eSefarad Noticias del Mundo Sefaradi
Keridos amigos,
La fiesta de alhad pasado, el 28 de enero, mos desho a todos enkantados. Avia djentorya asperando en kola afuera la puerta del «Center for Jewish History» (Sentro para la Istoria Judia) en Manhattan para entrar a la fiesta del Dia Internasional de Ladino, kon estorya i kante (en inglez: «International Ladino Day: A Celebration of Story and Song»).
El oditorio estava yeno, i tambien el salon grande (Great Hall) ande los ke no pudieron entrar al oditorio pudieron verlo en ekran mezo «closed circuit tv.» En todo, uvo mas de 350 personas! Jason Guberman, direktor del American Sephardi Federation, disho ke vendieron mas munchos bilyetos de siempre desde ke el se izo shefe del ASF.
El program ke atiro tanta djente kontenia maraviozas estoryas i muzika, kon partisipasion de un autor, kuatro muzikantes, i dos rabinos.
Yo, Jane Mushabac, presente seleksiones de mi novela, «His Hundred Years, A Tale,» kon dichas i kantikas en ladino, djuntos kon la kantadera/akordeonista Jane Carver.
Rav Marc Angel avlo de proverbos en ladino i su chikez en la komunidad Sefaradi de Seattle, djente modesta kon dinyita, humor, i alegria de vida.*
Rav Nissim Elnecavé konto sovre Djoha, kon estorias de Djoha en ladino i inglez para el plazer de la asistensia. Konto ke el i Rachel Bortnick krean muevas anekdotas de Djoha relasionadas kon la perasha de la semana ke se publikan en «La Boz.»**
Trio Sefardi, muzikantes eredores de Flory Jagoda, kompletaron el program kon mas kantikas i muzika.
Los esponsores del program eran el American Sephardi Federation (ASF), el American Jewish Historical Society (AJHS), i el Sephardic Jewish Brotherhood of America.
Jason Guberman, direktor del ASF, izo las introduksiones. La asistensia inkluyia djente de varios paizes, sovrebivientes de la Shoa, artistas, lideres sefaradis, i personas de todo modo de ambiente. Eskucharon todo kon atension, riyeron, i kantaron djuntos kon Trio Sefardi, i mezmo gritaron «Amen» a la fin de la resitasion de «Ya komimos i bevimos» en la novela mi novela.
Munchas grasias a Rachel Bortnick por ayudar en la publisidad de esta evenimiento del 28 enero, 2018.
Jane Mushabac
New York
—————————-
* El teksto de la avla del RAv Angel se puede topar en:
https://www.jewishideas.org/
** «La Boz Sefaradi», editada del rav Elnecave, esta semana se topa en:
https://mailchi.mp/
