De la meza de Medi: "El rey i el prove", un kuento de mi padre

Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.

Ver todos los artículos de esta sección >>

«El rey i el prove»

 

Era una noche de invierno, kon luvia i truenos, kuando el rey dechizo, ke el mizmo, keria saver la manera de bivir de su puevlo.

Se vistio ropas viejas i arremendadas, se apego barva i mustachos emprestados, i salio del palasio, sin ke lo veigan dingunos.

Despues de poko tiempo, se enfuertesio la luvia, i el, uvligamente, bateo en una de las primeras puertas de la sivdad.

Un prove lo aresivio a su kaza, i presto, presto, ensendio el odjak, i kon lo poko ke tenia, reushio a aprontar una supa kaiente para el viajero.

Despues de komer, se abasho el rey la barva i los mustachos emprestados, i le disho al prove:»Mira Buena persona,yo se el rey, toma estos diez dukados de oro, i no digas a dingunos nada sovre esta vijita sekreta mia onde ti. i ke sepas tambien, ke puedes ser kondenado por toda la vida en la prezion, si tal anulas este sekreto ,antes ke veigas mi kara entruna vez».

El prove estava embroliado de la situasion ke se topo supito, ma, kuando el vido la mizma kara del rey, en kada uno de los diez dukados, se konvensio, siertamente,sovre el personaje del viajero ke el tuvo la onor de resivir en su kaza.

Pasando unos kuantos dias, vino el vizino ke morava enfrente de su kaza, i le demando ke le diga, ken era el ke vijito akea media noche tempestuoza. I kuando vido ke el prove no se lo kijo dizir,le apozo en la mano sien dukados de oro, i el prove,viendo este acheto, le disho:»Era el rey mizmo ke me vijito».

Este sekreto, anulado de parte del prove, yego muy presto a los uidos del rey, i el rey se sanio muncho,i ordeno ke lo traygan delantre d’el, immediatamente.

I kuando demando del prove:»Deke anulates mi sekreto, antes ke veigas mi kara?», Le respondio el prove:»Senior Rey, yo ya alkansi de ver a tu kara, justamente sien vezes». I amostro, uno por uno, los sien dukados de oro kon su estampa, ke tomo de su vizino».

Esta biveza i entelijensia del prove, le plazio muncho al rey, ansi ke lo pardono.

Medi kohen Malki
2012 – Yerushalayim

________

MI padre es Moshe (Moiz )malki. Nasido de MIlas i despues fue kon su famiaya a izmir. En el 1950, vino a Yerushalaim, aki se kazo kon mi madre Djoya MIles (Judit) y es padre de tres ijas. Ente otras, el es poeta, i le gusta pintar i eskrivir en Ebreo i en ladino. Konose munchos kuantos de muestra tradision i siempre mos los konta.
Aze dos o tres mezes ke mi padre me konto este kuento.

________