eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
La fiesta de Sukot
Mi program de radio fue dedikado sovre una avla del profesor Yaakov Kaduri,en onor de la fiesta de Sukot, tradusida i prezentada por mi. Aki vos do el teksto.
La Tora esta komandando a todos los de Israel ke abandonen sus kazas en la fiesta de Sukot i ke moren en las Sukas durante los siete dias de la fiesta. Muestros savios fiksaron, ke esta mitzvah se esta kumpliendo, prensipalmente por medio de dos aksiones: El komer de kada kumida en la Suka (es permitido de komer frutas afuera de la Suka), i el dormir en eya la noche. Es verdad ke la eksistensia de estas dos kondisiones provoko unas siertas difikultades en la diaspora. En unos kuantos lugares, el klima era muy yelado, i en otros lugares la fiesta de Sukot kayiva frekuentemente en medio de la sezon de las luvias. En rezultato de esto, las komunidades tenian difikultades de kumplir las mitzvas de la fiesta yenamente. Oy dia, kon la tornada de Israel a su tierra, se izo posivle a los Israelies a kumplir las palavras de la Tora komo en akeos dias .
Djuntos kon las mitzvas de la Suka, ay una otra eksijensia, ke es de atar endjuntos kuatro spesias de plantas (Vayikera, kapitulo 23, pasuk 40):»La fruta de l’arvole de los argumenes», ke segun la tradision es la sidra; «Palmas de datiles», ke son las ramas de la arvole del datile, ke kresen en el sentro de la palma; «Una rama frondoza de arvole», ke es segun la tradision las ramas de la murta; i «Las ramas del torrente», ke kere dizir, las ramas de las savzas, de la planta konosida ke krese alado de los torrents. La Tora no mos esta diziendo ke azer kon las kuatro espesias, sino ke esta diziendo a «Tomarlas». Ma, la tradision de muesrtos savios fikso a tomarlas en la mano i a menearlas en varias direksiones. El uzo en la mayoria de las komunidades sefaradis i las komunidades del oriente es de menearlas enprimero a la direksion del sud, i despues al norte, al este, arriva, abasho, i a la fin al oeste.
Una mitzvah adisional fue dicha en la Tora en el konteksto de la fiesta de Sukot: «I te alegraras en tus fiestas…i solo seras alegre «(Devarim, kapitulo 16, pasukes 14 asta 15), i de aki viene la bendision uzada en todas las komunidades de los sefaradim i en las komunidades orientalas.
Moadim Lesimha a todos vozotros!
Medi Cohen Malki, Yerushalayim, septiembre 2013
—————————————————
El program de radio de Medi se puede sintir kada semana en noche de Shabat en KOL ISRAEL en LADINO en : www.iba.org.il/world. Esta semana la Emision salira en diya mierkoles 18/9/2013 por Sukot i este es el teksto de la emisión.
