguro para vender la ropa. Se enstalaron en la izla la Barataria. Tomo este nombre de Don Quichote ke regalo a Sancho Panza una izla imajinarya ke se yamava Barataria.
Los Lafitte teniyan una botika oficial ma se interesavan sovre todo a la karaborsa (trafiko de estraperio), de esklavos i de sekretos de estado. Los de la izla adoravan los dos ermanos porke ayudavan los povres, les davan echo ets…
En 1812 los Inglezes i los Amerikanos empesaron a guerreyar ! Lafitte kon sus 3000 hombres ayudo los Amerikanos.. Fue rekompensado ma dospues prometyeron 500 Dolares a ken les iva trayer la kavesa de Lafitte !!! Lafitte prometyo de dar 5.000 Dolares al ke le iva trayer la kavesa del dezgrasyado Clairborn ! Dingunos puedyeron ganar estos premios!
Lafitte se alesho de Lousiana i establesyo su imperyo en Campeche. En 1820 se kazo kon la ija de Aury, un pirato Fransez. En 1821 uno de los naves de Lafitte atako a un nave amerikano. Era la primera vez ke aziya koza asemejante… Los Amerikanos vinyeron i lo arondjaron.. Abandono Campeche kon toda su trezoro i sus hombres en tres grandes naves i dyo la izla al fuego.
En kamino enkontraron un nave de merkaderes Espanyoles. Sus ombres kijyeron atakar Lafitte no aksepto. Sus ombres se revoltaron. Los rebeles tomaron las dos naves i se fuyeron kon el trezoro .
Despues de esto empeso la dekadensya de Lafitte. Se izo hazino i muryo en 1826 a 44 anyos solo. Era un hombre muy korajozo ma muy kruel tambien, portanto ayudava a todos los proves i los menesterozos. Su vida se izo un filmo en 1958 «The Buccaneer» kon Yul Bryner, Charles Boyer, Charlton Heston…. Majestad i Dekadensya… Virtud i mil pekados…
Sharope blanco
SEFARADIMUESTRO
