eSefarad Noticias del Mundo Sefaradi
…Es mi nono Simantov Robert Boton (ke este en Gan Eden) ke me asentava enfrente de el i me kontava kozikas de la Tora i yo lo oyiya oras i oras sin enfasyarme, en mi tchikes.
En el tiempo ke biviya Ribi Akiva, uvo una epidemiya muy grande ke se muryeron muncha jente i tanbien 24.000 de sus elevos. Esta epidemiya ampeso en el empesijo de Omer i kada diya aviya syenes i miles de muertos.
Las mujeres de akel tiempo, lavoravan de diya i de notche, para kuzir mortajas. No durmiyan las notches asta las demanianas para kuzirlas. Asta el 33, diya ke eskapo esta epidemiya.
En lo ke eskapo la epidemiya, desidaron las mujeres de no kuzir mas las 
notches durante el Omer, asta el 33 diya ke es Lag Baomer. Por komemorar i respektar estos malos diyas ke pasimos.
En estos diyas malos, no se aze bodas, no se troka de kaza, no se fiesta alegriyas, no se estrena koza mueva. Yo vide de mi mama i de mis tiyas ke en Omer, las notches no kuziyan. Lo yamavan Sefira.
Kuando ya se aziya areskuro, diziyan : ya es Sefira…i alevantavan la kustura.
Agora no ay ansina un problem kreyo. Por ke la majoriya de la manseves de agora no save kuzir ni un boton.
No usamos aki en la Turkiya de asender fuego en Lag Baomer. El fuego i las flamas keren sembolizar la luz spiritual fuerte de la Tora.
Otra koza en Lag Baomer es ke los judios muy relijiosos asperan este diya de Lag Baomer para la primera kortadura de los kaveyos de sus ijikos. Asperan tres anyos sin kortar los kaveyos de los ijikos i kuando les kortan los kaveyos deshan las peyas largas, no se las kortan nunka.
Siempre diyas alegres…
Eliz Gatenyo (Istanbul)
