eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
Shabat Zahor – Purim
Medldaremos la Parasha de la semana, komentada por el professor Yaakov Kaduri, tradusida i prezentada por Medi Kohen Malki.
El Shabat de antes de Purim es yamado «Shabat Zahor». Este nombre proviene de lo ke esta eskrito en el livro de Devarim:»I te akodraras de todo lo ke te avia echo Amalek en el kamino kuando estavash saliendo de Ayifto…esfasaras el rekordo de Amalek debasho del sielo-no te ulvides!». El trivo de los Amalekim, de verdad se asalto sovre Beney Israel imediatamente despues de sus salida de Ayifto, en la ora ke Beney Israel estavan muy kansdados.Los Amalekim provaron de eksterminar kada simiente de Israel de un golpe.Por esto la Torah komando de esfasar el nombre de Amalek del mundo. Kuando es ke esta koza fue realizada-i kuala es la relasion entre esto i la fiesta de Purim?
Los Amalekim no fueron eksterminados en la ora del vagabundeo de Beney Israel en el dezierto despues de sus salida de Ayifto, i no tambien en la epoka de de la konkista de muestra tierra, por ke , na ke estamos meldando sovre el puevlo de Amalek seines de anyos despues de esto:En los dias del Profeta Shemuel el Dio komando de muevo sovre la eksterminasion de Amalek para una vez i Buena-ombres, mujeres, i kriaturas, djuntos kon sus ganado i sus revanyo i todos sus bienes. Shaul el rey de Israel verdadmente salio a la gerra kontra eyos i los venso, ma el no kumplio el orden del Dio kompletamente:Malgrado ke el ekstermino la mayoria de los Amalekim, Shaul se apiado de la vida de Agag sus rey, i tambien no derroko a todas sus propriedades, komo el Dio avia komandado.
Al pareser, ke una parte de estos Amalekim sovrevivieron tambien en una epoka mas tadre, por ke na ke es kontado en la Megila de Ester, ke uno de los konsejeros del rey Ahashverosh lo enkorajo»A eksterminar, a matar, i a pedrer a todos los djidios del manseviko i asta el viejo, las kriaturas i las mujeres en un dia».i kual es el nombre de este konsejero? Haman el ijo de Hamdata Haagagi. Kere dizir, Haman fue uno de los desendientes del rey Agag ke sovrevivieron de la gerra kon la armada de Shaul. Si solo Shaul ovrava segun las palavras del Dio,nunka no se aria solevantado sovre mozotros este malo de la simiente de Agag.
Shabat Shalom a todos vozotros.
Medi Cohen Malki, Yerushalayim, Disiembre 2012
Purim Alegre a todos vozotros.
